پەڕلەمانتاراو پارتو چەپو سویدی داواشا کەرڎە دمایی بە گۆشەگیری ٢٦ ساڵەو سەرو ڕابەر ئاپۆی بێنە و واتشا: "ئینایمۍ چنی ئەرەکۆشای ئازادی و دادپەروەری گەلوو کوردی و هیواڎارێنمۍ سەرکۆتۍ با."
هەردووە پەڕلەمانتارۍ پارتو چەپو سویدی ، نادییە عەوادە و هاکان سڤینیلیگ جەختشا سەرو پەنەوازی دەسەبەرکەردەی مافەکاو گەلوو کوردی کەردۆ و دواشا کەرڎە کە گۆشەگیری سەرو ڕابەر ئاپۆی لا بریۆ.
'پێوەرە سەرۍ گنمۍ'
نادییە عەوادە ئاماژەش پانەی کەرڎ کە پېسە پارتەکەیشا ئینۍ چنی هۆرگێرتەو گۆشەگیری ٢٦ ساڵۆو سەرو ڕابەر ئاپۆی و پی جۆرە داواش کەردە: "حەزکەرێنمۍ حکومەتو سویدی گرڎو کۆششەکاش پەی دمایئاردەی بە گۆشەگیری وزۆ گەڕ. کەچی سوید چنی تورکیای فاشیستو ئەندامو ناتوی ئینا هامکارینە و داواو دمایئاردەی بە گۆشەگیری نمەکەرۆ". نادییە باسش چانەیچ کەرڎ کە بە گرڎ جۆرۍ هرووژمە ئەرەگیریەکا دۆڵەتو تورکی فاشیستی پەی سەرو ۋەرنیشتی شەرمەزار مکەرا و یاگۍ قبوڵکەردەی نیا، واتیچش ئینایمۍ چنی مافە ڕەواکاو گەلوو کوردی و پێوەرە سەرۍ گنمۍ.
' دژو گۆشەگیری ئەرەکۆشمۍ'
هاکان سڤینیلیگی پەڕلەمانتارو پارتو چەپی و ۋەرپەرسو پەیوەندییەکا جبەرو پارتەکەی ئاماژەش بە گرنگی هەڵمەتەو جەهانی ئازادی پەی ڕابەر ئاپۆی کەرڎ و جەختش کەردۆ چانەی کە لابەردەی گۆشەگیری سەرو ڕابەر ئاپۆی پەنەوازیێوە بنەڕەتییا پەی ئاشتی ۋەرکۆتوو مېیامینی و واتش: "ئەرەکۆشایما پەی دەسەبەرکەردەی مافو زیڼانیا سیاسی بەردەواما و پەی ئانەیچ فشار جە تورکیای مکەرمۍ. پی جۆرە متاویۆ زینانیا سیاسیۍ ئازاڎۍ بکریا و گۆشەگیری سەرو ئۆجالانی لا بریۆ."
لقو جوانا پارتو چەپی پەشتگیری ۋێشا پەی گلێرۆبیەی ٢ۍ تشرینو دووەمی بەربڕی
هەر سەبارەت بە پاڵپەشتیەکا پارتو چەپو سویدی پەی مافەکاو گەلوو کوردی و ئازادی ڕابەر ئاپۆی؛ لقو جوانا پارتەکەی پەشتگیری ۋێشا پەی گلێرۆبیەی ٢ۍ تشرینو دووەمی بەربڕی، کە ستۆکۆڵمەنە پەی ئازادی ڕابەر ئاپۆی ئەنجام مڎریۆ.
