تۆڕی مافەکانی مرۆڤی کوردستان ڕایگەیاند حەوت چالاکوانی کورد لە لایەن دادگای داواکاری گشتی و شۆڕشی سنەی دەوڵەتی ئێرانەوە بە تۆمەتی 'تێکدانی ئاسایشی گشتی' دادگای کراون.

دەربارەی دادگایکردنی ئەو چالاکوانانە تۆڕی مافەکانی مرۆڤی کوردستان ئەم زانیاریانەی خستووتەڕوو:

"لە ٢٣ـی شووباتی ئەمساڵدا یەکەم دانیشتنی دادگاییکردنی حەوت چالاکوانی کورد لە لقی دووی لێپرسینەوەی داواکاری گشتیی و شۆڕشی سنە بەڕێوەچوو. ئەو حەوت چالاکوانە کوردە بە تۆمەتی”تێکدانی ئاسایشی گشتیی” دادگاییکران و هەر یەکێکیان بە دانانی بارمتەی ١٠٠ ملیۆن تمەن و بە شێوەی کاتی ئازاد کران."

بەپێی ئەو سەرچاوەیە ناوی چالاکوانەکان بەم شێوەیە: فاتمه زەند کەریمی، زارا محەممەدی، سوهراب جەلالی، موختار ئەسەدی، کەمال فەکووریان، جەمیل ئەمینی و جەمال ئەسەدی.