دوابەدوای بانگەوازی جەهەپە و دەم پارتی بۆ ئەنجامدانی چالاکی لە دژی دەستبەسەرداگرتی شارەوانی ئەسەنیورتی، گەل بۆ شەرمەزارکردنی دانانی قەیوم لە گۆڕەپانی ئەسەنیورتی کۆبوونەوە و ئۆزگور ئۆزەلی سەرۆکی جەهەپە گوتی، "کودەتا بەسەر ئیرادەی ئەسەنیورتییدا کراوە."
لە هەڵبژاردنە هەرێمییەکانی ٣١ی ئاداردا ئەحمەد ئۆزەر وەک بەربژێری هاوبەشی شار ببوە سەرۆک شارەوانی ئەسەنیورتی ئەستەنبوڵ. لە بەردەوامی سیاسەتی دانانی قەیومی دەساڵاتدارییدا ئۆزەر دەستگیرکرا و قەیوم لە جێگەکەی دانرا. بەو مەبەستە گەل لە دوای بانگەوازی دەم پارتی و جەهەپە چالاکی شەرمەزارکردنی دانانی قەیومیان لە گۆڕەپانی ئەسەنیورتی ئەنجامدا.
پلانڕێژی ئەوە کرابوو چالاکییەکە لە پێش بینای شارەوانی ئەنجام بدرێت، بەڵام پۆلیس گەمارۆی بیناکەی دا. بەم هۆیەوە شوێنی ئەنجامدانی چالاکییەکە گۆڕدرا و گۆڕەپانی ئەسەنیورتی دیاریکرا بۆ ئەنجامدانی چالاکییەکە.
پەڕلەمانتارانی جەهەپە لە گۆڕەپانەکەدان و هاوڵاتییان بە درووشمی "ماف، یاسا، دادپەرەوەری"دەڕژێنە گۆڕەپانی چالاکییەکەوە.
ئۆزگور ئۆزەل سەرۆکی جەهەپە پێش کۆبوونەوەی دەستەی ئیدارەی ناوەندی لە بینای ناوچەی ئەسەنیورتی قسەی کرد و ڕایگەیاند، دەستگیرکردنی سەرۆکی شارەوانی و دانانی قەیوم لە شوێنەکەی بە واتای کودەتا دێت.
