کوردەکۍ بەشداریشا جە چالاکییەکاو دژ بە کۆبیەیۆ وڵاتا جی ٧ ینە کەرد
دژوو کۆبیەیۆ وڵاتا جی ٧ ی کە جە ئیتالیانە ملۊڕاوە، بە هەزاران کەسۍ کوۍ بیێوە سیاسەتە جەنگەرانەکېشا شەرمەزار کەردۍ.
بەمەڵامەتوو لووای ڕاوەو کۆبیەیۆ قولەپۊپەو جی ٧ ی جە شارو فاسانۆی ئیتالیای ، ئەنداماو سەندیکاو کرێکارا جۆباسی، گلېرۆبیەی خۊنکارا و ژمارېوە فرە جە رێکوزیاکا جە دلېڕاسەو شارینە کوۍ بیێوە و چالاکی شەرمەزارکەردەیشا سازکەرد.
بە هەزاران کەسۍ دەسەڵآتداراشا شەرمەزارۍ کەردۍ و ئەرەیاۋناشا کە ئاڎۍ مەبانۍ بە هامبەشۍ جەنگۍ کە گەرەکشانە ڕاوەبەرش بکەرا. ئەنداماو کۆمیتەو کوردیچ بەشداریشا جە چالاکیەکەنە کەرد.
ئەرۆل ئایدەمیر بە نوێنەرایەتی کوردا جە چالاکیەکەنە قسېش کەردۍ و سەرنجش وست سەروو سیستموو گۆشەگیری میان نەتەوەیی سەرو رابەروو گەلوو کوردی عەبدوڵا ئۆجالانی و ئانەش وست ڕووە کە سەرکردە جەنگەرانەکۍ جی ٧ ی جیهانی بەرەو جەنگېوە هەمەلایەنەی چەپەڵی مبەرا، سیستموو سەرمایەداری کە ئینا دلۍ گېجاوېنە پەی ئانەی چانەی ڕزگارش بۆ پرۆژەو جەنگی ئاماڎە مکەرۆ.
ئایدەمیر ئاماژەش پەی ئانەی کەرد ج ئاکاموو بەرهەمئاوردەی چەکی ئەتۆمی و کیمیایی ئا سەرکردە جەنگەرانانە، فاڕیای کەشوهەوای وەش بیەن، هامسەنگی ئیکۆلۆژی تێکشیەن. جە بەشێوە تەروو قسەکاشەنە واتش، دەوڵەتا تەرەفڎارۍ جەنگی ئەردۆغانیچشا جە ئامانجە چەپەڵەکاشانە بەشدار کەردەن و قڕکەردەیشا سەرو گلېرگەکارە سەپنان.
ئایدەمیر دەسنیشانش کەرد کە دژوو سیستموو سەرمایەداری دەوڵەت نەتەوەکا کە یاوان بە بنبەس، چارەسەر کۆنفیدڕاڵیزمی دیموکراتیکا.
جە ڕاپیماکەینە دروشمەکا پېسە "ئازاڎیی پەی عەبدوڵا ئۆجالانی"، "ئازاڎیی پەی فەلەستینی" و "تیرۆریست ئەردۆغان"ی وچیېوە.
