ئیستەنبوڵنە بە ڕاپیمایۍ جەماوەری دەسسەرەرەگېرتەی شارەوانی جولەمێرگی شەرمەزارکریا، پۆلیسوو تورکی هجوومش کەرد سەرو ڕاپیماییکەرا و جەماوەر سەرەڕاو ئاستەنگیەکا ڕاپیمایشا کەرد و واتشا: "دزی و فاشیزم قبووڵ نمەکەرمۍ".
هێزەکاو ڕەنج و دیموکراسی گەلا دژوو دەسسەرەرەگېرتەی شارەوانی جولەمێرگی جە ئیستەنبوڵنە ڕاپیمایێشا ڕێکوست.
پۆلیس گەرەکش بۍ ڕاپیماکەی ئاستەنگ بکەرۆ، جەماوەر ئاستەنگی پۆلیسیش ماڕا و دەسش بە ڕاپیمای کەرد و بە درووشمەو "ئی دەسسەرەرەگېرتەی و تاڵانی و دزی و فاشیزمیە قبووڵ نمەکەرمۍ" ناڕەزاییشا بەربڕی. سەرەڕاو ئاستەنگی پۆلیسی جەماوەر درێژەشا بە ڕاپیمای دا، پۆلیس نزیکەو ٢٠ کەساش دەسبەسەرۍکەردۍ.
بێشکتاشیچەنە چالاکی ئەرەنیشتەی کریا
ڕاوەبەرا دەم پارتی مەنتیقەو بێشکتاشی چالاکی ئەرەنیشتەیشا کەرد، سەرۆکوو جەهەپەی جە مەنتیقەکەنە عەلیجان شەن بەشداری چالاکییەکەیش کەرد، واتش: "حیساب نەکەردەی پەی ئیرادەو گەلی قبووڵ نمەکریۆ، پەی پەشتگیری چالاکییەکەی ئینانی چۍ".
ڕاوەبەروو دەم پارتی مەنتیقەکەی فەرەح کۆکمەن ئەرەیاۋناش تا گېڵایۆ مافوو گەلی درێژە بە چالاکی مڎا، واتش: "ئینە کودەتایۍ تەرا دژوو دیموکراسی و ئیرادەو گەلی دەسش سەرەرە گیریان ، چالاکییەکېما دژوو دەسسەرەرەگېرتەی بەردەوامۍ بانۍ".
