ڕابەر ئاپۆ ماوەو ٤٣ مانگا چێرو سیستەمو گۆشەگیری و ئەشکەنجەو ئیمراڵینە بە بەهانۍ یاساو دیسپلینیوە جە گرڎ مافێوەش بێبەشکریان. دماو ٤٣ مانگا چەمپنەکۆتەیش چنی عومەر ئۆجالانی ئەندامو بنەیانەکەیش کەرڎ و پەیامێوەش پەی ڕای گرڎی تورکیای کیاست و چنەشەنە ئاماژەش پانەی کەردەن؛ گەر هەلومەرجۍ عال بڕەخسیۆ تواناو ئانەیش هەن زەمینەو جەنگی ۋییەرنۆ پەی سەرو زەمینەی یاسای و سیاسی جە تورکیانە.

سەرو ئی مژاریە مافناس و پارێزنەری یاسایی ئەرجان کانار قسێش پەی ئاژانسو هەواڵوو فوراتی (ANF)ی کەردۍ و دەسنیشانش کەرڎ کە نمەبۆ مژارو گۆشەگیری و 'مافو هیوا'ی بۆ بە مژارو سات و سەودای و ئاماژەش پانەیدا کە هەر جە بنەڕەتەنە گۆشەگیری دژ بە بنەماو پیمەرەکا ماندێلایا، چونکی مافو هیوای مافێوە بنەڕەتی ئینسانیا.

کانار ئاماژەش پانەی دا کە مافو هیواو ئازادی تا ئیساتۍ دلۍ ڕای گرڎینە فرە باسنەکریان و دەسنیشانش کەرڎ کە جە ڕوو گۆشەگیری و مافو ژیۋایۆ مافو ئازادی پېسە مافێوە بنەڕەتی مرۆڤایەتی بە تایبەت جە ماوەو ٧٥ ساڵا دماینە قبوڵکریان.

'جگە جە تورکیای سزاو زینانی هەتاهەتایی جە هیچ وڵاتێوە تەرو ئۆروپاینە جابەجێ نمەکریۆ'

کەنار ئاماژەش پەی ئانەی کەرڎ کە مافو هیوای جە ژمارێوە فرە جە وڵاتانە جابەجێ کریان و واتش: "جە وڵاتا پېسە نەرویج، ئیسپانیا، پۆرتوگال، بۆسناو هێرسکینە چڼین ساڵێن سزاو زینانی هەتاهەتایشا مردنان. پۆرتوگال جە سەدەو ١٨ ینە سزای هەتاهەتاییش مردنا. ئیساتۍ جگە جە تورکیای  جە هیچ وڵاتێوە ئۆروپینە سزای هەتاهەتایی جابەجێ نمەکریۆ."

کانار، باسش چانەیچ کەرڎ، باخچەلی جە پەرلەمانەنە دڎانش نیان گۆشەگیری ئیمرالیرە، ڕەجەب تەیب ئەردۆغانیچ جە قسەکاشەنە پەشڕاسش کەردۆ و واتش، دووۍ حەفتۍ چێوەڵی کۆمیسیۆنو پەرلەمانتاراو ئەنجومەنو ئۆروپای پێوەس بە گۆشەگیری پەرسانش کە ئایا گۆشەگیری هەن یان نا، واتەنشا گۆشەگیری نیا، پا جۆرەیچە ۋێشا وستۆ دروۍ.

کانار، باسو جە یۆ شیەی کەرڎ جە مابەینو ڕابەر ئاپۆی  و ماندێلاینە جە پرسو  گۆشەگیرینە واتش، "دماو هەر ناکۆکیێوە جە مابەینو هێزە دژبەرەکانە سەرەنجام ئاشتی پێکئامان. ئیساتۍ ئەگەر گەرەکشانە هەنگامێوە بە ئاراسەو ئاشتیرە بنریۆ مشۆم جە ڕاو چاکسازی جە یاسایۆ ئەنجام بڎریۆ، ئۆجەلانیچ مشۆم هامشێوەو ماندێلای وەڵۍ گرڎ چێوێنە گۆشەگیریش سەرۆ لا پشۆ، یاگۍ عالەش پەی وەشەبکریۆ، دماتەر بەتەمامی ئازاڎ بکریۆ."