هامسەرۆکایەتی دەسەو ڕاوەبەری کەجەکەی داواش جە جمیەرە سۆسیالیستیە دیموکراتیکەکا کەردە، دژوو گۆشەگیری ئیمراڵی هەڵوێس گێرانە ۋەر و بەشداری چا هەڵمەتێنە بکەرا کە پەی ئازاڎیی جەستەیی رابەروو گەلوو کوردی عەبدوڵا ئۆجالانی دەسشپنەکەردەن.
هامسەرۆکایەتی دەسەو ڕاوەبەری کەجەکەی بۆنەو ١و ئایاری جەژنەو کرێکاراوە پەیامێوەش وەڵاکەردۆ و ئەرەیاۋناش، مشۊم مۆدێرنیتەی سەرمایەداری کە گرڎوو بەهاکاو مرۆڤایەتیش دلېنەبەردێنۍ، ڕاش ۋەروودەم و کاول بیەی ئیکۆلۆژیکینە کەردەنۆ و ژیۋایش یاۋنان بە لێواروو دلېنەشیەی، نازۆ و جیای ئانەی ژیۋایۍ دیموکراتیک، کۆمۆناڵ و هەرەوەزی، یەکسان، ئازاڎیواز و ئیکۆلۆژیک بنیاڎ بنریۆ.
ئانەیچ وزیان ڕووە، کە مشۊم جە ١و ئایارینە داواو ئازاڎیی جەستەیی رابەروو گەلوو کوردی عەبدوڵا ئۆجالانی بکریۆ و هەڵمەتەو ئازاڎیی جەهانی بە جەماوەری بکریۆ.
دەقوو پەیامەکەی ئینەن:
"ئێمە ١و ئایاری ڕۊو یۆبیەی و یۆگێرتەی جە گرڎوو چینە چێردەسەکا، گەلا و ژەنا بە تایبەتی چینوو کرێکارا مبارەک مکەرمۍ. ١و ئایاری کۊشیای، یۊبیەی ویەکڕیزی کرێکارا، رەنجدەرا و چینە چەوەسیاکا دژوو کۆلۆنیالیزمی سەرمایەداری. کۊشیای کرێکارا، رەنجدەرا و چینە چێردەسەکا جە کۊشیای مرۆڤایەتینە پەی یەکسانی و ئازاڎیی دژوو کۆلۆنیالیزمی جە تاریخەنە مەنزڵۍ فرە گرنگا. پېسە گرڎوو بەهاکا ١و ئایاری بە کۊشیای و قوربانیدای گەورەی وەش بیەن. ئێمە جە کەسایەتی گەشمەرڎا ١و ئایاریچەنە گەشمەرڎا ئاخێزی و دیموکراسی، خوڵقنەرا گرڎوو بەهاکا بە رێزداری و پنەزانایۆ ۋیر مارمېوە. وەختۍ ئا ڕووەیە پیرۆز مکەرمۍ، ئێمە جارێوەتەر وەعد واوەی مکەرمېوە کە دڵسۆزۍ گەشمەرڎا بیمۍ و بە ۋەرفراوانکەردەی کۊشیای یاڎوو ئاڎیشا بەرزڕاگێرمۍ.
