رێپێوانە درێژمەوداکە بە دروشمی "رێگا بە گۆشەگیری مەدە، لەگەڵ رێبەر ئاپۆدا ئازاد ببە" لەلایەن بزووتنەوەى گەنجانی کورد لە ئەوروپاوە رێکخراوە و ١٢٠ گەنج لە وڵاتانی ئەڵمانیا، فەرەنسا و سویسراوە بەشداری چالاکییەکە بوون و دوێنێ دووەم رۆژی چالاکییەکەیان بوو.

پۆلیسی ئەڵمانیا لە یەکەم رۆژی رێپێوانەکەدا هەوڵیدا بوو کاری تێکدەرانە لە دژی رێپێوانەکە و گەنجان ئەنجام بدات و ئەو ئاڵایانەى کە بەهای گەلی کورد بوون قەدەغەیان کرد و گوشاریان دروستکرد بۆ ئەوەى گەنجان دروشم نەڵێنەوە.

لە رۆژی دووەمی رێپێوانەکەشدا هەڵوێستی تێکدەرانە و ئاژاوەگێڕانەى پۆلیس بەردەوام بوو. پۆلیس هەوڵیاندا دیمەنی خۆپیشاندانەکە تۆمار بکەن و گەنجانیش بە وتنەوەى دروشم وەڵامی ئەو هەوڵەى پۆلیسیان دایەوە.

گەنجان کاتێک گەیشتنە لویسینپلاتز لە شاری دارمشتادا سرودیان چڕی و دواتر راگەیاندراوێکیان پێشکەشی میدیاکان کرد و دەستیان بە گێڕانی ئاهەنگ و شایى کرد.

گەنجان کاتێک خۆیان ئامادە دەکرد کۆتایى بە دووەم رۆژی چالاکییەکەیان بهێنن و بڕۆن بۆ ناوەندی کۆمەڵگەى دیموکراتیکی کورد لە دارمشتادا، لەلایەن پۆلیسی ئەڵمانیاوە هێرشیان کرایە سەر.

کۆمیتەی ئامادەکاری رێپێوانەکە لەگەڵ پارێزەران قسەى کرد و رایگەیاند، بڕیارە بەمزوانە گەنجە دەستگیرکراوەکان ئازاد بکرێن. دوای ئەو پەلامارەى پۆلیس، گەنجان چوونە ناوەندی کۆمەڵگەى دیموکراتیکى کورد لە دارمشتاد و بەشداری چالاکیى بەرزراگرتنى یادی گەریلای شەهیدی پەکەکە فرات چیچەک (باران کایا) بوون.

ژ.ت