سلێمانی، لە ئەنگێزەی عوسمانیە نوێیەکانیشدا هەمان ئەو جێگەیەیە، کە نە دەبێتە مەحکومی عەجەم و نەدەشبێتە سوغرەکێشی ئالی عوسمان. وەک چۆن سەدەیەک لەمەوبەریش هەر نەبوو. بۆیە تا توانیان وێرانیان کرد. سالم وێنەی رۆژگارمان بۆ دەکێشێت و دەفەرموێ: (سەیوان پڕە لە شەخصی ستەم دیدە خوار و ژوور / ھەر قەبری پڕ غەمـــانە بەھەر لا دەکەم نەضەر)، ئێستەیش لە هەوڵدان بۆ دەستڕاگەیشتنیان پێی بۆ وێرانکاریەکی تر، جگە لەوە شتێکی تریان گەرەک نییە..

لە راستیا سلێمانی بەسروشتی ژیاریی خۆی، هەڵکەوتە و جێی مرۆڤگەلی رامنەکراو و سەرکێش و ناڕازیی بووە و دەشبێت. سەرمەشقی بەرخودان و هەڵمەت و هاوکات قوربانییش بووە، بەڵام هیچ کات بۆ ئەوەی نەبێتە قوربانی کۆڵی لە هەڵمەت نەداوە و پشتوێنی لێ شل نەکردۆتەوە.. راستیەکەی دوا لێدوانی وەزیری دەرەوەی کۆماری تورکیا لەبارەی باشوری کوردستانەوە چەند ئاماژەی جیاواز هەڵدەگرێت:

• دابەشکرنی باشووری کوردستان، بۆ هەرێمی سلێمانی و هەرێمی هەولێر، بەرهەمی سیاسەتی خۆیانە و وا نزیک بە دوو دەیە و نیوە، بەشێوەی پراکتیکی دەوڵەتی تورکیا کاری لەسەر دەکات. سەرکەوتنی ئەم دووکەرتبوونەش، بیرکۆڵی سیاسی پارتە فەرمانڕەواکانە. بەتایبەتیش پارتی دیموکرات، کە هەر لەسەرەتاوە هاتنی لەشکرکێشی تورکیا لەژێر باڵی ئەودا بووە، تا بەم ساتەش دەگات..
• هەرێمی سلێمانی چیە؟ سلێمانی لە بۆچوونی ئەواندا (شارێکە لەژێر هەژموونی پارتی کرێکارانی کوردستاندایە)، لە راستیشدا ئەم قسەیە تەنانەت خۆشیان دەزانن وا نیە، بەڵکو دەکرێت پێچەوانەکەشی راست بێت. خۆ سەد ساڵ زیاتر لەمەو پێش (پەکەکە و تەڤگەری ئاپۆچی) لە ئارادا نەبوون، کە تورکانی عوسمانی پەلاماری سلێمانیان ئەدا و دیسان سالم دەڵێت: (شەھرێکە پڕ لە ضوڵم و مەکانێکە پڕ لە شین / جایێکە پڕ لە شۆڕ و وڵاتێکە پڕ لە شەڕ)، لە راستیا دەکرێت بڵێین پەکەکەش وەک بزوتنەوەیەکی شۆڕشگێڕیی، ئیلهام لە هەڵمەت و مەردایەتی سلێمانی وەردەگرێت، تەنانەت خۆشیان ئەمەیان نەشاردۆتەوە. قسەکەی وەزیریش تەنها بۆ شەرعیەتدانە بە هەر پەلامار و هەوڵێک بۆ داگیرکردنی شارەکە، چونکە ئەوان لە نەخۆشکەوتنی باپیرەگەورەی عوسمانیەوە تا بەچکە عوسمانیەکانی ئاکپارتی، تای سلێمانی و قەندیلیان هەبووە و هەیە.. بەڵام دەرس وەرگرتن لە مێژوو خراپ نیە، سلێمانی بەعسی هێنابووە زەلزەلە و شاهیدی کەوتنی سەددامیشە!
• تێپەڕینی سەد ساڵ بەسەر پەیماننامەی لۆزان و، خەونی گەڕانەوە بۆ (میساقی نیشمانی) و دروستکردنی پشتێنەی بەهێز بۆ بەشی خوارەوەی دەوڵەت، کە پێک دێت لە ویلایەتەکانی (حەلەب و موسڵ)، ئامانجی کاری ئەوانە و چەند ساڵێکە خۆیانی بۆ ئامادە دەکەن. لە رۆژئاڤا (باکور و خۆرائاوای سوریا) چەند ناوچەی گرنگ و ستراتیژی لەلایەن سوپای کۆماری تورکیاوە داگیرکراون لە ناوچە کوردیەکان (عفرین و گرێسپی و سەرێکانی) هەژموونی زۆریشی لەناوچە عەرەبیەکان هەیە، کە بەدەست سوپای سوریای ئازادەوەن.. لە هەرێمی کوردستانیش، بە شێوەیەکی ستراتیژی لەماوەی بیست و پێنج ساڵی رابردوودا لە سەروەختی شەڕی ناوخۆوە، بە چەند قۆناغێک داگیرکاری دەستی پێکردوە. هەرچەندە بەشێک لە سوپای تورکیا هەر لە کاتی راپەڕینی ١٩٩١ ەوە لە خاکی هەرێمی کوردستانن..
• قووڵی سیتراتیژی، هەم وەک کتێبەکەی (ئەحمەد داودئۆغڵو)ی کۆنە بونیادنەری هزریی ئاکەپە و هەم وەک تێرمێکی نوێ لەناو دەستەواژەی کارکردی سیاسیانەی عوسمانیە نوێکاندا، ئامادەیی زۆری هەیه. ئەم دەستەواژەیە خۆی چیە و سەبارەت بە کورد و بەتایبەتیش باشور چیمان پێدەڵێت؟ لە بنەڕەتتدا ئەم دەستەواژەیە دەستپێکی بوژانەوەی سیاسەتی تورکیای نوێ و، هەڵدانبوو بۆ چوونەوە ناو پەیوەندی باشیەوە لەگەڵ جیهاندا، بۆ پتەوکردنی پایەکانی ئابووری وڵات.

