دۆڵەتو تورکی قڕکەری و فاشیستی جە هرووژم و ئەرەگیری پەی سەرو پانیشتوو کوردەسانی و ۋەرنیشتوو کوردەسانی بەردەواما و دەسەڵاتدارا پانیشتوو کوردەسانی و دۆڵەتو عێراقیچ بێدەنگێنۍ و تائاستێوەیچ هامکارۍ ئا هرووژمە ئەرەگیریانۍ. چی بارۆ هەریۆ جە نویسەر سمکۆ سابیر و چالاکوابی ڕامیار جومعە کەریم پەی ئاژانسوو هەواڵوو فوراتی (ANF)ی قسێشا کەردۍ.

جە سەرەتاو قسەکاشەنە سمکۆ سابیر باسش چانەیە کەرڎ کە هەرکاتێ ئەرەگیرا کوردەسانی درکشا بەلاوازبیەی ۋێشا کەردەبۆ پەناشا پەی پرسو ئاشتی بەردەن و واتش: "وڵاتا ئەرەگیری جە پرسو ئاشتیینە ڕاسواچۍ نیەنۍ، هەمیشە گەرەکشانە کوردی گەلوو کوردی فریو بڎا. بەتایبەتی جە ئیساتێنە جەمۍ فاریایۍ مېیاننەتەوەییۍ ئینۍ ئارانە تورکیا تەرسۆ بەشێوە جە خاکەکەیش جە دەس بڎۆ و دما گنۆ.

هەرپۊکەی تورکیا جەمۍ سیناریۆیێش ئینۍ دەسۆ باسو ئاشتیی و مافوو گەلوو کوردی مکەرۆ بەڵام ئیمە مزانمۍ جە ۋییەردەنە چن جارێوە پەکەکە ئاێربەسش ئەرەیاۋنان دۆڵەتو تورکی پابەڼ نەبیەن پۆشۆ."

'حەجگیز قەندیل چەک نمەنیۆرە'

جە دما دمایی قسەکاشەنە ئاماژەش پانەی کەرڎ کە دۆڵەتو تورکی ڕاسواچ نییا باس جە پڕۆسەو ئاشتی مکەرۆ جە هەمانکاتەنە هرووژم مکەرۆ. واتش: "دۆڵەتو تورکی ڕاسواچ نییا ئا کاتەی باس جە پڕۆسەو ئاشتی مکەرۆ جە پانیشتوو ۋەرنیشتوو کوردەسانینە کۆمکوژی ئەنجام مڎۆ، دارسان و دەگایەکا کاولۍ مکەرۆ زەرەرۍ فرەش بە ۋەرنیشتوو کوردەسانی یاۋنان.

هەرچڼە دیڎارو سەرۆکایەتی بۍ و دۆڵەتو تورک گەرەکشا بەکارش بارۆ و قەندیل چەک بنیۆرە بێگومان ئینەیچ حەجگیز ڕووە نمەڎۆ پېسە ئانەی باسم کەرد جە ۋییەردەنە قەندیل ئاێر بەسش ئەرەیاۋنان بەڵام تورکیا پاشێلکاریش کەردەن و ئاشتیش گەرەک نەبیەن."

'مشۆم پرۆسەو ئاشتی جە ئیمڕاڵییوە بۆ'

لاو ۋێشۆ چالاکوانی ڕامیار جومعە کەریم باسش چانەی کەرڎ  کەگەلاو ۋەرکۆتوو مېیامینی پەنەوازشا بە ئاشتیێوە حەقەتینی هەن و واتش: "مشۆم پرۆسەو ئاشتی جە ئیمڕالییوە بۆ ئەر نا پرۆسەو ئاشتیی نییا. ژنیما دەسەڵاتدارا تورکیای بڕۆ کەلیمێشا دەربارەو ئاشتی باس کەردۍ، بەڵام جە هەمانکاتەنە بۆمبۋاران و ئەرەگیری ئەنجام مڎا جە ۋەرا ۋەرو پانیشتوو کوردەسانی و ۋەرنیشتوو کوردەسانینە.

هەرپۆکەی ئی دووە چێوۍ یۆی نمەگێراوە مشۆم دۆڵەتو تورکی ۋێش یەکلایی بکەرۆوە یاخود ئاشتی ئەنجام بڎۆ و جە هرووژم کەردەی مردۆ یا ئانەن جە هرووژمەکاش بەردەوام بۆ کە سەرو ۋێشەرە مەڕیۆوە."

'جە جبەرو ئیمڕاڵی هیچ پرۆسێوە ئاشتیی حەقەتینە بیەیش نییا'

جە دما دمایی قسەکاشەنە جومعە کەریم ئاماژەش پانەی کەرڎ کە گەلوو کوردی دۆڵەتو تورکی مشناسۆ پۊکەی ئەر ئاشتیش گەرەکا مشۆم ڕاسواچ بۆ  ئەرنا هیچکات ئاشتی بەرقەرار نمەبۆ. واتش: "گەلوو کوردی و تەڤگەرو ئازادی کوردیچ ئا حەقەتینیە مزانا کە پرۆسەو ئاشتی ئینا ئیمڕاڵیی، جە جبەرو ئیمڕاڵینە هیچ پرۆسێوە ئاشتی حەقەتینە نمەبۆ، پۊکەی ئەر دۆڵەتو تورکی ئاشتیش گەرەکا مشۆم بەرەو ئیمڕاڵی بکەرۆوە."