تەندروسی دەڤریم ئایکی زیڼانی نەوەشیە قورسەکا کە ٧٦٪ کەمئەنداما، ڕۆ بە ڕۆ خراپتەر بۆ. ئەڎاش هۆلیا ئایکە داواش کەردەن یان فاڕیۊوە پەی زیڼانوو ئانتالیای پەی چارەسەری یان دەموودەس ئازاڎ بکریۆ.
بەپاو داتاکاو جەمەو مافوو مرۆڤی (IHD)، هەزار و ٥٦٤ زیڼانیۍ نەوەشۍ جە زیڼانەکا تورکیاینە هەنۍ و چا ژمارەیە ٦٥١ کەسېشا نەوەشی قورسشا هەن. دەڤریم ئایک تەمەن ٣٣ساڵ کە ٧٦٪و لاشەیش کەمئەنداما یۊن چا زیڼانیا.
ئایک کە ساڵەو ٢٠١٥ جە وەختوو بەشکەردەی گۆڤاروو ئۆزگور هاڵکی (گەلێوە ئازاڎ)یی جە ئیزمیرەنە بە تۆمەتەو "ئەندامبیەی جە ڕێکوستەی" و "یاردەیدای ڕێکوستەی" گیریا. تا ئیساتۍ جە فرەو زیڼانەکانە مەنەنۆ.
دەڤریم ئایک وەڵتەر جە زیڼانوو ئانتالیاینە باری تەندروسیش تێکشیەبۍ، جە ساڵەو ٢٠١٨ ینە ئازاڎکریا، بەڵام جە مانگەو ١ و ساڵەو ٢٠٢١ ینە واوەی گیریاوە و ڕەوانەو زیڼانوو ئەدرنەی کریاوە. ئایک کە بەمەڵامەتوو نەوەشی کرۆنیوە دووۍ عەمەلیاتێش پەی کریێنۍ، چەمېوەش بەتەمامی جە دەسدان و چەمەکەی تەریچش ٣٢ پلۍ ۋینایش جە دەس دان. حەرپاسە گۊشەکێش ژنەوییەیشا ٥٠٪ وەستەنەرە.
ئەڎاو ئایکی ئەرەیاۋناش کە زیڼانییەکۍ بە کردەوەی هەڕەمەکی ۋەرپەرسا جە گرڎوو مافەکاشا بێبەشۍ کریېنۍ، حەرپاسە دەسەی چەمڎاری زیڼانی "پەشیمانی" سەرو ئا زیڼانیارە کە سزاکېشا تەمام کەردێنۍ مسەپنۆ و ڕا جە ئازاڎبیەیشا مکەرۆ.
حەرپاسە هولیا ئایکە ئەڎاو دەڤریمی واتش: "مشۊم بە زووتەرین وەخت گۆشەگیری و کردەوەی هەڕەمەکی دمایش پنەبۍ، بە پێچەوانۆ وەزیروو دادی و ئیدارەو زیڼانیا ۋەرپرسیارۍ بانۍ جە گرڎوو ڕووەدایە نەرێنییەکا دلۍ زیڼانەکا. داواشا ۋنەمکەرمۍ با دڵوو ئەڎایا نەسۊچۆ، واز چی زوڵمیە باردۍ."
