ئەنجوومەنی گشتی بزووتنەوەی شۆڕشی یەکگرتووی ژنانی بەبۆنەی ساڵیادی فەرمانی شەنگالەوە ڕاگەیەندراوێکی بڵاو کردەوە.

کەبەدەهە ڕایگەیاند کە لە ٣ی ئابی ٢٠١٤ چەتەکانی داعش هێرشیان کردە سەر نیشتمانی ئێزدیەکانی شەنگال و ١٠ ساڵ بەسەر ئەو فەرمانەدا تێپەڕیی. کەبەدەهە ڕایگەیاند کە هێرشەکە بە فەرمانی ٧٤ئەمین ناسراوە و یەکێکە لە دڕندانەترین کۆمەڵکوژییەکان لە مێژووی مرۆڤایەتیدا و دەڵێت: "بەهەزاران کەس لە شەنگال کۆمەڵکوژ کران، بە هەزاران ژن دەستدرێژییان کرایە سەر، ڕفێنراون و لە بازاڕەکاندا فرۆشران. هیچ وڵاتێکی دەسەڵاتداری پیاوسالار دەنگی نەکرد، وەک ئەمڕۆ لە فەلەستین، تەنها بە شەرمەزار کردن هەڵوێست نیشاندرا. سەرەتا ژنان لە بەشە جیاجیاکانی جیهان و گەلانی بندەست لە دژی ئەم کۆمەڵکوژییە وەستانەوە. نموونەی بەرچاو  بە پێشەنگایەتی گەریلاکانی هەپەگە و یەژاستار بوو کە چوون بەهانای شەنگالەوە و گەلی ئێزیدیمانیان لە کۆمەڵکوژییەکی گەورەتر پاراست. حکومەتی عێراق و پارتی دیموکراتی کوردستان لە شەنگال هەڵهاتن و ئەو گەلەیان بۆ چەتەکان بەجێهێشت.

ئەم هێرشە کۆمەڵکوژییەی شەنگال بە بەرخۆدان وەڵام درایەوە و ئیدارەی خۆبەڕێوەبەری شەنگال لە خاکی ئازادکراودا دامەزرا. یەبەشە و یەژەشە وەک هێزی پاراستنی گەل و ژنانی ئێزدی دامەزران.

کەبەدەهە ڕایگەیاند کە دەوڵەتی تورک بە پشتیوانی پەدەکە هێرش دەکاتە سەر هەرێمەکانی پاراستنی مێدیا و ئاماژەی بەوەدا کە ئەو هێرشانە تەنیا دژی گەریلا نییە، بەڵکو دژی گەلی کورد، عەرەب ە مەسیحیەکانیشە، ئەگەر دەوڵەتی تورکی فاشیست لە هێرشەکانیدا سەربکەوێت، ئەوا سیاسەتی کۆمەڵکوژی، قڕکردن، گۆشەگیری و ئاسمیلەکردن لە باکوور و باشوور و ڕۆژئاوا دەست پێدەکات. بەڵام دەوڵەتی تورک باش ئاگادارە ئەوەی بەربەستە لەبەردەم پیلانەکانی تورک، گەریلایە. چونکە بزووتنەوەی ئازادیخوازی کورد بە پێشەنگایەتی ژنان، پیلانەکانی سیستەمی سەرمایەداری، پیاوسالاری و هاوبەشەکانی تێکدەشکێنێت.

کەبەدەهە دەڵێت بۆ ڕزگار بوون لە دەست پلانە کۆمەڵکوژییەکانی دەوڵەتی تورک تەنها ڕێگا تێکۆشانی شۆڕشگێڕانەی یەکگرتووی ژنان و گەلانی بندەستە. لە کۆتاییدا جارێکی تر یادی شەهیدانی کۆمەڵکوژیی شەنگال دەکەینەوە و رایدەگەیەنین لەگەڵ ژنانی ئێزدی و گەلی شەنگالین لە دژی هەر جۆرە هێرشێک تێکۆشانمان بەهێزتر دەکەین."