سەرۆکەو فراکسیۆنوو دەم پارتی گوڵستان کیلیچ کۆچیگیتە و شاندێوی یاوەرش بە بۆنەو جەژنەو قوربانیوە سەرێ شارەوانیی گەڤەریشا دا، پەلەمانتار حوسەین ئۆلان و عومەر فاروق هولاکی هامڕێ شاندەکەی بێنێ. هامسەرۆکاو شارەوانیی گەڤەری شۆڕش دری و شادیە قرمزگولە و ئەنداماو ئەنجوومەنی خێرامایشا وەنەو شاندەکەی کەرد.

گوڵستان کیلیچ کۆچیگیتە سەردایەکەنە واتش دەسەڵات موازۆنە گردوو دەسکەوتەکاو گەلوو کوردی بسڕۆوە، نیایرەی قەیومی هیچ ڕەوایەتیێوەش نییەن، ئەگەر پارت و ڕێکوزیێکێ هامکارێ بانە متاومێ ڕا چی ستەمەیە بگێرمێ، واتش: "ئێمە دژوو قەیومی مدرمێوە و مدرامان مکەرمێ. تا لوای قەیومی درێژە بە کۆشیای مدەیمێ. تا شارەوانیی جولەمێرگی نەگێڵۆوە پەی گەلوو جولەمێرگی، ئی کۆشیایە نمەمدرۆ".

ئاماژەش پانەیە کەرد، دژوو دەسملەرەگێرتەی ئیرادەی، بە فروانی جەمێ بیمێوە ئیستەنبوڵنە و واتش: "هەرچیێو بۆ با بۆ، ئێمە سەرێ مگنمێ. تارێخ ئی مدرامانەیە منویسۆوە. تارێخ مدرامانوو گەلوو گەڤەری و جولەمێرگی منویسۆوە. ئانێ ستەم وەنەو خەڵکوو ئێمە مکەرا. هەڵبەت ڕوێو مێ نمەمەنانێ. با کەس گومانەش نەبۆ، ئێمە بەردەوامێ بیمێ جە مدرامانی".