کۆمیتەو ئیکۆلۆژی پارتوو ژیۋای ئازاڎیی کوردسانی (پەژاک) سەبارەت بە ئێرکەوتەیۆکا ئی دماییەو لەوەڕگا و دارسانەکا چن مەنتیقېوە پېسە جوانرۆی و پاوەی جە ۋەرکۆتوو کورڎەسانی ئەرەیاۋنېوەش وەڵاکەردۆ. جە ئەرەیاۋناکەینە سەرەڕاو جەختکەردەیۆ سەرو بڕۍ مەڵامەتا گوماناوی جە کۆتەیۆ ئی ئێرانە داوا جە کۆمەڵاو خەڵکی جە ۋەرکۆتوو کورڎەسانی و چالاکا ژیۋگەپاڕێزنی کریان کە چا بارۆ هەڵوێسشا بۆ.

ئەرەیاۋناکەو پەژاکی پی جۆرەنە:

"چنی نزیکبیەیۆ فەسڵوو هامنی، جارێوەتەر دارسان و لەوەڕگاکۍ مەنتیقە جیاجیاکاو ۋەرکۆتوو کورڎەسانی رووبەڕوو ئێرکۆتەیۆ مباوە کە بڕۍ دەسۍ و مەڵامەتۍ گوماناویېشا ئینۍ پەشتیۆ، حەرپۊکەی ۋېڕېکوستەی گەلی پەی کۆنترۆڵکەردەی ئا ئېرکۆتەیۆ و پارېزنای ژیۋگەی، بیەن بە پێویسی. فرەو ئی ئێرا بە مەڵامەتوو سەرنجوو ئەمنیەتوو سیستموو کاولکاری ئێرانیوە ڕووەمڎا و پێویسا جە ڕاو هەڵوێسېوە کە گەلی بە بنەما مگېرۆ ۋەرنگارۍ ئانەی بیمېوە.

جە رۆو پەنج شەممەی ١٧و جۆزەردانیوە (٨و حوزەیران)ی زنجیرېوە ئێرکۆتەیۆ جە لەوەڕگا و دارسانەکا مەنتیقەکا جوانرۆی و پاوەینە ڕووەشا دان، بەڵام سیستموو دژە ئیکۆلۆژی ئێرانی کەمتەرین لایچش چا رووەدایا نەکەردەنۆ. جە سایەو کۊشش و رێکوزیا مەدەنیە ژیۋگەپارێزنەکا و چالاکا ژیۋگەیی ئا ئېرۍ کۆنتڕۆڵکریېنۍ. دیارە کە سەرنجوو ئەمنیەتوو رژێمی و بیەی دەسی شاراوەی ساڵانەی مەڵامەتوو کەوتەیۆ ئی ئێرانە. ئێرکۆتەیۆکا ڕووانی ۋییەردەی جە دارسانەکا جوانرۆی و پاوەیچ پی مەڵامەتۆ ڕووەشا دان و بەردەوامېنۍ. ئی سیاسەت و کردەوا رژێمی تەنیا بە گېرتەی ۋەروو هەلوێسی و چالاکی بێ مردای هێزەکاو گەلی و چالاکا ژیۋگەیی و حەرپاسە بە ۋېڕاگری و پاگیری رەواو رێکوزیا ژیۋگەییە مەدەنییەکا پوچ مکریۆوە.

کۆمیتەو ئیکۆلۆژی پارتوو ژیۋای ئازاڎیی کوردسانی (پەژاک)  سەرەڕاو شەرمەزارکەردەی بیەو دەسی شاراوەی چی ئێر کۆتەیۊیانە و کەمتەرخەمی ئەرەمەرزیا حکومیەکا، داوا جە رێکوزیا مەدەنیە ژیۋگەپارێزنەکا، چالاکا ژیۋگەیی و توێژ و کۆمەڵا خەڵکی مکەرۆ کە پەی کۆنترۆڵکەردەی و کوشنایۆ ئێرەکا کۊششا بوزانە گەڕ و ۋېڕېکوستەی گەلی کە مافێوە دیموکراتیکا زیاتەر پەرەپنە بڎا. پێویسا گەلەکەما بە بێ حیج چەمەڕایۍ جە رژێمێوە کە ۋېش مەڵامەتوو دلېنەبەردەی ژیۋگەین، هەنگامە بنیۆ، حەرپۊکەی سەرەکیتەرین ڕا پەی ۋەرەنگاربیەیۆ ئا مەڵامەتا کە ئینۍ پەشتەو ئێرکۆتەیۆ جە دارسان و لەوەڕگەکانە، برەوداین بە ۋېڕېکوستەی دیموکراتیکی گەلی و بەقوەتکەردەی یۊبیەی و یەکڕیزی".