ئەرەنیشتەو دۆسیەو دادگایکەردەی براوۍ خەڵاتوو نۆبڵی ئاشتی و چالاکەو مافەکا مرۆڤی نەرگس موحەممەدیۍ جە دادگاو شۆڕشوو تارانینە ئەنجامدریا. بە مەڵامەتوو ئانەی نامەبریۍ بەشداریکەردەیش جە دادگانە ڕەڎکەردەنۆ، دادگایکەردەکەی بەبێ ئاماڎەبیەی ۋېش ئەنجامدریا.
نەرگس موحەممەدییە بە مەڵامەتوو ئەرەکۊشای دژوو سەپنای حیجابی زۆرملێ و جە قەنارەدای جە ئێرانەنە، جە ساڵەو ٢٠٢١یوە وزیېنە زیڼانی ئەڤین و تارانیوە.
موسەفا نیلی پارێزنەرو نەرگس موحەممەدیۍ سەرو پەڕەو میدیای دیجیتاڵی ئێکسی تایبەت بە ۋېش ئەرەیاۋناش: "دادگایکەردەی نەرگس موحەمەدیۍ ئارۆ جە لقوو ٢٩و دادگاو شۆڕشی جە تاران بەبێ ئامادەبیەی نەرگس موحەمەدیۍ لوواڕاوە.
نیلی ڕۊشنشکەردۆ، جارێوەتەر نەرگس موحەممەدییە “تۆمەتبارە کریېنە بە پڕوپاگەندەی دژوو دەوڵەتی” بەمەڵامەتوو “سەرنجەکاش سەبارەت بە دینا قالیبافۍ و بایکۆتوو هۊرچنیەکاوە” کە جە مانگەو ئادارینە ئەنجامدریۍ.
ئا چالاکۍ جە مانگەو ئادارینە و جە وەختوو لوای ڕاوەو هۊرچنیەکانە پەیامێوە دەنگیش جە زیڼانۆ وەڵاکەردۆ و چنەشەنە “جەنگی ۋەرفراوان و تایبەتی دژ بە ژەنا” جە تەرەفوو ئێرانیوە سه‌ركۆنه کەرد.
نەرگس سافیە موحەممەدییە جە ٢١و نیسانوو ١٩٧٢ۍ جە شاروو زنجان و ئێرانینە جە ئەڎۍ بیېنە. جە زانکۆو ئیمام خومەینی میان نەتەوەینە جە بەشوو فیزیایی ئەتۆمینە ۋەنانش و جە تەمەنی ٣٢ ساڵییوە چالاکەو مافوو مرۆڤی و ڕۆنامەنوویسە بیېنە. حەرپاسە نەرگس موحەممەدییە یووەمین ژەنە موسڵمانە و ئێرانینە کە جە ساڵەو ٢٠٢٣ېنە خەڵاتوو نۆبڵی ئاشتیش هۊرگېرتەن. نەرگس محمدییە یاگەگیرەو سەرۆکوو ناوەندی داکۆکیکارا مافوو مرۆڤینە.
نەرگس موحەمەدییە کە ١٣ جارۍ گیریېنە و بە گرڎی سزاو ٣١ ساڵا زیڼانیکەردەی و پەنج جارۍ ١٥٤ قامچیۍ دایۋنەیش ملەرە سەپیان. جە ساڵەو ٢٠٢١یوە ئینا زیڼانەنە. نەرگس موحەممەدییە بیېنە بە یووە جە ڕوخسارە دیارەکاو شۆڕشوو 'ژەنۍ، ژیۋای، ئازاڎیی' جە ئێران و ۋەرکەوتوو دلېڕاسەینە.
