کەنەکە بۊنەو جەژنەو قوربانیوە ئەرەیاۋنێوش وەڵاکەردۆ و واتش: "چی ئاژەنە هیواڎارێنمۍ و باوەڕیما پانەی هەن کە گەلەکەما جە ئایڼێوە نزیکەنە بە ئارامی و ئازاڎیوە سەرو خاکو ۋێشۆ جەژنەو قوربانی پیرۊزە مکەرۊ".
کۆنگرەو نەتەوەی کورڎەسانی (کەنەکە) بۆنەو ئامای جەژنەو قوربانیوە ئەرەیاۋنېوەش وەڵاکەردۆ و جەژنەو قوربانیش پیرۆزەکەردە.
ئەرەیاۋناکەو کەنەکەی پی جۊرەنە:
"سەبای جەژنەو قوربانینە. بە داخەوە جە ئاژێوە دژوارەنە جارێوەتەر پێشوازی جە جەژنۍ مکەرمۍ. هجوومە قڕکارییەکۍ سەروو گەلەکەیما جە تەماموو جەهانینە بەردەواما. گەلەکەما قڕ مکریۆ و سروشتوو وڵاتیما تاڵان مکریۆ. زیاتەر جە ١٠ هەزار زیڼانیا سیاسی جە گېرتەخانەکانە ئینۍ چېروو فشاری و ستەمینە. سیاسەتوو ئەرەگیری و هەڕەشۍ دووژمنا سەرو پانیشت و ۋەرنیشتوو کورڎەسانی زیاتەرۍ بیېنۍ. جە ۋەرکەوتوو کورڎەسانیچەنە ڕووانە کۆڵبەرۍ کوشیانە. چنی ئینەیچە فشاروو دەوڵەتی جە ۋەرکەوتوو کورڎەسانینە زیاتەر بیەن و کێشە کۆمەڵایەتییەکۍ ڕۆ دماو ڕۆی قوڵتەرۍ باوە. جە پانیشتوو کورڎەسانیچنە کێشە ئابووری و کۆمەڵایەتییەکۍ بەردەوامېنۍ، هەڵای ئا کێشۍ چارەسەر نەکریېنۍ. هجوومەکۍ دەوڵەتو تورکی زیاڎۍ بیێنۍ. جە هەمان وەختەنە هجوومەکۍ سەرو ۋەرنیشتی بەردەوامېنۍ. جە سەرنیشتوو کورڎەسانیچ جەنگ و ئەرەکۊشای بۊنەو بیەیۆ بەردەوامېنۍ.
پێویسا گرڎوو هێزە کورڎەسانیەکا جە ۋەراۋەروو ئی هجوومانە مرداوە. پی بۊنۆ جارێوەتەر داوا جە گرڎوو کورد و کورڎەسانیا مکەرمۍ جە دژوو هجووم و ئۆپراسیۆنەکاو دەوڵەتو تورکی هەڵوێس برمانا، دەنگشا دژوو ئەرەگیری هۊربڕا و یاگۍ ۋێشا جە سەنگەرەکاو هێزەکاو پارېزنای کورڎەسانی بگېرا.
پېسە کۆنگرەو نەتەوەیی کورڎەسانی چی ئاژەنە هیواڎارێنمۍ و باوەڕیما پانەی هەن کە گەلەکەما جە ئایڼێوە نزیکەنە بە ئارامی و ئازاڎیوە سەرو خاکو ۋێشۆ جەژنەو قوربانی پیرۊزە مکەرۊ. پی بۊنۆ پیرۆزبای جەژنۍ جە گرڎوو زیڼانیا سیاسی، جە ئازاڎیوازا و جە گەلوو کورڎەسانی و گرڎوو جەهانی ئیسلامی مکەرمۍ."
