نامێ شش کەسا پێسەو پاڵێویاو ورچنیەی سەرۆکایەتیی کۆماروو ئێرانی ئەرەیاونییا و ڕۆو دووەشەممەیوە بانگەشەو ورچنیەی دەسپنە مکریۆ و پاسە دیارا چی ورچنیەیەچنە ڕێژێوی کەموو هاموەڵاتا بەشدارێ بانێ.
ئەنجوومەنوو پارێزنای دەستوروو ئێرانی کۆو نزیکەو ٨٠ کەسانە، کە نامێ وێشا تۆمارە کەردێبێ، نامێ شش کەساش پێسەو کاندیدوو ورچنیەی سەرۆکایەتیی کۆماری پەسەندە کەردە، کە: محەمەدباقر قالیباف، سەعید جەلیلی، عەلیڕەزا زاکانی، مەسعود پزشکییان، مستەفا پوورمحەممەدی و ئەمیرحوسێن قازیزادەی هاشمی، کە پەنجشا باڵوو بناژۆوازوو دەسەڵاتینێ و مەسعود پزیشکیان بە کەسێوی نزیک جە ڕیفۆرموازا مزانیۆ.
جگە لە مەسعود پزیشکیانی و مستەفا پور محەمەدی کاندیدەکێ تەرێ، وەڵتەرێچ ئەزموونوو کاندبییەی پەی پۆستوو سەرۆکایەتیی کۆماریشا هەن.
دلێ ئانیشانە کە ئەنجوومەنەکەی کاندیدبییەیشا ڕەت کەردێوە، مەحمود ئەحمەدی نەژاد سەرۆک کۆماری وەڵینتەر، عەلی لاریجانی سەرۆکی وەڵینتەروو پەرلەمانی و ئیسحاق جەهانگیری یاگەداروو یوەموو حەسەن ڕوحانیی سەرۆککۆماری وەڵینوو ئێرانی موینیانێ.
ئا یەرە کەسە ورچنیەی وەڵینیچنە ڕاشا پنە نەدریێبێ وێشا کاندید بکەرا.
ورچنیەی وەڵێوەختەو سەرۆکایەتیی کۆماروو ئێرانی ٢٨و حوزەیرانینە (هەشتی پووشپەڕ)ی مکریۆ و ڕۆو دووەشەممەیوە بانگەشەو ورچنیەی دەس پنە مکەرۆ.
دماو ئانەیە ئیبراهیم رەئیسی سەرۆککۆماروو ئێرانی ١٩ ئایارینە ڕووداێوە کەوتەیرەیەنە هەلیکۆپتەرەکەشنە مەرد، بە پاو دەستووروو ئا وەڵاتەیە مشیۆ ماوەو کەمتەر جە دووێ مانگانە ورچنیەی سەرۆکایەتیی کریۆ.
تەسەور مکریۆ هامشێوەو ورچنیەیەکاو ئی دماییە کەمتەرین ڕێژەو دەنگدەری بەشداریی ورچنیەیەکەینە بکەرا، بەتایبەتی کە بە ورچنیەیێوی دلێی باڵوو بناژۆوازیی دەسەڵاتی منریۆرە و جگە جە قەیرانە قووڵە داراییەکا، کە بەرۆکەو هاموەڵاتاش گێرتێنە، جە ڕووەو سیاسییچۆ جە سەرەوردای ژەنی، ژیوای، ئازادیینە بڕیایرێوی قووڵ بەینوو فرەو هاموەڵاتا و دەسەڵاتینە وەش بییەن، کە شیمانە نمەکریۆ دەسەڵات بتاوۆ ڕێژێوی وەرەچەم ببەرۆ سەروو سندۆقەکاو دەنگدای.
