کەنەکە جە ئەرەیاوناێوی نویسیانە سەرەوەشیی وێش وەنەو بنەیانەو ئا کۆچبەرا کەرد، کە کەناراوەکاو ئیتالیاینە نوقمێ بیێ. کەنەکە ئاماژەش پانەیە دا سەبەبوو مەردەی گەنجاو کوردی حکومەتوو هەرێموو کوردستانی و دەوڵەتوو ئێرانین.
کۆنسەو ڕاوەبەریی کۆنگرەی نەوەتەوەیی کوردستان (کەنەکە)، پێوەس بە قۆمیای چێرئاوکەوتەی یەختوو کۆچبەراوە کەناراوەکاو ئیتالیاینە، ئەرەیاوناێوی نویسیاش وەڵا کەردۆ و سەرەوەشیی وێش پەی بنەیانەو قوربانییەکا بەروست.
ئەرەیاونایەکەینە ئامان: "بەداخۆ چی چند ڕووەو وەڵێنە، یەختێوی کۆچبەرا کەناراوەکاو ئیتالیاینە نوقم بی و هاموەڵاتێ کوردێ فرێش چنەبێنێ و بە دەیان کەسێچش. وەک چنە مەردێ، کۆنگرەی نەتەوەی کوردستانی سەرەوەشیی وێش وەنەو بنەیانەو قوربانییا مکەرۆ."
کەنەکە سەبەبوو مەردەی گەنجاو کوردی چا قۆمیایەنە موزۆنە گەردەنوو حکومەتوو هەرێموو کوردستانی و دەوڵەتوو ئێرانی و ماچۆ: "وەرپەرسی سەرەکیی ئی ڕووەدایە حکومەتوو هەرێموو کوردستانی و دەوڵەتوو ئێرانینێ، کە گەنجاو کوردی بە بێکاری، گەندەڵی، کێشە ئابوورییەکاوە ناچارێنێ ڕاو مەرگی و شەپۆلەکاو بەحری هورچنا پەی یاوای بە ژیواێوی تازەی."
ئاخروو ئەرەیاونایەکەو کەنەکەینە ئامان: "هەرمانەو حکومەتی دابینکەردەی گوزەرانی و ئارامیی ژیوای خەڵکی و گرەنتیی ئایندەین تا خەڵک بتاوانە وەڵاتوو وێشانە بژیوا، جە ڕای یاسایی و ئاساییوە پەی وانای و گەشتی سەفەربەرێ بانە، نەک پەی یاوای بە ژیواێوی ئارام وێشا ناچار بە ژیوای مەرگی بکەرا."
