هامسەرۊکو یۊبېیەی پارێزنەراو کانتۆنو جزیرەی جوان محمەد ئەرەیاۋناش گۊشەگیری ئیمراڵی تاۋانەنە دژ بە مرۊڤایەتیی و چی ڕوانگۆ سی پی تی بەهیچ جۊرۍ ئەرکوو ۋېش پەی پارێزنای مافەکا مرۊڤی بەیاگۍ نەیاونان.
ڕابەروو گەلوو کوردی عەبدوڵا ئۆجالان زیاڎ جە ٢٥ ساڵان دوورگەو ئیمراڵینە بە پیلانگێڵنیېوە میان نەتەوەیی ئینا گۆشەگیریینە. مەراموو پیلانگێڵنا پەی دلېنەبەردەی پارادایمی و فکر و فەلسەفەکەیش بۍ، کە تەنیا هیواو مرۆڤایەتییا پەی ڕزگاربیەی جە وێرانکارییەکاو سیستمی سەرمایەداری. ئاستوو گۆشەگیری ئیمراڵینە گرڎوو وڵاتا بێدەنگێنۍ و سی پی تیچ پېسە ئەرەمەرزیېوە یاسایی چا ڕوانگۆ هیچ هەنگامېوەش نەنیێنە جە دژوو بێ یاساییەکاو دەوڵەتوو ئەرەگیروو تورکی، پەیوەس بە مژاروو گۆشەگیری سەرو ڕابەروو گەلوو کوردی عەبدوڵا ئۆجالانی، هامسەرۆکوو یۊبیەی پارێزنەرا کانتۆنوو جزیرەی جوان محمەد پەی ئاژانسیما قسێش کەردۍ.
'بە پاو ڕێساکا گۆشەگیری قەڎەغەن'
جوان محمەد ئانەش ئاشکراکەرد کە دەوڵەتو ئەرەگیروو تورکی دژوو گرڎوو ڕێساکاو مافەکا مرۆڤی مردۊوە و پی جۊرە دەسش بە قسەکاش کەرد: "جە ڕوانگەو ئێمۆ پېسە پارێزنەرا ۋەرنیشتی، گۆشەگیری سەرو ڕابەروو گەلوو کوردی بە گرڎ جۊرۍ دژوو ڕێسا و یاساکا مافەکاو مرۆڤیا. جە ڕوو یاساکاو مافوو مرۆڤیوە ڕاش نمەبۊوە. بە پاو مادەو ١، ٣ و ٧و مافەکا مرۆڤی، گرڎ کەسێ مافوو ئازاڎیی ژیۋایش هەن جە جیهانەنە و نمەبۆ ئازاڎیی حیچ مرۆڤێوە سەرکوت بکریۆ. یانی جە گرڎوو یاساکاو مافەکا مرۆڤینە دڎان بە مافوو ئازاڎیی گرڎ مرۆڤێوەرە نریان.
جە ڕوو مافوو زینڎانیکریایایچۆ گرڎ زینڎانیێوە مافو چەمپنەکۊتەیش هەن چنی بنەیانەکەیش، دۆس و پارێزنەراش و نمەبۆ جە چەمپنەکۊتەی بڕیۊرە. کەچی ئی گرڎ ڕێسایۍ مافەکاو مرۆڤی ۋەرا ۋەر بە ڕابەروو گەلوو کوردی جابەجێ مەکریۊ."
'پێویسا ڕابەروو گەلوو کوردی ئازاڎ بۆ'
جوان ئاماژەش پانەی دا بەپاو گرڎوو ڕێساکاو مافەکا مرۆڤی، گېرتەی ڕابەروو گەلوو کوردی عەبدوڵا ئۆجالانی تاوانەنە و پی جۊرە بەردەوام بۍ: "پێویسا ڕابەر ئۆجالان ئازاڎ بۆنە. دەوڵەتوو تورکی یاساکا مافو مرۆڤی پاشێلۍ مکەرۆ. بە پاو گرڎ پێوانە و ڕێسا و یاسېوە پێویسا ڕابەر عەبدوڵا ئۆجالان ئازاڎ بۆ. پۊکاتی ئێمە پېسە یۊبیەی پارێزنەرا جە کانتۆنوو جزیرەینە داوا جە گرڎ کەسێوە یاسایی، سی پی تی و مافەکا مرۆڤی مکەرمۍ جە ۋەرا ۋەروو گۆشەگیری ئیمراڵینە بە ئەرکوو ۋێشا هۊربېزا. سی پی تی گرڎ چېوۍ مزانۆ، بەڵام بە ئەرکوو ۋێش پەی پارېزنای مافەکا مرۆڤی هۊرمەئېزۆ. با پەی گرڎوو جەهانی ئاشکرابۆ کە پێویسا ڕابەر عەبدوڵا ئۆجالان دلۍ گەلەکەیشەنە ژیۋای بکەرۆ و دمایی بە گۆشەگیری بێنە."
