کوردان لە شاری مۆسکۆی پایتەختی رووسیا بە بۆنەی ٣٩هەمین ساڵیادی چالاکیی گەورەی رۆژووی مردن لە ١٤ی تەممووزی ١٩٨٢دا کۆبوونەوەیەکیان رێکخست و یادی ئەو بەرخودانەیان بەرز راگرت.

لە یادەکەدا رەشید بێناڤ نوێنەری بەڕێوەبەریی خۆسەری باکوور و رۆژهەڵاتی سوریا لە رووسیا وتەیەکی پیشکەشکرد و رایگەیاند، بەرخودانی ١٤ی تەممووز لە زیندان، ئەمڕۆ لە هەر چوارپارچەى کوردستان بە هەمان رۆح و ئیرادە و ورەوە بەردەوامە. بێناڤ وتی، "رۆحی بەرخودانی ١٢ی ئەیلولی ١٩٨٢ لە دژی لیژنەى فاشیستی پێشخرا و هەمان رۆح بووە وێنا و خستنەڕووی شۆڕشی رۆژئاوا، کە بە شۆڕشی ١٩ی تەممووز دەناسرێت".

بێناڤ رایگەیاند، گەلی کورد بە پێشەنگایەتیی عەبدوڵا ئۆجالان رێبەری گەلی کورد و پەکەکە رۆحی بەرخودان و ئیرادەی دروستکردووە و وتی، "محەمەد خەیری دورموش، کەمال پیر، عاکیف یڵماز و عەلی چیچەک لە تێکۆشانی ئازادیدا بوون بە هەزاران و رۆح و ئیرادەی بەرخودانی رێبەر ئاپۆ بەبێ راوەستان بەردەوامیی هەیە.

رۆحی بەرخودانی پەکەکە ٤٠ ساڵە بە هەمان هێز و ورە و ئیرادەوە بەردەوامیی هەیە. هەر چۆن ١٤ی تەممووزی ١٩٨٢ لە دژی لیژنە فاشیستی و سەربازییەکەى کەنعان ئەڤرەن بەرەنگاری و بەرخودانیان کرد ئەمڕۆ لە دژی فاشیزمی ئاکەپە – مەهەپە بەرخودان دەکەین. لە زیندانی ئامەد لە دژی خۆبەدەستەوەدان و ئەشکەنجە رۆح و ئیرادەی بەرخودان ئافرێنرا و بە بۆنەی ئەو رۆح و ئیرادەیەوە بەرخودانی تێکۆشانی ئازادی گەیشتووەتە ئەمڕۆ. تێکۆشانی ئازادیی گەلی کورد بە رۆحی ١٤ی تەممووز درێژە بە تێکۆشانەکەى دەدات.

ئەگەر رۆح و ئیرادە و ورەی بەرخودانی ١٤ی تەممووز نەبوایە، ئەوا رۆحی بەرخودانی شۆڕشی ١٩ی تەممووز نەدەخوڵقا. بۆ ئەوەى یەکێتیی گەلی کورد پێکبێت ئەو رۆح و ئیرادەیە رۆڵێکی گرنگی هەیە. لە سایەی ئەو رۆحەدا لە هەر چوارپارچەى کوردستاندا و بۆ ئەوەی هێزە کوردییەکان یەکبگرن، هەنگاوی گەورە دەنرێن".

ژ.ت