سەبارەت بە ئەرەگیرکارییەکاو دەوڵەتوو تورکی ئەرەگیرکەری، گەلوو کوردی ناڕەزایەتیی تەماموو جهانینە بەرموزانە  و گەلوو پانیشتوو کوردستانیچ جە نیشانەدای هەڵوێستی بەردەوامێنێ و نیگەرانێنێ جە دەسەڵاتداراو پانیشتوو کوردستانی، کە بێدەنگییشا ئرمانان وەراوەروو ئەرەگیرکارییەکاو دەوڵەتی ئەرەگیرکەروو تورکینە، چی بارەوە بەختیار مام حەمید، پەی ئاژانسوو فورات نیوز (ANF) قسێش کەردێ. 

' پەی وێپارێزنای جە ئەرەگیرکەری، گەلوو کوردی خەباتی چەکداری و ئایدۆلۆژی مکەرۆ'

  ئەرەگیرکارییەکاو دەوڵەتی ئەرەگیرکەروو تورکی سەروو پانیشتوو کوردستانی، کە بە ئەقڵیەتی ئەرەگیرکاری تاریخییش وەراوەروو گەلوو کوردیوە مکەرۆش، درێژەشا هەن و وەراوەرنە گەلوو کوردی ئینا مدرامانی بەدەوامەنە و سەبارەت پی بابەتەیە بەختیار مام حەمید واتش: " دەوڵەتوو تورکی هەرمانەش سەروو تاونایۆ و دلێنەبەردەی هۆشوو تاکوو کوردی کەردێنە، گەرەکشەن پاسە بە کوردی بکەرۆ حەشا جە شوناس و نیشتمانوو وێش بکەرۆ بە تاونایۆش دلێ گەلای تەرینە باوڕ بارۆ پانەیە کە ئەرەگیرکریێ نییەنێ. پێسەیچ گەرەکشەن کۆشەرا و گەریلاکاو ئازادیی کوردستانی کە لوێنێ کەشەکا پاسە نیشانە بدۆنە کە سەرەشاو وەنە شێویان. ئادێ کوردێوەشا گەرەکەن فکرێ نەکەرۆوە و زوان و خاکوو وێش هۆش بشۆوە، بەڵام دژ بە ئەرەگیرکارییەکاو دەوڵەتی ئەرەگیرکەروو تورکی، کۆشەراو کوردی جە سەرجەموو چینەکانە، بە ئیرادەوە خەباتی چەکداری و ئایدۆلۆژیی مکەرانە."

' گەریلا  پەی ئازادیی کوردی و کوردستانی مگژیانە'

 درێژەو قسەکاشنە بەختیاروو مام حەمیدی واتش: " دژوو سیاسەتوو تاونایوە دەوڵەتی ئەرەگیرکەروو تورک،  تەڤگەروو ئازادیی کوردستانی بە سەرمەشقایەتیی عەبدوڵا ئۆجالانی، کە ڕۆحوو کوردیش زیندە  کەردۆ پەوکای وەختێو باسوو پەرسەو کوردیش کەردە هامڕێکێش شۆکێ بیێ، بەڵام ئاد پەرسەو کوردی  کوردستانەنە زیندێ مکەرۆوە بەتایبەت سەرنیشتوو کوردستانینە، چا قۆناغەنە پەرسەو کوردی مکەرۆ بە واقع. پەوکای چا وەختۆ دەوڵەتی ئەرەگیرکەروو تورکی بە وەرفراوانتەر  جەنگوو بیەی کوردی مکەرۆ. دەوڵەتوو تورکی ئەرەگیرکەری کێشەش چەنی بییەی کوردی هەن، پەوکای هەمیشە ئینا هەوڵێ سیاسەتوو ئەوەتاونای کوردینە. پەوکای وەراوەرنە پەی دۆزوو گەلوو کوردی، گەریلێکێ ئینێ جەنگەنە پەی ئازادیی کوردی و کوردستانی. گەریلا کە بییەن بە ڕاگێر وەردەموو ئەرەگیرکارییەکاو دەوڵەتوو تورکی ئەرەگیرکەرینە، بە تیرۆریست نامێش مبەرۆ. بەڵام گەریلا ئازادەکاو کوردی، ژیواێوی مانادار و پەڕ شکۆ ئاوا مکەران."

ئاخرۆ بەختیاروو مام حەمیدی، باسوو دەورو پەدەکەیش کەرد بە حوکموو یاگێ جوگرافیێوە، کە دەسەڵاتدارا چا هەرێمانە ئەرەگیرکارییش چنەن و واتش: "بەداخۆ پەدەکە پی سیاسەتاشە بییەن بە چەمساقوو ئەرەگیرکەرا. پەدەکە سنوروو وێشنە هامکاریی دەوڵەتوو تورکی ئەرەگیرکەری مکەرۆ.  گەر کورد وێش بشناسۆ خیانەت نمەکەرۆ و وێش نمەورەشۆ و نمەبۆ بە چەمساقوو ئەرەگیرکەرا پەی  دلێنەبەردەی کوردی."