ئەنداموو کۆمیتەو جوانا پەکەکەی ئۆزگور شەڕکەر ئەرەیاۋناش تەنیا ڕاو مدرامانی دژ بە فاشیزمی، چالاکییا، واتش: "ئێمە تەنیا باسوو چالاکی جاڎەکا مەکەرمۍ، پەروەردە و ڕێکوستەیچ چالاکییا. ئینە گرڎ خزمەتوو چالاکی ئېژاتەر مکەرۆ".
ئەنداموو کۆمیتەو جوانا پەکەکەی ئۆزگور شەڕکەر دەربارەو ئاژەو جوانا پەی ستێرک تیڤی دوا.
شەڕکەر ئەرەیاۋناش بە ئاشکرا تەکنەلۆجیا بەکارمۍ، تا گلېرگەی جە پرسە گلېرگەییەکا دوور بوزۊوە، تاوەکو بکەرۊش بە ڕۆبۆتێوە و تام و حیچی نەکەرۆ، تەکنۆلۆجیا بەکاربەرۆ.
ئۆزگور شەڕکەر واتش: "پێویسا جوانۍ کە تەکنیک بەکاربەرا جە ۋېشا پەرسا: ئاخۆ ئی تەکنیکە دەردەو چېشی موەرۊ، من ئاڎیی بەکاربەرو یان ئاڎ من بەکاربەرۊ. ئەگەر پەی لایەنە بەکاربەرەکا ۋېش بەکاربۍ، جیهان نەگنۍ دلۍ ئی ئاژەیۆ. بەڵام قەیرانەکۍ جە جیهانەنە لاو گرڎ کەسیۆ موینیا. جوانېوە ٢٠- ٢٥ ساڵی جە چن ڕووېوە نەزانا، ئەگەر جیامەنۆ مەتاوۆ بە تەنیا بژیۋۆ. ئەگەر ئی تەکنیکە جوانش وستەبۆ ئی حاڵۆ پەنەوازا جوانۍ جە ۋېشا پەرسا: ئی تەکنیکە چڼۍ من ئازاڎ مکەرۊ، چڼۍ ئازاڎ بوونە، مشۊم سەرو منەرە سەروەر نەبۆ، مەبۆ بوو بە کۆیلەو ئامرازەکا، بەڕاسی ئەگەر من ئازاڎ بوو، پێویسا قەرار بڎەو کە پەی چېشی بەکارش باروو، مەبۆ ڕا بڎەو ئامرازەکۍ بەکارم بارا".
ئۆزگور شەڕکەر سەرنجش وست سەروو سیاسەتوو دەوڵەتوو ئەرەگیروو تورکی پەی سەرو جوانا کوردسانی و واتش: " دەوڵەتوو تورکی هەمیشە سیاسەتوو جەنگی تایبەتی دژوو ژەنا و جوانا و گەلو کوردی و گەلاو تورکیای بەرۊڕاوە. دەوڵەتوو تورکی هەر جە ئەرەمەرزنایشۆ پی جۊرەبیەن، ڕابەر ئاپۆ ئی حەقەتینەشە بە قووڵی نیشانە دا و ئاشکراش کەرد. دوژمن ئا سیاسەتا فرەتەر سەروو گەنجاو کوردسانی پەیڕەو مکەرۆ. بە فرەیی جە ڕاو وەرزشی و چاندی و فێستیڤاڵیوە ئی کاریە مکەرۆ. سیستموو سەرمایەداریچ ئینەی مکەرۆ، جددیتەرین هجووم جە بوارو چاندینە مکەرۆ. کوردێوە ئازاڎ حەجگیز پېسە کوردێوە نۆکەری مەبۆ، حەجگیز پېسە هەمان چاندی مەبۆ. فیکرو فاشیزمی و سۆسیالیزمی حەجگیز مەبا بە یۆ. هەر پۊکەی نزیکایەتی دەوڵەتەکا جابەجێکەردەی تاونایۆ و دلېنەبەردەی گلېرگەیا".
هەر جە درێژەو قسەکاشەنە شەڕکەر ئەرەیاۋناش ئەرەکۊشای جوانا جە سەرنیشتوو کوردسانی ڕېخەو بنەڕەتی شۆڕشەکەیشانە و واتش: "بەهاو ئەرەکۊشای جە سەرنیشت دلۍ کۊشیای ئێمەنە فاڕیۆ پەی تۊفانی، ئی جۆرە کاریگەرییەشە هەن، چونکی ڕەگوو ئەرەکۊشای ئێمە ئینا چا، جواناو سەرنیشتی مەبۆ تەنیا پېسە جوانا سەرنیشتی ۋېشا بوینا. پێویسا ۋېشا پېسە جوانا چوار پارچەو کوردسانی بوینا و چنی ئی ۋەرپرسیاریەتیە ئەرەکۊشا. سەرهۊردای جە هۊرچنیەکا سەرنیشتی و جە وان و شارەکا تەروو کوردسانینە ڕێبازێوە تازەو سەرهۊردای بۍ. ژەنا و جوانا کوردی سەرمەشقۍ ئی سەرهۊردایە بیېنۍ. ئینە تەنیا پەیوەس نیا بە هۊرچنیەیۆ، چن ساڵېوەن مدرامانۍ چامنە جە کوردسانەنە هەن.
