دەزگاو مافوو مرۆڤوو تورکیای (TIHV) کە کار سەرو ڕا گېرتەی جە ئەشکەنجەی و چارەسەری و چاکسازی ئا کەسا مکەرۆ کە ئەشکەنجە کریېنۍ، "گوزارشتەو ناوەندەکا چارەسەری و چاکسازی ٢٠٢٣"ێش وەڵاکەردۆ.

بە پاو گوزارشتەکۍ؛ جە ساڵەو ٢٠٢٣ێنە ٧٣٩ کەسۍ بە مەڵامەتوو ئەشکەنجەی و مامەڵەی خراپیۆ و ٤٢ کەسېچ بە مەڵامەتوو ئانەی جە تەرەفوو کەسوکاریشاوە ئەشکەنجەکریێنۍ، جە تەرەفوو ناوەندەکەیشاوە چارەسەریشا پەی کریان. ژمارەو داواکاریی چارەسەریی کە بەمەڵامەتوو ئەشکەنجەی و مامەڵەی خەراپیوە جە ماوەو ١٠ ساڵا ۋییەردەینە جە TİHV داواکاریشا تۆمار کەردەن ٧ هەزارۍ و ٥٤٨ داواکاریێنۍ، ژمارەو داواکارییەکا جە ساڵەکا ١٩٩٠ ینە کە ناوەندەکە ئەرەمەرزیان، تا ئیساتۍ یاوان بە ٢١ هەزارۍ و ٨٩٤ کەسۍ. بەپاو گوزارشتەکۍ ئەشکەنجەدریێکۍ جە تەمەنوو ٧  ساڵانیوە دەس پنەمکەرۆ.

ڕاوەبەری پۆلیسوو ئەستەنبوڵی ئینا پلەی یووەم و ئا یاگانە کە گیریایەکۍ چنەشەنە ئەشکەنجە کریېنۍ، حەرپاسە دماتەر مودیریەتوو پۆلیسوو ئامەدی، ئەنقەرەی و وانی ئینۍ پلەی یووەمەنە.

جە دمادمایی گوزارشتەکېنە ئامان: "چا داواکارییا کە پێشکەش بە ناوەندەکەی کریێنۍ، وەختۍ شۊنماو جە ئاڎابیەی و زۋانی ئەڎایی و ئشناسنامەکاشا ۋنە پەرسیۆ، بەرگنۆ فرەتەرینوو ئا کەسا خاوەن ئشناسنامە و نەتەوەو کوردینۍ. ئی ئاژە تەنانەت جە ساڵەو ٢٠٢٣ێنە حیچ فاڕیایێش سەرەرە نامانە.