هێزی یووە جە ئەڎایا ئاشتیی ئەرژەنتینی میرتا ئاکونا دی باراڤالە جە تەمەنو ٩٩ ساڵینە عەمرەو خوڎایش کەرڎە. پەی کۆچی دماینو ئا ئەندامە ئەرەمەرزنەرۍ جمېیەرو ئەڎایا پلازا دی مایۆی، کەژەکە پەیامێوە سەرەوەشیش وەڵا کەردۆ.

ئینە دەقو پەیامەکەین:

"پەی ژەنا کۆششکارۍ ئەرژەنتینی و ئەڎایا پلازا دی مایۆی!

هێزی بە خەمێوە قووڵۆ زاناما کە میرتا ئاکونا دی یووە جە ئەرەمەرزنەرا ئەڎایا پلازا دی مایۆی کۆچی حەقەتینش کەرڎەن. پېسە جمېیەرو ژەنا کوردی کەژەکەی جە کەسایەتی قارەمانانەو میراتا ئاکونا دی باراڤالێنە، سەرەوەشی جە گرڎو ژەنا کۆششکارۍ ئەرژەنتینی و ئەڎایا پلازا دی مایۆی مکەرمۍ. هامبەشۍ  خەمیتانمۍ. هەمڕۍ بە قیمەتەما باراڤالە، جە ساڵۆو ١٩٧٧یوە تا ١و تشرینو دووەمو ٢٠٢٤ تەمەنێوە پەڕ جە ئەرەکۆشایش ڕایی کەرڎ. تا کاتو کۆچی حەقەتینیش جە ژیۋاینە بیە بە دەنگو گرڎو ئا ئەڎایا  کە بەمەڵامەتوو ستەم و فاشیزمیوە زاوڵێ و نەوەکێشا بێسەروشۆنۍ بیۍ.

جە حەقەتینەنە سەردەمو کودەتاینە جە ئەرژەنتینەنە ژەنی یووەمین چالاکیی رێکوزیایشا جە دژو پاشێلکارییەکا مافەکا مرۆڤی جە ڕاو پلازا دی مایۆیۆ ئەنجامدا. ئا ئەڎۍ کە زاوڵۍ و نەوەکێشا بە زۆرەملێ بێسەروشۆنۍ کریۍ و پەی زانای چارەنویسو رۆڵەکاشا، رووبەڕوو ناحەقی گۆرەی بیێوە. ئا مڎرامان و ئیراڎە ئیلهامبەخش بۍ پەی ئەرەکۆشای گەلا تەریچ، ئێژا میرتا ئاکونا دی باراڤالە درێژەش بە دۆسایەتی ۋێش چنی گەلوو کوردەسانی و بە تایبەتی ئەڎایا شەممەی دا. داخەم نمەشۆ سەرەڕاو گرڎو رەنج، مڎرامان، ئەرەکۆشای، هەوڵدای، تامەزرۆیی و پەرۆشیشۆ نەتاواش ۋێش بە نەوەکاش بیاونۆ.

سەرەڕاو ئا گرڎو ستەمە گۆرەیە، حەجگیز پاشەکشەش جە ئەرەکۆشای شکۆمەندانەیش نەکەرد. بە ویر، باوەڕ، ئازایەتی و تامەزرۆییوە، بیە بە هێماو ئەرەکۆشای. ئاڎۍ بە غیرەت و دڵسۆزی ۋێشا شۊنەماو ۋێشانە میراتێوە مڎرامانیشا وەشکەرڎ. جە دژو کاربەدەسا، دیکتاتۆرەکا و فاشیستەکا پەی ڕوێوەیچ جە وەرمو ئازادی، دادپەروەری و ناحەقی دوورنەکۆتۆ. ئێمە ئارۆنە پېسە جمېیەرو ژەنا کوردی ڕێوگارۍ ڕا و ئەرەکۆشای حەقیقەتو ئەڎایا پېسە میرتا ئاکنا دی باراڤالێنمۍ. ئێمە جە هەر ساتێوە ئەرەکۆشایمانە خیاڵەکاما پەی ژیۋایۍ دادپەروەرانەی و ئازادی گۆرە مکەرمۍ.

بەڵێ وەرگریکارەو دادپەروەری و ئازادی، دۆسەی بەقیمەتەما حەجگیز تۆ جە یاڎ نمەکەرمۍ. شمە سەلەمناتا کە گۆرەبیەی و گۆرەتەرین پیرۆزبیەی ئەرەکۆشاین پەی دادپەروەری. بێ خەمەبە ئەڎای کۆششکارە، وەرمو ئاواتەکا تۆیچ هۆرگێرمۍ. جە ئەرەکۆشایمانە شمە بە زیڼەیی مازمێوە. ئاڵاو مڎرامانیتا ئینا دەسو ئێمۆ.

ئێمە بە شۆکنایۆ سەرپۆشی چەرمەیما، بە دڵنیاییوە پرسو دادپەروەری سەروزمۍ."