ئەڎایاما چن ساڵېن چنی هەلومەرجەکا، چنی بێ دەرفەتیییەکا، بە بەقوەتی ۋېشا مدرامان مکەرا، جە زیڼانەنە مدرامان هەن، گەریلاکاو کوردسانی ٢٤ سەعاتە بێ مردای مدرامان مکەرا. ئەرەکۊشای جە ئاکاموو ئی پېوەرەبیەینە وەڵۍ کەوت.
بێگومان مدرامان نیا ئاستوو پێویسینە، بەڵام جارێوەتەر بەرکۊت وەختارۍ پېویس بۆ متاویۆ بیاوۆ ئی ئاستە. وان و شەرناخ و جولەمێرگ و گەڤەر نیشانۍ ئینەینە. بەڵام وەختۍ تەمەشەو هجوومەکا دوژمنی مکەرمۍ جوانۍ سەرنیشتی ئینۍ ئاژېوەنە شیاوو ڕەخنەداینینۍ. چونکی تەنیا ڕاو ئەرەکۊشای دژوو دەوڵەتوو فاشیستی تورکی، ئەنجامدای چالاکییا. ڕێبازێوەتەر ۋەرا ۋەر بە فاشیزمی نییا. ئێمە تەنیا باسوو چالاکی جاڎەکا مەکەرمۍ، پەروەردە و ڕێکوستەیچ چالاکیین، گرڎ ملانە خزمەتوو چالاکیېوە ئېژاتەریۆ. تەنیا یەک ئشناسنامەو جوانا ئاپۆیی هەن، ئاڎیچ چالاکییا. بەڵام ئێمە مەتاومۍ بواچمۍ گرڎ چېوۍ چالاکییا، خوڕیەو ۋنەو پاسکیلی چالاکی نییا، ڕاپیمای ٥-١٠ کەسی چالاکی نییا، ڕێکوستەی بڕەمای وەڵېکۊتەی چالاکی نییا. پێویسا جوانا سەرنیشتی ئەوەکۊڵیای بکەرا، جە ماوەکا ۋییەردەینە چ جۊرە چالاکیېشا کەردەن. ئا وەختیچە پېسە ئیسەی چالاکی بۍ. ئانۍ بە ۋېشا ماچا جوانا ئاپۆیی پێویسا جە ڕێبازو جوانا سەرنیشتی و تورکیای ئەوەکۊڵاوە، جە وانەنە ئاشکرا بی هێزوو ۋېش هەن. جە شەرناخەنە گەلەکەما بە دار و تەوەنی لوتەو دەسدرێژیکاراشا ماڕا. ئی ئیرادە و هێزە هەن".
شەڕکەر ئاماژەش کەرد بە گرنگی پارېزنای شۆڕشوو ۋەرنیشتی، واتش: "دەوڵەتوو تورکی جە چوارچێوەو پلانەکا ۋېشەنە پەی تەسفیەکەردەی و پاکتاوکەردەی هجوومی دڕندانە مکەرۆ سەرو ۋەرنیشتی. بە ڕێبازی پیس و قیزەون هجووم مکەرۆ سەرو ۋەرنیشتی. گەرەکشا شۆڕشوو ۋەرنیشتی بێ چاند و ڕۆح بازۊوە. متاومې تەماشەو جوانا ۋەرنیشتی و سەرنیشت و ۋەرکەوتوو سوریای بکەرمۍ، چونکی ئاستوو جوانا چن بۆ، ئاستوو شۆڕشیچ ئانڎەن.
پۊکەی مشۊم شۆڕشوو ۋەرنیشتی گۊرە بکەرمۍ. پێویسا بە ڕێبازو ڕابەر ئاپۆی جمېوە. پارادایموو ڕابەر ئاپۆی زیاتەر لە هەر یاگۍ تەری مشۊم جە ۋەرنیشتەنە پیادە بکریۆ. جوانا ۋەرنیشتیچ مشۊم ئینەی پېسە ئەرکی بنەڕەتی بۋینا. ڕابەر ئاپۆ ئەرکوو سەرمەشقایەتی شۆڕشیش بەخشا بە ئێمە، سەرمەشقایەتیچ واتە ۋەرپەرس بیەی جە گرڎ چېوۍ. پێویسا جوانا ۋەرنیشتی چەمەڕاو حیچ چېوۍ جە بەری نەکەرا، جیهانێوە چامنە بیەیش نییا. پێویسا باوەڕیما بە هێز و ئایدۆلۆجیاو ۋېما بۆ. بە قەناعەتوو من پێویسا جە کۆنفرانسەکانە ئی چېوا تاوتوێ بکەرا".
