ڕابەروو گەلوو کوردی عەبدوڵا ئۆجالان، کە زیاتەر جە ٢٥ ساڵان ئینا گۆشەگیریێوی ڕەهانە، ماوەو ٣٩ مانگان هیچ زانیاریێوە بارەو بارودۆخیشۆ نامان بەر. ئەرەمەرزیا و ڕێکوزیا ڕاپەنەدریێکێ بەتایبەت کۆمیتەو ڕاگێریکەردەی جە ئەشکەنجەو ئەورووپا (سی پی تی)، بەردەوام جە ڕووەبەڕووبییەیوەو مەرجەکاو گۆشەگیریی ڕەهاینە، کە سەروو ڕابەروو گەلوو کوردی عەبدوڵا ئۆجالانیرە سەپیێنێ، پێسەو مردنای مافوو کۆبییەیوە چەنی پارێزنەر و بنەیانەکەیش و گردوو پەیوەندییەکای تەری بێدەنگێنێ.

 لاێوی تەرۆ ئا چالاکیێ چوارچوەو هەڵمەتەو "ئازادیی پەی عەبدوڵا ئۆجالانی، چارەسەرێوی سیاسی پەی پەرسەو کوردی" کە ١٠و تشرینوو یوەموو ٢٠٢٣ دەسشا پەنە کەردەن و کریێنێ، تا ئیساتێچ دلێ گەلاو جیهانینە ئینێ گەشەکەردەی و وەرفراوانینە. چینە کۆمەڵایەتییە جیاوازەکێ وەراوەروو گۆشەگیریی ئیمرالی و داواو ئازادیی بەڕێزیشانە کاردایۆشا بییەن، هەرپاسە بە پارادایمەکاو ڕابەروو گەلوو کوردی عەبدوڵا ئۆجالانی کە دیموکراتیک و لایەنگێروو مافەکاو ژەنان و سەروو بنەماو گلێرگێوی ئیکۆلۆژییا، گرنگیی مدا.

زیاتەر جە ٥٠ شارانە چالاکییێ مکەرانێ

چوارچوەو هەڵمەتەو ئازادیینە و بە نامێ "واتەواچ چەنی عەبدوڵا ئۆجالانی" فرەو وەڵاتانە پێسەو فینلاند، سوید، فەرەنسا، ئاڵمانیا، کەتەلۆنیا، یۆنان، ئیتاڵیا، سویسرا، کۆڵۆمبیا، قوبرس، بەلژیکا، بەریتانیا، پۆڵەندا، سلۆڤینیا و کینیاینە بەینوو ١٥ تا ٢٢ی حوزەیرانینە زنجیرێوی چالاکیی ڕێکێ موزیانێ.

چی چالاکییانە کە سەروو بنەماو بێیاسایینێ ئیمرالیینە، باس جە مانا و گرنگیی پارادایمەکاو ڕابەروو گەلوو کوردی عەبدوڵا ئۆجالانت پەی گەلاو جیهانی مکریا. زیاتەر جە ٥٠ شارانە، جە ١٥ وەڵاتە جیاجیانە، چالاکییە جۆراوجۆرەکێ پێسەو  وەڵاکەردەیوە کتێبەکاو ڕابەروو گەلوو کوردی، عەبدوڵا ئۆجالانی، وانایوە نویسیایەکاش زیندانۆ، نیایرەی کۆشکەو وەڵاکەردەیوە زانیاریی سەروو گۆشەگیریی ڕەهاو ئیمرالی، کۆنفڕانس، پانێڵ، شانۆ، چالاکیی هونەری، کۆبییەیوە و بەرنامەی ڕادوێنی مکریانێ.  

"ئێمە ئینایمێ  وەختوو قسەکەردەینە چەنی عەبدوڵا ئۆجالانی"

ئەنداماو دەسوەڵیوزییەکەی، کە بەردەوامێنێ جە هەڵمەتەو "ئازادیی پەی عەبدوڵا ئۆجالانی، چارەسەری سیاسیی پەی کێشەو کوردی"، داواشا وەنەو گرد لایێوە کەردە، کە بەشدارێ چالاکییەکا با، کە بە ناموونیشانوو  "ڕواو واتەواچی چەنی عەبدوڵا ئۆجالانی" ڕێکێ وزیێنێ و ویرۆکەکاش وەڵا بکەراوە.  

"ویرۆکەکێش پەیما ڕانیشاندەرێنێ"

ئەنداماو دەسوەڵیوزییەکەی بە ئاماژەدای بە گرنگیی ویرۆکەکاو ڕابەروو گەلوو کوردی عەبدوڵا ئۆجالانی، واتشا: "نویستەیەکاو عەبدوڵا ئۆجالانی پەی  ڕۆشنویرا، ویرمەندە ئازادا، زانایا، کرێکارا، چالاکا، هونەرمەندا، سەندیکاکا، جمیەرە کۆمەڵایەتییەکا، سیاسەتمەدارا و گردوو گلێرگەکا ئیلهامبەخشێنێ. عەبدوڵا ئۆجالان ٢٥ساڵ چێ وەڵ پێسەو ڕابەروو گەلوو کوردی دماو پیلانێوی میاندەوڵەتیێ بە گیریا و ئیمرالیینە گۆشەگیر کریا، دماو چند ساڵێو پێسە سەرمەشقێوی گلێرگێوی ئازادی، فرەنەتەوەیی، فرە ئایینی و دیموکراتیک گێڵاوە مەیدانوو سیاسەتی و کۆشیای. سەروو بنەماو ویرۆکەکاو عەبدوڵا ئۆجالانی سیستمێوی کۆمەڵایەتی وێڕاوەبەر و ئازاد سەرنیشتنە و وەرکەوتوو سوریاینە بنیات نریان، کە سەبارەت بە ئازادیی ژەنا، ئیکۆلۆژی و دیموکراسیی ڕادیکاڵ، گەلاو هەرێمەکەیش دەوروو وێشەنە جەمێ کەردێنێوە.  فەلسەفەو عەبدوڵا ئۆجالانی، ھومێدێوی تازەما پەی ئەگەروو سیستمێوی کۆمەڵایەتی دیموکراسی پەنە مبەخشۆ. ئاد ئاوازوو "ژەنی، ژیوای، ئازادی"یش ژووروو زیندانەکەیشنە بە مانیفێستێو متەرە، کە بییەن دروشموو کۆشیای ئازادیی ژەنا سەدەو ٢١ینە و پێسەو قیبلەنماو گردوو ژەنە سەرەوردەرا و کۆشەران.