شەنگالەنە دماو مڎرامانی بە سەرمەشقایەتی ژەنا و جوانا، هێزەکۍ سوپاو عێراقی دەوروبەرو سەعات ٢:٠٠ ۍ شەوۍ ناچارۍ بیۍ کیشیاوە. بەڵام ۋەروئانەی ژمارێوە جەنگەوانۍ زامڎارۍ و دیل کریۍ ئازاڎۍ نەکریێنۍ، مڎرامانوو گەلی بەردەواما.

بەپاو ئا زانیارییا جە ئیدارەو ۋېڕاوەبەری شەنگالی و هێزەکاو پارېزنای شەنگالیوە هۊرگیریێنۍ، جە ئەنجامو مڎرامانو گەلینە، سوپا ناچاربیەن چنی ئیدارەو ۋېڕاوەبەری شەنگالی و ۋەرپەرسا یەبەشەی کۊبۆوە.

هەر بەپاو زانیارییەکا، دماو گلېرۊبیەکاو هېزی شەوۍ، سوپا قەرارش دان ئیتر سەروازۍ ڕووانەو شەنگالی نەکەرۆ و ئا هێزێچە چا بێنۍ کیشنۊشاوە. پی مەڵامەتۆ، چالاکی سەرەمڕەو ڕاوەبەرایەتی هەواڵگری دمایش ئاما.

سوپاو عێراقی جە ١٨ و ئادارینە جە گەڕەکەو یەرموکو شەنگالینە هرووژمش کەرڎ و پا مەڵامەتۆ ٣ جەنگەوانۍ یەبەشەی زامڎارۍ بیۍ و ٥ جەنگەوانۍ باڵبەسۍ کریۍ. دماو هرووژمەکەی جە ١٩ و ئاداری خەڵکو شەنگالی بە سەرمەشقایەتی ژەنا و جوانا مڎرامانشا دەس پنە کەرد.