تۆپباران و هاوەنبارانى سوپاى تورکی داگیرکەر بۆ سەر ناوچەى برادۆست لە پارێزگاى هەولێر لە باشووری کوردستان بەردەوامیى هەیە و ئێوارەى دوێنێ لە کاتژمێر ٠٥:٢٠ بۆ ٠٧:٣٠ ئەو ناوچەیەیان تۆپباران و هاوەنبارانکرد.

سوپاى تورکی داگیرکەر لە تۆپبارانکردن و هاوەنبارانەکەیاندا ئەرمووش، چیادێل، كەندەگەری، گەرووی سیران، ڕۆبی و گەرووی كارەشكی کردە ئامانج و زیانی بەو شوێنانە گەیاند. سەرباری ئەوەى سەرەتاى بەهارە و زۆربەى ناوچەکان سەوزبوون، بەڵام بەهۆی چڕیى تۆپباران و هاوەنبارانەکەى سوپاى تورکی داگیرکەرەوە ئاگر لە ناوچەكە كەوتووەتەوە و بەو هۆیەوە لەوەڕگای مەڕ و ماڵاتی گوندنشینان دەسوتێت كەس ناتوانێت بچێت بیكوژێنێتەوە.

ھاوكات لەگەڵ تۆپباران و هاوەنبارانەکەیاندا، فڕۆكە جەنگییەكانی ئەو ڕژێمە فاشیست و داگیرکەرە بۆ ماوەی دوو كاتژمێر بەسەر ئاسمانی ھەرێمەكەدا سوڕانەوە.

بەپێی زانیارییە ھەرێمییەكان سوپای توركی داگیرکەر ڕۆژ بە ڕۆژ ھێرشەكانی زیاترکردووە و ئەوەش بەپێى وتەى سەرچاوە هەرێمییەکان بۆ ترسیان لە چالاکی و ھێرشی گەریلاكانی ئازادیى كوردستان بۆ سەر بنكەكانیان لە برادۆست دەگەڕێتەوە، چونکە سەربازانی سوپاى تورک لە ڕووی دەروونییەوە تێكچوون و بەردەوام لە ترس و دڵەڕاوكێدان و دەیانەوێت بە فڕۆکەى بێفڕۆکەوان و  فڕۆکەی جەنگی لە ئاسمانەوە و بەو تۆپباران و هاوەنباران ورە بە سەربازە تێکشکاوەکانیان بدەن.

ناوچەى برادۆست دەكەوێتە سێگۆشەی سنووریى نێوان باکوور، باشوور و رۆژهەڵات و یەكێكە لەو ناوچانە بەردەوام لەلایەن سوپاى تورکی داگیرکەرەوە بۆردومان دەکرێت و بەو هۆیەوە ساڵانە چەندین ھاووڵاتیی سڤیل دەبنە قوربانیی دەستی ڕژێمی داگیركەری تورك.

 ناوچەی برادۆست سەر بە قەزای سۆرانە لە سنووری پارێزگای ھەولێر و لە ١٤٤ کلیۆمەتر لە شاری هەولێری پایتەختى هەرێمى باشووری کوردستانەوە دوورە.  

ر.م