کۆنسەو ڕاوەبەری کۆنگرەو نەتەوەیی کوردسانی (کەنەکە) بە پەیامێوە؛ ١و ئایاری جەژنەو کرێکارا و ڕەنجدەراش مبارەکە کەردە.

پەیامەکەو کەنەکەی پی جۊرەنە:     

" کرێکارا و رەنجدەران بە کۊشیای و ۋێڕاگری ۋێشا، بە ئارەقوو میاچەما و رەنجوو ۋێشا ١ و گوڵانیشا کەرد بە رۆو  یۊبیەی، کۊشیای و هامپەشتیی کرێکاراو جەهانی. ئی جەژنۍ جە ئیساتێنە  جە سەرانسەروو دنیێنە پېسە ڕووێوە تایبەتی و ماناڎاری  مبارەک مکریۆ.  با ڕۊو ١و گوڵانی جە تەماموو کرێکارا و زەحمەتکێشا کوردسانی و دنیێ مبارەک بۆ.

ڕۊو ١و گوڵانی جەژنەو گرڎوو خەڵکوو کوردسانیا. کوردسانیۍ سەڎان ساڵېن پەی ئازاڎیی و رزگاری و ژیۋایۍ ئاسوودەی و سەرفرازی ئەرەکۊشا. ئی ئەرەکۊشایە ۋێش جە ۋێشەنە رەنجێوە گەورە و بەهادارا. ۋەروو ئانەی خەڵکوو کوردسانی کرێکارۍ و رەنجدەرۍ ئازاڎیی و رزگارینۍ. هەر پۊکەی کوردسانیا پېوەرە و بە فەخرۆ ئی جەژنۍ مبارەکە مکەرا و بە جەژنەو ۋێشا مزاناش.

با ئی جەژنۍ جە تەماموو خەڵکی و گەریلای و پێشمەرگەی و جەنگەوانا، جە گرڎوو خەباتکارا دۆزوو ئازاڎیی و رزگاری کوردسانی مبارەکە بۆ.

رژێمە سەرکوتکەرەکۍ، هەمیشە یاڎکەردەیۆ ئی جەژنێشا قەڎەغە کەردەن. هەزاران لەمپەرۍ و ۋەربەسێشا وستێنۍ ۋەردەموو کرێکارا و رەنجدەرا، تا ئی ڕووەیە پېسە جەژنۍ پیرۆز نەکەرا. بەڵام خەڵک بێ سڵەمایۆ، بەردەوام درێژەشا بەخەباتی و کۊشیای و رەنجوو ۋێشا دان و جە دیموو خەباتینە ئی جەژنېشا کەردێنە حەقیقەت وساڵانە مبارەکەشا کەردێنە.  گەلوو کوردیچ هەر جە سەرەتاکاو بیەیشۆ ئی ڕووەشە بە جەژنە پېسە جەژنەو ۋێش قبوڵە کەردێنە و بە جۆش و خرۆشۍ فرۆ زەماۋنەش گێڵنێنە.

ئێساڵ، ئێمەی کورد و کوردسانیا جە ئاژێوە هەستیار و جدینە پێشوازی جە ١و گوڵانی مکەرمۍ. جە چوار لاو کوردسانیۆ هجووم و پلانەی دژ بە گەلوو کوردی بەردەوامېنۍ. دوژمنۍ پرۆژەکێشا گەورێنۍ، گرڎوو دەسکەوتەکا کوردی ئینۍ چێروو مەترسیی گەورەینە. دەوڵەتوو تورکیای ۋێش پەی هجوومێوە گەورەی ئاماڎە مکەرۆ. گرڎوو ئاماڎەکارییە سەروازییەکۍ ۋێش تەمام کەردێنۍ. جە مانگەکا پایزی تا ئیساتۍ دەسشا بە هەڵمەتێوە دیپلۆماسی کەردەن. وەفدەکێشا ئینۍ ئەوروپا و  ئەمریکا و ڕووسیا و ئێران و وڵاتا عەرەبیینە. بە چڕی ملا پەی عێراقی. گەرەکشانە ئێران و عێراقی بکەرا شەریکە جەنگ و هجووم و ۋێشا. ئامانجی یووەم هەرێمەکۍ پارېزنای مەدیای و تەماموو بنکەکا گەریلاکان. دماتەر ۋەرنیشتوو کوردسانیچ هەن. ئاڎۍ پی جۊرە مەبەسوو ۋێشا بەربڕا، بەڵام جە ئەساسەنە، گرڎوو کوردی بە پانیشتوو کوردسانیچۆ مکەرا ئامانج و گەرەکشانە گرڎوو کوردی دلېنەبەرا. پێویسا گرڎوو حیزب و ڕێکوزیا و هێزەکاو کوردسانی ئا حەقەتینیە بوینا و بەپاو ئی ئاژەیە هەڵسوکەوت بکەرا. پۊکەی مشۊم گرڎوو هێزە کوردسانیەکا یەکدەنگی و  یۆبیەی ۋێشا هێقم بکەرا و جە سەنگەرێوەنە دژ  پا پیلانا مرداوە و پوچێشا بکەراوە.

پێویسا گرڎوو هێزەکاو کوردسانی دژوو هجووم و پیلانەو ئەرەگیرا بە هەڵوێسۍ با. پی بۆنۆ داوا جە گرڎوو کوردی و کوردسانیا مکەرمۍ کە بە جۆش و خرۆش و جەژنەو نەورۆزیۆ، جە گرڎ شۊنێنە بەشداری جە مەراسیمەکا ١و  ئایارینە بکەرا.

کۆنگرەو نەتەوەیی کوردسانی ڕۊو ١و  ئایاری جە گرڎوو خەڵکوو کوردسانی و جەهانی مبارەک مکەرۆ."