مشۊم بە پاو ماناکێش پێشوازی جە ١و ئایاری بکریۆ
کۊشیای چینوو کرێکارا کە دژوو کۆلۆنیالیزمی سەرمایەداری وەڵۍ کۊتەن، تا مۍ گرڎوو بەشەکاو گلېرگەی بن دەسی خاوەنداریش ۋنەمکەرا و ئارۆ بیەن بە کۊشیای ژەنا، گەنجا و گرڎوو بەشە کۆمەڵایەتیەکا کە پەی یەکسانی، ئازاڎیی و دیموکراسی دژوو مۆدێرنیتەی سەرمایەداری کۊشیانە. فاڕیان پەی کۊشیایۍ گەردونی و بیەن بە موڵکوو مرۆڤایەتی. چی بوارەنە کۊشیای سۆسیالیزم هیچ قورسایێوەش جە دەس نەڎان، ماناکێش زیاتەر گەورۍ بیێنە و ۋەرپرسیاری جمیەروو سۆسیالیزمی زیاتەر بیەن. ئارۆ ۋەرپرسیاری گرڎوو جمیەرە ئازاڎیوازە دیموکراتیکەکا کە دژوو مۆدێرنیتەی سەرمایەداری کۊشیانە، بە تایبەتی جمیەرە سۆسیالیستیەکۍ زیاتەر بیەن و ۋەرپرسیاری ماڕای سیستموو مۆدێرنیتەی سەرمایەداریش ئینا ۋەروو دەمینە و ڕاش ۋەروودەم و رزگاری گرڎوو مرۆڤایەتینە کەردەنۆ. بە هوشیاریوە مامەڵەکەردەی، قووڵکەردەیۆ ئا بنەمایۍ و هەڵمەتەی بەقوەتە پەی ماڕای سیستموو مۆدێرنیتەی سەرمایەداری و دمایی ئاردەی بە کۆلۆنیالیزمی بۆ بە یەکلای کەرەوە. بە هوشیاری ئا ۋەرپرسیارییە تاریخیە مشۊم ئێمە هوشیاری ئازاڎیی قووڵبکەرمېوە، ئەقڵیەتوو باڵادەسی پیای ماڕمۍ و ژیۋای کۆمۆناڵی ئیکۆلۆژیکی دیموکراتیک وەڵۍ وزمۍ. مشۊم بە شێوێوە و بە بەپاو ماناکېش، پێشوازی جە ١و ئایاری بکەرمۍ.
مشۊم بە دڵنیاییوە سیستموو کۆلۆنیالیستی دلېنە بشۆ
سەرمەشقە تاریخیەکۍ سۆسیالیزمی ئەرەیاۋنانشا، کە مۆدێرنیتەی سەرمایەداری تا مۍ کۆلۆنیالیزمی گەورەتەر مکەرۆ و فاڕیۆ پەی کۆلۆنیالیزمی بێسنووری و ناستەی ئا سیستمەو مۆدێرنیتەی ئەرکی هەرە بنچینەیی مرۆڤایەتیا. ئارۆ ئێمە فرە عالتەر متاومۍ بۋینمۍ کە تاریخ پەشتڕاسی ئاڎیشاش کەردەنۆ. مۆدێرنیتەی سەرمایەداری بە هەڵوێسوو ۋێش پەی زەوتکەردەی و دەس سەرەرەگێرتەی گرڎ چێوۍ، بە دلېنەبەردەو گرڎوو بەهاکا مرۆڤایەتی، تاکپەرسی و ۋۍ پەرسی پەرەپنەدان و بە دلېنەبەردەی ئیکۆلۆژی ژیۋایش یاۋنان بە لێواروو دلېنە شیەی. نە گلېرگەو و نە ژیۋگە کە ئێمە چنەشەنە مژیومۍ ئیتر مەتاوا ۋەرگەو مۆدێرنیتەی سەرمایەداری بگێرا. دلېنەبەردەی ئا سیستمە ئەرەگیریە و بنیاڎنیای ژیۋایۍ دیموکراتیک، کۆمیناڵ و هەرەوەزی، یەکسانیوازانە، ئازاڎیوازانە و ئیکۆلۆژیک بیەن بە بنەمایۍ. ڕاو بەدەسئاردەی ئانەیچ وەڵۍ وستەی یۊبیەی و هامپەیمانیەکەی گوزارش جە جەوهەروو ١و ئایاری مکەرۆ و چنی کۊشیای گەلی و ژەنا دلۍ یۆبیەی و یۆگێرتەینە کۊشیای سۆسیالیزم و دیموکراسی بەرۆ ڕاوە.
