لە ستراسبۆرگ لە چوارچێوەی کەمپەینی "تیشکەکانی خۆر" بانگەواز لە ڕێکخراوەکانی ئەوروپا کرا، دژی گۆشەگیری ئیمراڵی ئەرکەکانیان جێبەجێ بکەن، داوا لە هێزە ئازادیخوازەکان کرا، پشتگیری لە هەڵمەتە نێونەتەوەییەکە بکەن.
لە شاری ستراسبۆرگی فەرەنسا لە چوارچێوەی کەمپەینی "تیشکەکانی خۆر" کە ٢ ی ئەیلول لەلایەن بزووتنەوەی ژنانی کوردی ئەوروپا (تەژەکە-ئە) دەستی پێ کرد، ڕێپێوانێک ئەنجامدرا.
ڕێپێوانەکە لەلایەن کۆمەڵەی ژنانی زین ڕێکخرا، تێیدا پانکارتی "تیشکەکانی خۆر، ئازادی بۆ ئۆجالان؛ چارەسەر بۆ پرسی کورد" و وێنەی ڕێبەری گەلی کورد عەبدوڵا ئۆجالان هەڵگیرا. درووشمی "بژی سەرۆک ئاپۆ" و "بێ سەرۆک ژیان نابێ" و "ژن، ژیان، ئازادی" بەرزكرایەوە.
ئەندامی کۆمەڵەی ژنانی زین، هێلینا دێرسیم بە زمانی فەرەنسی قسەی کرد و تیشکی خستەسەر پیلانگێڕیی نێونەتەوەیی و گرنگی ڕێبەری گەلی کورد عەبدوڵا ئۆجالان بۆ تەواوی گەلان و بەتایبەت گەلی کورد، داوای کرد هەمووان دژی کۆڵۆنیاڵیزمی سەرمایەداری تێبکۆشن.
وتەبێژی کۆمەڵەی ژنانی زین، ڕۆشنا چەولیگ بە تورکی قسەی کرد، تیشكی خستەسەر هەڵمەتی ئازادی و گوتی: "ئازادی ڕێبەرمان ئازادی گەلەکەمان و بەتایبەت ژنان و بندەستانە. تا مسۆگەرکردنی ئازادی جەستەیی ڕێبەرێتی، لە گۆڕەپانەکان دەبین".
هاوسەرۆکی دەکتەمی ستراسبۆرگ سیدار ئامێدی بە کوردی قسەی کرد، گوتی: "ڕێبەرێتیمان ئیرادەی چارەسەری دیموکراتیک و ئاشتییانەی پرسی کوردە. بۆ چارەسەری پرسەکە، پێویستە دامەزراوەکانی ئەوروپا و بەتایبەت سی پی تی دەستبەجێ بچنە ئیمراڵی و ئەرکی خۆیان جێبەجێ بکەن".
