جە چوارچێوەو هەڵمەتەو "ئازادی پەی عەبدوڵا ئۆجالانی، چارەسەرو سیاسی پەی پرسو کوردی" ٥٦ کەسایەتیێ ئیتالی کە سیاسەتمەدار، پەڕلەمانتار، هونەرمەند، نوویسەر، پارێزنەر و چالاکوانێ مافەکا مرۆڤیش ئینێ چنە و ٢٥ ئەرەمەرزیێ نامێوەشا پەی خاڤێر بیتیلی سەرۆکو کۆمیتەو وەزیرانو کۆنسەو ئەورووپای (KE)ی گیانان.

 نامەکەنە سەرنج وسیان سەرو هەلومەرجو قورسو گۆشەگیری  ئیمراڵینە، کە ماوەو ٢٦ ساڵان ڕابەر ئاپۆش چنە گیریان، وە جەختکریانۆ جە ڕۆڵو کاریگەری ڕابەر ئاپۆی پەی چارەسەرکەردەو پرسو کوردی. نامەکەدپنە داواکریان کۆمیتەو وەزیرانو کۆنسەو ئەورووپای پەی مسۆگەرکەردەو ئازادی جەسەیی ڕابەر ئاپۆی  بە ئەرکو وێش ورسۆنە.

حەر جە نامەکەنە جەختکریانۆ چانەی بە پاو ئا قەرارەی کە داداگاو مافەکا مرۆڤو ئەورووپای (DMME) پەیوەس بە مافو هیوای ساڵەو ٢٠١٤نە بەرشیینە، ڕاگێرتەو ڕابەر ئاپۆی بە گرڏ جۆرێ پاشلکەردەو مافەکا مرۆڤین. جە نامەکەنە جەخت چانەیە کریانۆ پەنەوازا تورکیا بە پاو قەرارەکەو کۆمیتەو وەزیرانو کۆنسەو ئەورووپای جوڵیۆوە کە جە ١٧-١٩و ئەیلولی ٢٠٢٤نە بەرش لەردەن و ماوەو ساڵیوەش دا بە تورکیای پەی ئانەی بە پاو قەرارو دادگاو مافەکا مرۆڤو ئەورووپای فاڕییای جە یاسا بنەرەتییەکانە بکەرۆ.

'بە ملیۆنان کەسێ داواو ئازاد بییەو ڕابەر ئاپۆی مکەرا'

جە نامەکەنە بە سەرنج وستەی سەرو هەڵمەتەو جەهانی ئازادی ڕابەر ئاپۆی، دەستنیشان کریان جە جەهانەنە بە ملیۆنان کەسێ داواو ئازادی ڕابەر ئاپۆی مکەرا.

جە بەشێوە نامەکەینە ئینە نویسیان: " بە حیچ جۆرێ نمەتاویۆ باس جە گرنگی ڕۆڵو سیاسی بەڕێز ئۆجالانی نەکریۆ جە بەرەپنەداو بە وەڵکەوتەو پرۆسەو ئاشتەوایی بەینو کوردی و تورکی. دماو ئانەی تورکیا سەرنیشتوو عێراقی و سووریایش ئەرەگیر کەرد و درێژە بە ئۆپەراسیۆنە سەروازییەکاش مڏۆنە. جەنگو بەینو کورد و تورکی سنوورو تورکیایش ویەرنان و بییەن بە پرسێوە هەرێمی. چارەسەرکەردەو ئی پرسەی متاوۆنە بۆنە چارەسەری کۆو پرسەکا وەرکەوتوو دلێڕاسەی."

'مشۆم کۆمیتەو وەزیرانی هەنگامەی چالاکە گێرۆنە وەر پەی ئازادی ئێژا ئۆجالانی'

جە بەشێوە تەرو نامەکەینە ئاماژە کریان بە هەوڵە مییاننەتەوەییەکا کە پەی ئازادی ڕابەر ئاپۆی دریان و جەختکریانۆ چانەی داواو ئا هەوڵا پەی ئازادی جەسەیی ڕابەر ئاپۆین. ئاماژە پانەیە دریا ئیتر کاتو ئانەین کۆنسەو ئەورووپای پەی ئازادی ڕابەر ئاپۆی هەوڵێوە جددی  و چالاک گێرۆنە وەر و ئامام: "بەڕێز ئۆجالان چنین جارێ جەختش چانەیە کەردەنۆ گەرەکشا چارەسەرییێ ئاشتیانە بارۆنە ئاراوە. مشۆم ڕا دریۆنە بە ئێژا ئۆجالانی چەمپنەکەوتەی چنی بنەیانەو و پارێزنەرەکاش ئەنجام ڏۆنە و ئازاد کریۆنە تا تاوۆنە پەی ئاردەی ئاراو چارەسەریی دادپەروەرانە و دیموکراتیکی پەی پرسو کوردی هەرمانەکاش بکەرۆ، کە چنین ساڵێن ئا پرسە بەردەوامیش هەن.ئیتر مشۆم کۆمیتەو وەزیرانو ئەورووپای هەنگامێ یاسایی، دیبلۆماسی و سیاسی بنیۆنە پەی  ئازادی ئێژا ئۆجالانی و چارەسەرکەردەو پرسو کوردی بە شێوێوە سیاسی."