کەجەکە: پەنەوازا گردلاێو وەراوەروو هجوومەکاو دەوڵەتوو تورکیوە هەڵوێستشا بۆ!
هامسەرۆکایەتیی کۆنسەو ڕاوەبەرایەتیی کەجەکەی کۆکوشییەکاو دەوڵەتوو تورکیش دژوو سەرنیشت و وەرکەوتوو سوریای بەتندی شەرمەزارێ کەردێ و داواش وەنەو گرد لاێو کەرد هەڵوێستشا بۆ.
ئەرەیاونیاکەو هامسەرۆکایەتیی کۆنسەو ڕاوەبەریی (کەجەکە)ی:
"دەوڵەتی ئەرەگیرکەر و ئینسانکوشوو تورکی واوەی، هجوومش کەرد سەروو سەرنیشت و وەرکەوتوو سوریای، گەل و هێزەکاو وەرگێری بیێنێ بە ئامانجوو هجوومەکا، یانە و سەیارە و تیمە پزیشکییەکێ فڕۆکەی بێفڕۆکەوانی کەردێنێ ئامانج. دلێشنە ئاماژە پانەیە کریان، کە ٤ کەسێ جە هێزەکاو سوریای دیموکراتیکی گەشمەردێ بیێنێ و ١٢ کەسێچ بریندارێ بیێنێ. ئێمە بەتندی ئی کۆکوشییەو دەوڵەتوو تورکییە شەرمەزار مکەرمێ و داوا وەنەو گرد لاێوی مکەرمێ، ئی هجووما شەرمەزارێ بکەرا و وەراوەروو هجوومەکاوە هەڵوێستشا بۆ.
ئەم هجوومێ وەختێوەنە دەسشا پەنە کەردەن، کە ورچنیەی دلێ سەرنیشت و وەرکەوتوو سوریاینە مکریانێ، ماوێوا تەیب ئەردۆغان سەرۆکی فاشیست و قسەکەروو دەوڵەتوو تورکی ماچۆ ڕا نمەدەیمێ، ورچنیەی بکریۆ و ڕاش وەنە مگێرانێ. دمایی ئی کۆکوشییە کریا. پی هجووما جارێوی تەر ڕۆشن بییۆ، کە تەیب ئەردۆغانی سەرۆکی فاشیستوو دەوڵەتوو ئاکەپە-مەهەپەی دژوو گەلاو سوریای، کە گەرەکشانە برینەکاسا ساڕێژ بکەرا و دەس بە ئاوەدانکەردەیوە ژیوایشا بکەرا و بەرەو سیستمێوی دیموکراتیک هەنگامە بنیا، هجوومەکاشا دژ مکەرۆ. ئامانجوو دەوڵەتوو ئاکەپە – مەهەپەی، کە دوژمنێ ڕەهاو گەلوو کوردینێ، جە جەنگەنە ئیسفادە مکەرۆ و هەوڵێ مدۆنێ جەنگی قووڵتەر و فراوانتەر بکەرۆوە وەرکەوتوو دلێراسەیەنە. مەبەسی سەرەکیی دەوڵەتوو تورکی درێژەداین بە سیاسەتوو کۆکوشیی کوردی بە هجوومەکاش. گردوو ئا هجووما دژوو وەرنیشتی بازنەو ئی عەقڵییەت و سیاسەتەینە مکریانێ.
تەیب ئەردۆغان و دەوڵەتوو ئاکەپە-مەهەپەی، کە بە نیایرەی قەیومەکا سەرنیشتوو کوردستانینە، ئیرادەو گەلی کوردیشا دەسبەسەر کەردەبێ، سەروو ئا بنەمێوە گەرەکشانە ئیرادەو گەلوو کوردی وەرنیشتنە بماڕا و چا چوارچوەنە هجوومێ مکەرا. چونکوم تەیب ئەردۆغان و حکومەتوو ئاکەپە-مەهەپەی گرد یاگێوەنە، وەرلکەوت و وەرنیشت و پانیشت و سەرنیشتوو کوردستانینە، دوژمنێ گەلوو کوردینێ. ئی هجوومێ جارێوی تەر سەلەمنەرێ ئانەینێ، پەنەوازا هێزە وەڵاتپارێزنەکاو کوردستانی دژوو ئی ئەم کۆکوشی و عەقڵیەتوو کۆکوشییە و سیاسەتەکاو دەوڵەتوو تورکی دەس جە دەسوو یۆی، یۆی بگێرانێ و بە ئاشکراکەردەی هامکاری و خیانەتی مدرامان وکۆشیای دەس پەنە بکەرا. گردوو گەلاو سوریای بە تایبەت گەلاو سەرنیشت و وەرکەوتوو سوریای مشۆم دژوو ئەرەگیرکاری و هجوومە کۆکوشییەکاو دەوڵەتوو تورکی و حکوومەتوو ئاکەپە-مەهەپەی بە ڕانمایی ژیوای یەکسان و هامبەش بکۆشیان. هەرپاسە پەنەوازا گەلێ ستەموەنەکریێ جیهانی و هێزەکاو دیموکراسی، زیاتەر پەشتیوانیی گەلی و شۆڕشوو وەرنیشتی بکەرا. داوا وەنەو گرد لاێوە مکەرمێ سەروو ئی بنەمێوە هەستیارێ بانێ و بەدروسی و وەرپەرسانە وەراوەروو هجوومەکاوە هەوڵوێسشا نیشانە بدانێ."
