پڵاتفۆرموو ھۆرام-ی بۊنەو جەژنەو نەورۆزیۆ ئەرەیاۋنێوەش وەڵا کەرڎۆو ئەرەیاۋناش،" بەیدێ با گردما بە ڕۆحوو ئازادی و مدرامانوو نورۆزیوە بە ئاشتەوایی کۆمەڵایەتی ، پاڕێزنای ژیوگەی و سەرھۆردای جە وەرا وەرو نەیارا ئازادیوە ، ساڵێ تازێ و نەورۆزیما پیرۆز بکەرمێ".
نەورۆز ھێماو ژیوایە ئازاد و مدرامانی جە وەرانوەرو چێر دەسەیی .
"خەڵکوو وەشەویس و ھۆرامانی، ھەر پسۆ فرەو نەتەوەکا تەری نەورۆز پەی ئێمەی ھۆرامی ڕۆ دەسپەنەکەردەی ساڵێ و ژیوایۍ تازەین . بەلام ئانەی کە نەورۆزو ئێمە چەنی نەتەوەکا تەری جیا کەرۆوە، مانا و شێوەو یاد کەردەیۆ نەوڕۆزیا .پەی خەڵکێ کە زوان و ئاو و خاکش، فەرھەنگ و ژیوایش بە بۆنەو دەسەڵاتە ئەرەگیرەکاوە ڕوەو فۆتێای ملۆ، ماناو نەوڕۆزی پەیش جیاوازا . پەی ئێمەی ھۆرامی کە ڕۆ بە ڕۆ بە شێوە جیا کە سیاسەت و ئینکار و ئەسڕیەیۆ جە وەرانوەرمانە بریۆ ڕاوە، نەورۆز ڕۆو سەرھۆردای و مدرامانیا جە وەرانوەروو دەسەڵاتە مڵھۆڕەکانە .
مشۆم ئاگاما چانەی بۆ کە نەیارێ ئێمە کەمێ نییەنێ، ھەر یۆشا بە شێوەیێوی تایبەت گەرەکشەن ویر و بیەو وێشا سەروو ویر و ژیوایو ئێمەوە چەسپنا . بە تایبەت جە ماوەو چن ساڵی ویەردەنە بە بۆنەو ئەژناسیاو ھۆرامانی جە لاو یۆنسکۆیەوە ، مەحالەکەما چێروو نامێ توریستی و گێڵیاری، زیاتەر جە جارانی مەتەرسی فۆتیای و تێکدای تایبەتمەندیەکاش ھەن .
پسۆ پڵاتفۆرموو ھۆرام-ی سەرەڕاو پیرۆز کەردەی و سەروو ساڵێ و نەورۆزو ئازادی، داواما ئانێنە کە خەڵکوو ھۆرامانی ، ڕۆشن ویرێ ، ژەنا ، جوانا و ڕێکوزیا مەدەنیەکا بە ڕێکوستەی وێشا، پەی پارێزنای تایبەتمەندیەکا ھۆرامانی ھەنگامە بنیا .
جە وەختێ پسۆ ئارۆینە کە وەرکەوت و دڵێراسەی ئالوو گۆڕی خێرا بە وێشۆ وینۆ . گرد لایە مشۆم وێش بە ئەرکدار وینۆ و ئاگاشا چەنە بۆ کە چێروو نامە جیاوازەکاوە ڕاسی ژیوای مەحەلەکەیما چاڵی نەکریۆ . بەیدێ با گردما بە ڕۆحوو ئازادی و مدرامانوو نورۆزیوە بە ئاشتەوایی کۆمەڵایەتی ، پاڕێزنای ژیوگەی و سەرھۆردای جە وەرانوەرو نەیارا ئازادیوە ، ساڵێ تازێ و نەورۆزیما پیرۆز کەرمێ".
