بەپاو هەواڵێوە جەمەو مافوو مرۆڤوو کورڎەسانی ڕۊو یەکشەممەی لەیلۍ پایمەردە خەڵکەو پیرانشاری دماو چوار ڕووا مەنەیۆی جە خەسەخانەو ورمێنە بە مەڵامەتوو فرەیی رێژەو سۆتەکەیشۆ عەمرەو خوڎایش کەردە.

ئاماژە پانەیچ کریان، ئا ژەنۍ کە ئەڎاو دووۍ زاوڵا بیێنە، بە مەڵامەتوو کێشەی خێزانییوە ڕۊو یەرەشەممەی حەفتەی ۋییەردەی جە تەرەفوو هامسەرەکەیشۆ بە نامۍ (م.ر) جە یانە باخەکەشانە ئێرش ۋەردریانەنە و دماتەر پەی چارەسەری ئا ژەنۍ فاڕیێبېوە پەی خەسەخانەو خومەینی.

بەپاو زانیارییەکا هامسەروو ئا ژەنۍ دماو ئانەی بە سۊتەیی لەیلۍ پایمەردەش ۋەردەموو یانەو تاتەیشەنە جیائاستېنە، بەرەو شۊنېوە نادیاری بڕەمان و هەڵای نەگیریان.

یاگۍ ئاماژەینە وەڵتەر پارتوو ئازاڎیی ژەنا کورڎەسانی (پاژک) و گلېرگەو ژەنا کورڎەسانی (کەژەکە) هەڵمەتێوەشا پەی ۋېڕێکوستەی و ۋێپارێزنای ژەنا دەسپنەکەردەبۍ و باسشا چانەیچ کەردەبۍ کە ئینە تەنیا گرنتیکاروو پارێزنای ژەنان جە ۋەرا ۋەروو هجوومە بەردەوامەکا پیاسالارینە و چا چوارچێوەیچەنە داواشا جە ژەنا کەردەبۍ پەیوەسۍ با پا کەمپینەیۆ.