پەڕلەمانتاروو پەدەکەی جە پەرلەمانوو عێراقی مەحما خەلیل ئەرەیاۋنانش، هەرېموو کورڎەسانی هیچ زانیاریېوەش سەرو لەشکرکېشیەکاو تورکیای پەی سەرو خاکو عێراقی بەتایبەتی جە پارێزگاو دهۊکی نېیاو ئا مژارە پەیوەندییش بەحکومەتی فیدراڵییوە هەن.
مەحما خەلیل جە واچێوە رۆنامەوانیینە ئەرەیاۋنانش: هەرێموو کورڎەسانی پەیوەندیدار نییا بە مژاروو دەسوەرداکا تورکیای دلۍ خاکوو عێراقینە و بەتایبەتیی جە مەنتیقەو پارێزگاو دهۆکینە، بەڵکو حکومەتی فیدراڵی بەپاو ماددەو ١٠٩و دەستووری پەیوەندیدارا پا مژاریۆ کە ماچۆ (دەسەڵاتە فیدراڵییەکۍ پەیوەندیدارێنۍ بە پارێزنای یۊبیەی عێراقی و سڵامەتی و سەربەخۆیی و سەروەریی و سیستمی دیموکراتی فیدراڵی).
وەڵتەر عەلاوی بەنداوی، ئەنداموو لوجنەو ئاسایش و ۋەرگیریی جە پەرلەمانوو عێراقینە ئەرەیاۋنابێش: “هێزەکۍ تورکیای جە قوڵایی ٤٠ کیلۆمەترانە دلۍ خاکوو عێراقینە بیەیشا هەن و ئینەیچ پاشێلکاریێوە مەترسیڎاری گەورەن پەی سەروەریی عێراقی”.
حەرپېسە ئاماژەش پانەیچ کەردەبۆ، "ئی دەسدرێژییە نا حەقە هەڕەشێنە پەی سەرو ئاسایشی نیشتمانیی و حەرپۊکەی مشۊم بەشێوێوە خێراو دەموودەسی کۊشش بکەرمۍ پەی دووروستەیۆ ئا هێزا".
سوپاو دەوڵەتو تورکی بە هامکاری پەدەکەی بە درێژایی سەڎان کیلۆمەترا جە سنووروو هەردووە پارێزگاو دهۆکی و هەولێرینە سەرحاڵوو ئۆپراسیۆنی ئەرەگیرین و دەیان بنکە و بارەگۍ سەروازیێش وەشۍ کەردێنۍ.
