ئانزانێو کە بە شێوازێوی سیستێماتیک و بە تایبەت چەنی مووزیکی وێش ڕەتنۆ و هۆرپڕۆ، نەتەنیا قازانج بە جەسەیش و لەشساقیش یاونۆ، بەڵکو شۆنەمایە ئەرێنیە سەروو ڕەوانیچشەو منیۆرە. هۆرپرای هەرپاسە وێڕەتنایێوی (وەرزشێوی) سالمەن و پەی کارکەردوو مەژگیچ سوودمەنڎەن.

دیارەن پەجۆریێ زانشتیێ فرێ کریانێ سەروو قازانجەکاو هۆرپڕای، من چیگەنە ئاماژێوی کورت کەروو بە چوار چا قازانجا:

یوە: هۆرپڕای فۆرموو جەسەی ڕێکوپێکتەر کەرۆ بە بێ ئانەیە گوشارێوی پاسنە وزۆ سەروو ئەنڎامەکاو جەسەی. بە واتەو پزشکا ھۆرپڕای پەی پەشتئێشای و بڕبڕێ مازی خاسەن.

دوێ: هۆرپڕای پاڵوو قازانجی جەسەیینە پەی پەروەرش و کارکەردوو مەژگیچ قازانجش هەن. پەیجوریە پزشکیەکا سەلەمنانشا کە جەسەو ئانزانی جە دوێ حالەتێنە تاوۆ شانێ(سلول) تازێ بەرهەم بارۆ: وێڕەتنای، کە هۆرپرای وێش وێڕەتنایوەن. تاقیکەردەێ(تجربیات) تازێ، هۆرپڕای و وێڕەتنای با بە هۆکاروو وەشحاڵی و هەستی ئەرێنی ئانزانی.

یەرێ: هۆرپڕای سترس(فشاری ڕەوانی) کەم کەرۆوە. بە هۆرپرای چەنی موزیکی جەسە سووک بۆ ڕەوان سەیۆوە. هۆرپڕای هۆرمۆنێ شاڎی(Dopamin, Serotonin ،Endorphin) وزۆ ھەرمانە و ھۆرمۆنێ سترێسی ( Kortisol)کەم کەرۆوە. پەیجۆرێێ عێلمێێ سەلەمنانشا کە هۆرپڕای یۆ جە چارەسەرەکاو خەمۆکین.

چوار: هۆرپڕای جەمی(بە کۆمەڵ) پێسەو ڕەشبەڵەکی و.... بۆ بە هۆکاروو درووسبیەی هەستوو یۆگێرتەی و بە هێزبیەی هەستی جەمی و ھەرپاسە تاکەکا بە یۆوە گرێ مڎۆ. ھۆرپڕای جە ڕاسیەنە ئەوەجێوە ئانزانین. ئەوەجە بە ھۆرپڕای جە گردوو کۆمەڵگاکانە و بە فەرھەنگێ جیاوازێوە ھەستش پەنە کریان و جە بۆنە جۆراجۆرەکانە لوان ڕاوە و ئیسەیچ ملۆ . یاگێ سەرنجینە کە ھۆرپڕای درێژایی ویەردەو ئانزانی بیەن و جە نەوێوە پەی نەوێوەتەری فاڕیانەو و بیەن بە بەشێو جە فەرهەنگوو ئانزانیەتی. ئی فەرهەنگە بێ گومان جە ئایەندەیچەنە پەی نەوەی تازەی فاریۆوە.