دایە سعادەت ئۆزەنی تەمەن ٧٣ ساڵ نەخۆشیی شێرپەنجەى هەیە و کاتێک لە گوندی قزلەر لە ناوچەى دێرکی مێردین بۆ چارەسەرکردنی نەخۆشییەکەى بەرەو ئیزمیر بەرێکەوت لەلایەن پۆلیسی دەوڵەتی تورکەوە دەستگیرکرا.

دایە ئۆزەن لە خاڵی پشکنینی پۆلیس لە ناوچەى بێرەجوک لە رحا و لە کاتی کۆنترۆڵکردنی ناسنامەدا پێی راگەیاندرا، کە بە دوایدا دەگەڕان.

پۆلیسی دەوڵەتی تورک دایە ئۆزەنی تەمەن ٧٣ ساڵیان لە پاسەکە دابەزاند و دەستگیریانکرد و بردیان بۆ بەڕێوەبەرایەتیی پۆلیسی بێرەجوک.

سەرباری ئەوەى دایە ئۆزەن هەموو بەڵگەکانی تووشبوون بە شێرپەنجەى قوڕگی لەگەڵ بوو و دەڕۆیشت بۆ ئیزمیر بۆ چارەسەری پزیشکی، کە ماڵی کوڕەکەى لەوێیە، بەڵام پۆلیسە تورکەکان هیچ یەک لە دۆخی تەمەن و تەندروستیی ئەو دایکە کوردەیان لە بەرچاو نەگرت و دەستگیریانکرد.

ژ.ت