شۆڕش خدر، ئەنداموو کۊنگرەی نەتەوەیی کورڎەسانی جە بارەو ۋەڵینەو ئەرەگیری پەی سەرو گەلو کورڎی، جە دیڎارێنە پەی ئاژانسو هەواڵوو فوراتی قسېش کەردۍ و واتش: "بەدرێژایی ۋەڵینەی، گرڎو ئا شۆڕش و ژڵېوییایا دلۍ گەلو کورڎینە جە هەر چوارپارچەنە وەشۍ بېیێنۍ بە مەڵامەتوو دلېینەی و مېیاندۆڵەتی، پلانگېڵنیشا ۋەرا ۋەر کریان و کپۍ کریێنێوە، پېسە نمونەو شۆڕشو ئاگری داخی بە ڕابەرایەتی شێخ سەعیدی پیرانی و ژڵېوەو کۊمارو مهابادی بە ڕابەرایەتی قازی محەمەدی، هەرپاسە شۆڕشو بارزانییەکا، سەرةڕاو گرڎو ئا تێبینیا کە سەرشا بېنېما، پەرسو ئەرەگیری و دژ بېیەی نەتەوەو کورڎی بەردەوام مەڵامەتوو شکسوو ئی شۆڕشا بېیەن، بەڵام جە ۋەرا ۋەرەنە ئیساتۍ ئېمە جە پانیشتو کورڎەسانینە خاوەنوو قەوارێوەنمۍ کە دڎانش نریان پۊرە، جە وەرنیشتو کورڎەسانینە هېزەکاو قەسەدەی تاواشا ڕووبەڕوو هېزێوە پېسە داعشی باوە و ئینەیچ یاگۍ دەسوەشییا، هەرپاسە جە ۋەرکۆتو کورڎەسانی شۆڕشو ژینۍ سەرپا وزیا جە سەرنیشتوو کورڎەسانیچ، کوردا و واڵە و برایاما کۊششی مەدەنی وەڵۍ وزا، گرڎو ئی دەسکۆتا بەرهەمۍ ۋنەو گەشمەرڎانۍ و کورد خاوەنوو هېزێوە مرۊیی و خاکێوە بەپیتینمۍ، ئانەیچ گرنگا ئانەنە کە ئېمە چنی بتاومۍ ئەزموون هۊربگېرمۍ جە ۋېیەردەی، چوونکی یۊ چا مەڵامەتا کە پاسشەکەرڎەن چا شۆڕشە تارېخیانە شکس بارمېنە ئانە بېیەن کە نەتاوانما خاوەنوو ئایدیېوە ڕامیاری و ستراتیجیېوە هامبەشی بیمۍ پەی ڕووبەڕووبېیەیۆ ئەرەگیریەکا، جە کاتێنە کورد جە هەر چوارپارچەو کورڎەسانینە خاوەنوو دژمنێوە هامبەشی بېیێنمۍ." 

' ئەرکوو ئێمەن بە گرڎ جۊرۍ پەشتگیری گەریلاکاو ئازاڎیی بکەرمۍ'

 ئاڎ سەبارەت بە ڕووبەڕوو بېیەیۆ ئەرەگیریەکا پەی سەرو گەریلاکاو ئازاڎی واتش: "دۆڵەتو ئەرەگیرو تورکیای بە گرڎو ڕا تەکنیکییەکاشۆ هەوڵشدان هوررووژم پەی سەرو گەلو کورڎی بکەرۊ، بەڵام جە ۋەرا ۋەرەنە گەریلاکاو ئازاڎی، بەردەوام ڕووبەڕوو ئی هوررووژما بېیېنېوە و گەریلای مۆدێرنشا وەش کەرڎەن، پەی ڕووبەڕووبېیەیۆ تەکنیکە تازەکا، چەکە تازەکۍ، هەرپاسە هېزەکاو قەسەدەی جە وەرنیشتو کورڎەسانی بەردەوام ڕووبەڕوو هورووژمەکا باوە، ئەرکوو ئېمە ئانەنە کە بە گرڎ جۊرۍ پەشتگیری گەریلاکاو ئازاڎی بکەرمۍ و ڕووبەڕوو دژمنی بیمېوە ."

 هەر سەبارەت بە ڕێکوزیاکا مافی میان دەوڵەتی و پەشتگیریکەردەی گەلوو کوردی، شۆڕش خدر، ئەنداموو کۆنگرەی نەتەوەیی کورڎەسانی واتش: "ئەزموون پنەما ماچۆ کە ئێمە نمەتاومۍ پەشتی بە هیچ کام چا ڕێکوزیایا بەسمۍ کە دەرگیرېنۍ و تێکەڵێنۍ چنی سیستەموو سەرمایەداری، ئەرکوو ئێمە، هەم پېسە هاموڵاتی، هەم نوویسەرا و ڕوشنۋیرا ئانەنە هامشانوو گەریلاکاو ئازاڎیی ڕووبەڕوو دووژمنی بیمېوە و خەباتوو ۋێما بەردەوام بکەرمۍ، حەرپاسە ئەرکوو لایەنە سیاسییەکان، کە نەبانۍ بە بەشێوە چا ئەرەگیریەی کە دەوڵەتو تورکیای دژ بە گەلوو کوردی مکەرۊش و جە ۋەرا ۋەروو ئا قڕکەردەینە بێدەنگۍ نەبا."

' تا ڕابەر ئۆجالان ئازاڎ نەکریۆ ئاریشە و ئەرەگیریەکۍ جە ۋەرکۆتو دلېڕاسەینە دمایشا نمۍ'

 نامبریا ئاماژەیچش پانەی کەرد کە جە تاریخەنە گېرتەی و پیلانگېڵنای جە ۋەرا ۋەرو سەرکردەکانە چېوۍ نامۆ نېیەن و جە هیندستانەنە غاندی و ئەفریقانە ماندێلاما هەنۍ و واتش: "جە تارېخو کورڎینە هیچ سەرکردېوە پېسە ڕابەر عەبدووڵا ئۆجالانی خاوەن ۋیر و ئایدیا نەبېیەن، سەرەڕاو ئانەی کە هېزی سەروازیش بۊ، ئاڎ سیستەمو کۊنفیدرالیزمی دیموکراتیکی پېسە چارەسەری پېشکەش بکەرۊ و متاو واچوو تا ئاڎ ئازاڎ نەکریۆ ئاریشە و ئەرەگیریەکۍ جە ۋەرکۆتو دلېڕاسەینە دمایشا نمۍ."