ڕاوەبەرایەتی تەڤ-دەمی ئەرەیاۋناش، جە ١٠ەمین ساڵیاڎو رۆو جەهانیی کۆبانێنە مەترسیییەکۍ سەرو دەسکۆتەکا هەرێمەکەی ڕووە جە بەرزبیەیۆ مکەرا و پەی پەشتیوانی جە شۆڕشو ۋەرنیشتی بانگەوازێوەش ئەرەیاۋنا.
جمېیەرو گلێرگەی دیموکراتیکی (تەڤ-دەم)ی بۆنەو ١و تشرینی دووەمی ڕۆو جەهانیی کۆبانێوە ئەرەیاۋنێوەش وەڵا کەرڎۆ.
جە ئەرەیاۋناکەینە ئانە یاڎ وزیانۆ، کە چەتەکۍ داعشی جە ١٥و ئەیلولو ٢٠١٤ ینە بە هامکاری هێزە دەرەکی و هەرێمایەتیەکا، دژو شۆڕشو ١٩و تەموزو (٢٠١٢)ی پەلامارەو کۆبانێشا دا و دۆڵەتو تورکیچ بە گرڎو توانایشۆ پەشتیوانیش چا چەتا کەردەبۍ.
جە درێژەو ئەرەیاۋناکەینە ئانە وزیان ڕووە کە سەرو بانگەوازو سەفەربەری و ئامادەیی ڕابەر عەبدوڵڵا ئۆجەلانی، جە تەمامو کوردەسانی و جەهانیوە شۆڕشگێڵنا، دیموکراسیوازا و ئاشتیوازا کۆتۍ ۋۍ و هۆرئێستۍ سەرو پەیا و پی جۆرە درێژە بە ئەرەیاۋناکەی دریان: "جە کۆبانێنە مڎرامانێوە تاریخی نیشانەدریا. خیاڵە پیلانگێڵنیۍ و فاشیستیەکۍ تورکیای دلێنە بریۍ. سەرو خاکو کۆبانێنە مرۆڤایەتی پارێزیا. ۋەرو ئانەیچ بە دەیان براوۍ خەڵاتو نۆبڵی، تاریخ نویسۍ، فەیلەسوفۍ، نوێنەراو ڕێکوزیا مەدەنییەکا، کەسایەتییە نامیەکۍ جەهانی، ١و تشرینو دووەمو ٢٠١٤یشا پېسە رۆو ۋێنیشاندای و پەشتیوانی جە قەڵاو مڎرامانوو کۆبانێ بەنامۍ کەرڎ. جە سەرانسەرو جەهانینە ملیۆنان ئینسانۍ مجیێرە مېڎانەکا، کۆبانێ فاڕیا پەی شارێوە جەهانی. جەهان یاوانە کە کۆبانێ پەی بەها مرۆڤایەتییەکا پارێزگاری و داکۆکیش جە دیموکراسی و ئاینڎەی مکەرۆ".
جە دما دمایی ئەرەیاۋناکەینە سەرنج وزیان سەرو ئانەی کە جە ١٠ەمین ساڵیاڎو ١و تشرینی دووەمینە، مەترسییەکۍ سەرو دەسکۆتەکا مڎرامانوو کۆبانێ بەردەوامێنۍ و ئی بانگەوازە کریان: "دیسان چەمۍ ئەرەگیرا، چەتەکا و پیلانگێڵنا ئینۍ سەرو دلێنەبەردەی دەسکۆتەکا کۆبانێ و ۋەرنیشتوو کوردەسانی. ئێمە داواو قەوەتکەردەی هامپەشتیی جەهانی پەی ۋەرنیشتوو کوردەسانی و دەسکۆتەکا گەلا جە سەرنیشتو ۋەرکۆتوو سوریای مکەرمۍ. ۋەرنیشت پەی مرۆڤایەتی ۋێڕاگریش کەرد، پەنەوازا مرۆڤایەتیچ خاوەنداری جە ۋەرنیشتی بکەرۆ".
