دیوانی هاوسەرۆکایەتی کۆنگرەی گەل ڕاگەیاندراوێکی بڵاوکردەوە و جەژنی نەورۆزی لە ڕێبەر ئاپۆ و گەلی کورد و تەواوی گەلان پیرۆز کرد و شەهیدانی بیرهێنایەوە، دەڵێت: " ئێمە بە بانگەوازی ڕێبەر ئاپۆ بۆ 'ئاشتی و کۆمەڵگەی دیموکراتیک' کە 'مانیفێستی سەدە'یە، پێشوازی لە جەژنی نەورۆزی ٢٠٢٥ دەکەین. گەل و دۆستانمان لە کوردستان و دەرەوە لەسەر بناغەی ئازادی ڕێبەر ئاپۆ، وەک نەورۆزی ئازادی پێشوازی لە نەورۆزی ٢٠٢٥ دەکەن. هاوبەشی جۆشوخرۆشی گەلەکەمان و دۆستەکانمانین".

کۆنگرەی گەل تیشک دەخاتە سەر گرنگی و کاریگەرییەکانی بانگەوازەکەی ڕێبەر ئاپۆ، کە لە بەرئەنجامی ئەمەشدا پرۆسەیەکی نوێ لەنێوان ئیدارەی خۆبەڕێوەبەری و حکومەتی نوێی دیمەشق دەستی پێ کرد، دەڵێت: "کلیلی چارەسەری قەیران و ئاڵۆزی و وێرانکارییەکان لە سوریا، شۆڕشی ڕۆژئاوایە، کە نیشانەی یەکێتی کۆمەڵایەتیی دیموکراتیکی گەل و باوەڕەکانە".

کۆنگرەی گەل جەخت دەکاتەوە دەبێت هەمووان ئەم نەورۆزە وەک نەورۆزی ئازادی ڕێبەر ئاپۆ پێشوازی بکەن و بۆ ڕێکخستنی کۆمەڵگەی دیموکراتیک سەفەربەربن، دەڵێت: "دەبێت هێزەکانی دیموکراسی بە پرۆژەکانی چارەسەریی خۆیان پێشەنگایەتی لەم پرۆسەیە بکەن. بۆ ئەوەی ئەم پرۆسەیە بەرەوپێش بچێت، بابەتی سەرەکی ئازادی ڕێبەر ئاپۆ و ڕەخساندنی هەلومەرجی کارکردنی ڕێبەر ئاپۆیە. بابەتی سەرەکی، درووستکردنی متمانەیە بۆ بەرەوپێشچوونی پرۆسەکە".

دووپاتی دەکاتەوە دەبێت ڕۆشنبیران و ڕێکخراوەکان و ژنان و هێزە ئاشتی و دیموکراسیخوازەکان فشار لە پەرلەمانتاران و پارتە سیاسییەکان بکەن کاری پێویست بکەن بۆ ئازادی ڕێبەر ئاپۆ و مسۆگەرکردنی دیداری ئیمراڵی لەڕێگەی یاساوە.

لەکۆتاییدا دەڵێت: "بانگەواز لە گەلەکەمان و دۆستەکانمان دەکەین، بۆ وەڵامدانەوەی بانگەوازی "ئاشتی و کۆمەڵگەی دیموکراتیک"ـی ڕێبەر ئاپۆ بەشدارییەکی بەهێز لە نەورۆزدا بکەن. نەورۆز پیرۆز بێت".