زانکۆو سۆران-ی سەنتەرو هەورامانناسی مەکەرۆنەوە

سەبای چوار شەممە، زانکۆو سۆران-ی بە مەڕاسیمێ سەنتەرو هەورامانناسی مەکەرۆنەوە.

جە ڤییەرێوی گرنگەنە زانکۆو سۆران-ی جە پارێزگاو هەولێر-ی، بە مەڕاسیمێ سەنتەرو هەورامانناسی مەکەرۆنەوە.
جە ئی بارەوە ڕاوەبەری زانکۆکەی ئاشکراش کەردەن: سەبای چوار شەممە (2020/12/16) سەعات 11:00و نیمەڕۆی، جە هۆڵو کۆنفڕانسو فاکەڵەتی زانستی و بە وەرچەمگێرتەی ڕانمونیە تەندروستییەکان، بە مەڕاسیمێ سەنتەرو هەورامانناسی مەکریۆنەوە.
زانیان، کە ژمارێوی فرێ مێمانی جە شارێ و ناوچەکێ کوردستانی و چەنڎین کەسایەتیێ، نویسەرێ، ڕۆشنویرێ و چالاکوانێ هەورامانی، داوەتێ مەڕاسیمەکەی کریێنێ.
بڕیارەن سەرەڕاو ئەوەکەردەی سەنتەرو هەورامانناسی جە زانکۆو سۆران-یەنە، ژمارێو کەسایەتیێ کە پەی هەورامانی مانیاینێ و ڕۆڵ و یاگەدەستشان جە پارێزنای فەرهەنگ و زوان و ئەدەبی هەورامییەنە دیارەن، جەلاو زانکۆکەیەوە خەڵات بکریانێ.

یاگێ ئاماژەیەنە، دمای 29 ساڵێ جە دەسەڵات و ڕاوەبەری کوردی جە پانیشتو کوردستانی، ئینە یەکەم جارەن سەنتەرێوی هەورامانناسی بکریۆنەوە. هەورامییەکێ سەرەڕاو پێشوازی گەرمی و سپاسگوزاری جە زانکۆو سۆرانی پەی ئەوەکەردەی سەنتەرەکەی، وازیارێنێ نەک هەر جە زانکۆو سۆرانی، بەڵکو جە سەرجەم زانکۆکێ تەرێ کوردستانیەنە سەنتەرێ و ناوەندێ هامشێوێ بکریانێوە و حکومەت بە گردی و وەزارەتێ پەروەردەی و وانای باڵای زیاتەر گرنگی بە هەورامانناسی و زوان و فەرهەنگ و ئەدەبیاتو هەورامی بڎانێ.