ئەنجوومەنوو هامسەرۆکایەتیی کۆنگرەو گەلی بە ڕێزدارییوە، ڕاپەڕین ئامەدە یوە جە سەرمەشقەکاو جمیەری ئازادیوازی ژەناش یادە کەردۆ و واتش: "شۆڕشگێڵنێ سەرمەشقەو بنیاتنیای کۆمەڵایەتی بێ."
ئەنجوومەنوو هامسەرۆکایەتیی کۆنگرەو گەلی پەیامێوەش وەڵا کەردۆ واتش، "هامڕا ڕاپەڕین ئامەدە جە هجوومی عاسمانیی دەوڵەتی فاشیستوو تورکینە ١٧و حوزەیرانوو ٢٠٢٢ گەشمەردێ بییە، ٢ەمین ساڵوەگێڵوو گەشمەردەبییەیشنە بە ڕێز و حورمەتۆ یادش بەرز مرمانمێ. پێسەو ئەندامێوی پەکەکەی و پاژکی، ماوەو کۆشیای ٣٠ ساڵەیشنە گردوو پارچەکاو کوردستانینە خزمەتش کەردەن.
درێژەو پەیامەکەینە ئامان، "پەی ئەرەمەرزنای سیستمی ئاکادیمی، هەرمانێ هامبەشێ، ئەنجوومەن و کۆمۆنەکێ، کە چوار بنەمێ بنەڕەتیێ کۆنفیدرالیزمی دیموکراتیکینێ، سەرمەشقایەتیی بنیاتنیای کۆمەڵایەتی کەرێنێ. بەتایبەتی پەی سەرکەوتەی ئاکادیمی و دابینکەردەی پەروەردەی پێویسی پەی کۆمۆن و ئەنجوومەنەکا.
چی پڕۆسەنە، سەرەتاییتەرین هەرمانەو ئێمە پێسەو گەلی و جمیەری ئازادی ئانێنە، کە تیشکە بوزمێ سەروو سەرکەوتەی هەڵمەتەو "ئازادیی پەی بۆ ڕابەر ئاپۆی، چارەسەری سیاسی پەی کێشەو کوردی". پەی یاوای پی ئامانجەیە، هەڵمەتەو ئازادی و بنیاتیای گلێرگەی دیموکراتیکی هامتەریب بکریۆ.
ئێمە چوارچوەو کۆنفیدرالیزمی دیموکراتیکینە و پارادایموو نەتەوەی دیموکراتیکینە، بە مەبەسوو ماڕای ئا سیستەمە کۆکوشەیە ئیمرالیینە کە لاو هێزە پیلانگێڵنە میاندەوڵەتییەکا و ڕژێمی فاشیستوو تورکیوە وەش کریان سیستمێوی کۆمەڵایەتیی یاگەدار بنیات منیەیمێ. بنیاتنیای سیستمێوی کۆمەڵایەتی سەروو بنەماو پەروەردەی و ڕێکوستەی گەلی، سەروو بنەماو نەتەوەی دیموکراتیکی، کە ئامانجی سەرەکییش کۆشیای ئازادییا بنیات منیەیمێ.
هامڕا ڕاپەڕینە بە عەشق و سۆزۆ پەی کەردەی هەرمانێ پەروەردەیێ گەل بەتایبەتی کۆمۆن و ئەنجوومەنەکانە چوارچوەو یاسانیایرەینە کۆشیا. ئاد زانێ کە بنیاتنیای سیستمێوی کۆمەڵایەتیی دیموکراتیک و ئیکۆلۆژی سەروو بنەماو ئازادیی ژەنا کرێڵوو ئازادیی ڕابەر ئاپۆی و گەلەکەیمانە. پی زانیاری و باوڕۆ هەرمانەو بنیاتنیای کۆمەڵایەتی کریا. پێسەو ئەنجوومەنوو هامسەرۆکایەتیی کۆنگرەو گەلی، شێوازوو خوڵقکارییەکاو هامڕا ڕاپەڕینێ هەرمانەو بنیاتنیای کۆمەڵایەتیینە بە بنەما مگێرمێ.
چی پڕۆسەنە کە هەڵمەتەو "ئازادیی پەی سەرۆک ئاپۆی، چارەسەری سیاسی پەی کێشەو کوردی" و هەرمانەکاو بنیاتنیای کۆمەڵایەتی پەرسێ سەرەکیێنێ، نەبییەی هامڕا ڕاپەڕین ئامەدێ خەسارێوی گەورەن پەی ئێمە. بەڕێزدارییوە وەروو یادوو هامڕێمانە سەرە مکۆمنمێرە، هەرمانەو ئێمەنە کە هەرمانە تەمامنەکریایەکاش پاسە کە گەرەکش بێ بکەرمێشا.
پێسە تەڤگەروو ئازادی و گەلی، وەعد بە گردوو گەشمەردا و بەتایبەت هامڕا ڕاپەرینێ مدەیمێوە. بە بەیاگەیاونای پارادایموو ئازادیی جە ڕاو بنیاتنیای سیستموو گلێرگەی دیموکراتیکیوە، ئامانجوو گەشمەرداما سەروو بنەماو ئازادیی ڕابەر ئاپۆی و گەلەکەیما بارمێ دی. هەلومەرجوو یاوای پی ئامانجانە ڕاو کۆشیای بەردەوامیوە وەش بۆنە. پی هۆشیاری و وەرپەرسییوە، کە وەراوەروو گەشمەرداما و تارێخیماوە هەنما هەرمانەکاما میاونمێ سەرکەوتەی.