رابەر ئاپۆ پەی ئازاڎیی گرڎوو گەلا کۊشیا
ئاخێزوو ئازاڎیی کوردسانی جە چوارچێوەو کۊشیای سۆسیالیزمینە وەڵێکۊت. رابەر ئاپۆ نەک هەر پەی ئازاڎیی گەلوو کوردی، پەی ئازاڎیی گرڎوو گەلا و چێردەسا کۊشیا و پەی ئانەیچ گرڎ وەختۍ دلۍ گێڵای و حۊڵداینە بۍ. ئەنەیاوای و هەڵوێسوو کۊشیای هامبەشی و ژیۋای هامبەشی چنی کۊشیای گەلوو کوردی ئاوێتە کەرد و کەردەنش بە هێزوو سەرمەشقوو کۊشیای گەلاو تورکیای و ۋەرکەوتوو دلېڕاسەی. رابەر ئاپۆ بە پا گیریوە پەی وەڵێوستەیش کۊشیان. ئاخێزێوە کە جە ۋەرنیشتەنە ئاما ئاراوە، وەڵێکۊتەی گەلاو ئێرانی و ۋەرکەوتی ۋەروو رۆشنایی فەلسەفەو ژەنۍ، ژیۋای، ئازاڎینە، پاشەکشەکەردەی فاشیزمی ئاکەپە-مەهەپەی جە تورکیا و ئا وەڵێکۊتەیە کە هێزە دیموکراتیەکا بەدەسشا ئارد، دەرەنجاموو ئا پا گیریە بێنۍ. جە لېوەتەرۆ رابەر ئاپۆ بە وەڵێوستەی پاڕادایموو سۆسیالیزمی بەروو دەوڵەتی سەروو بنەماو ئازاڎیی ژەنۍ، دیموکراسی و ئیکۆلۆژی و تیۆری مۆدێرنیتەی دیموکراتیکی دژوو مۆدێرنیتەی سەرمایەداری، حۊڵشدا ئاستەنگوو ئایدۆلۆژی-تیۆریکی ۋییەرنۆ و ئاسۆیۍ بە کۊشیای سۆسیالیزمی بەخشۊنە. ئا رەنجەو رابەر ئاپۆی گرنگیێوە تاریخیش هەن.
بانگەواز ئاراسەو جمیەرە سۆسیالیستیەکا کریا کە بەشداری جە هەڵمەتەو ئازاڎینە بکەرا
ئانۍ گرڎ بەرش وزا کە رابەر ئاپۆ بە شێوێوە ۋەرپرسیارانە جماوە. داوا جە گرڎوو جمیەرە سۆسیالیست و دیموکراتیکەکا مکەرمۍ کە دژوو گۆشەگیری رەها و سەروو رابەر ئاپۆی، جە ١و ئایارینە بە یۆبیەی و یۆگێرتەی چنی گەلوو کوردی، چنی هەوڵدای و هەڵوێسوو کۊشیای رابەر ئاپۆی بانۍ بە خاوەن هەڵوێس و بەشداری جە هەڵمەتەو ئازاڎینە بکەرا کە ئامانجش ئازاڎیی جەستەیی رابەر ئاپۆیا.
مشۊم گەلوو کوردیچ زیاتەر خاوەنداری جە ١و ئایاری بکەرۆ. جە ١و ئایارینە مجیارە جاڎە و مېڎانەکا و یەکڕیزی ۋێش چنی رەنجدەرا و گەلی نیشانە بڎۆ. بە دەنگی بەرز هاوار پەی داواکارییەکاش بکەرۆ و بە داواو ئازاڎیی جەستەیی رابەر ئاپۆی هەڵمەتەو ئازاڎیی گەردونی بیاونا بە ئاستوو جەماوەری بیەی. پا هەست و هەڵوێسۆ جارێوەتەر ١و ئایاری پیرۆز مکەرمۍ. بەتایبەتی گەلوو کورسانی، داوا جە گرڎوو گەلا، ژەنا، گەنجا و دۆساشا مکەرمۍ کە جە ١و ئایارینە مجیارە جاڎەکا، بە یۊگێرتەی کرێکارا و رەنجدەرا کۊشیای یەکسانی، ئازاڎیی و دیموکراسی بەرزبکەراوە. سەروو ئا بنەمایۍ داوا مکەرمۍ بە شێوێوە بەقوەت ١و ئایاری پیرۆز بکریۆ".