وەک دەستورێک پەیڕەو لەو خاڵانە دەکرێتەوە، کە تورکیایەکی کاریگەر، لە سەر ئاستی جیهان لە دایک ببێت. تورکیایەک، میراتگری خەلافەتی عوسمانیە و بەشێوەیەکی مۆدێرن بنەماکانی ئەو سەردەمە بونیاد دەنێتەوە. بەپشت بەستن بە تیۆری (ریشەی شارستانی هاوبەش) دەیانەوێت گەلانی ناوچەکە بە میتۆدی جۆراوجۆر بخەنە ژێر ڕکێفی خۆیان و هەژموونی کلتووری و ئابووریان بەسەر گەلان و وڵاتانی هەرێمیدا بسەپێنن.. لەم سۆنگەیەوە، باشوری کوردستان وەک بەشێک لە ویلایەتی موسڵ، جێگەیەکی پڕ بایەخی ئەوانە. لە دوای ڕاپەڕینەوە ئەوان بە وردی و بە قۆناغ وەک خۆشیان باسی دەکەن توانیان بگەنە زۆر شوێن. سەرەتا دروستکردنی (دۆستایەتی و هاوپەیمانیی) تورکیا بۆ ئەم مەبەستە سودی لە ململانێی یەکێتی و پارتی وەرگرت و نەیانشاردەوە کە ئەوان لە پارتی دڵنیان و یەکێتی و سلێمانی مایەی متمانەی ئەوان نین، بۆ ئەم مەبەستە تەنانەت لە سەروەختی شەڕی ناوخۆدا فڕۆکەی تورکی بۆ هاوکاریکردنی پارتی، بۆردومانی هێزەکانی یەکێتیان کرد! لە بەرامبەریشدا پارتی چاوساغی بۆ کردن بۆ پەلاماردانی گەریلاکانی پەکەکە.. هەرچەندە سەرەتاکانی پەیوەندی باشی هەرێم لەگەڵ تورکیدا بۆ هەوڵەکانی مام جەلال و تورکوت ئوزالی سەرۆک کۆماری ئەوکاتی تورکیا دەگەڕێتەوە، تەنانەت پرۆژەی ئاشتی لە باکور و لەگەڵ پەکەکەش گەڵاڵەکرا. بەڵام سەری نەگرت و ئوزال دەرمانخوارد کرا و پرۆسەی ئاشتیش کۆتایی پێهات و پەیوەندیەکەش لەگەڵ یەکێتیدا ساردی تێکەوت و تورکیا دۆستایەتی خۆی لەگەڵ پارتی یەکلایی کردەوە..

لە قۆناغێکی دواتریاندا میتۆدی (هاوبەشی کلتووری) وەک فۆڕمێک لە سیاسەتکردن لە ناو باشووردا کاری پێکرا. لەم نێوەندەشدا جگە لە بەردەوام دووبارەکردنەوەی دروشمەکانی پێکەوەژیانی ئاشتیانەی گەلان و نمایشکردنی تورکیا وەک دەوڵەتێکی تۆلێرانس و کراوە، تا گەیشت بە رێکخستنی گەورەترین ئاهەنگی نەورۆز لە ئامەد بە ئامادەبوونی ئاردۆگان خۆی و میوانداری مەسعود بارزانی، سەرۆکی پێشووی هەرێمی کوردستان و برایم تاتڵیساس و شڤان پەروەریش.. قسەکردن لە پێکەوە ژیانی ئاشتیانەی سەدان ساڵە! وەک ئەوەی کۆمەڵکوژی دێرسیم هەرنەبووبێت و دورگەی ئیمڕاڵیش خەیاڵی ناو حیکایەتە ئەفسانەیەکان بێت!

هەر لەو دەمەشدا میدیای کوردی کەتبوونە هەلەکە سەما بۆ گواستنەوەی راستەوخۆی ئەو وتارە مێژووییانەی کە (ئۆپراسێۆنی چنگی پڵنگ و داڵی) لە ئەمڕۆدا لێ بەهەمهاتووە.. دواتریش میتۆدی (سەرمەستی چێژ) لە میانەی رێکخستنی گەشتەکان و ئاسانکاریەکان بۆ گەشتی تورکیا وای کرد، کەم دانیشتووی باشوری کوردستان هەبێت قەدەمی شەریفیان نەنابێتە تەقسیم و ئاکسەرای.. دەرەنجامی ئەمەش جگە لە بەهەدەر دانی پارەیەکی زۆری خەڵک و سودی ئابووری و گەشیاری بۆ تورکیا، شتێکی دیکە نەبوو، هەروەها نمایشی هەژموونی تورکیا و تۆخکردنەوەی بنەماکانی نەتەوەی سەردەستە نیشاندانەوەی بە تاکەکانی باشوری کوردستان.. تا کار گەیشتە لێدان لە گەشتیارێکی کورد، لەسەر ئاڵای کوردستان لە ملی گەنجێکدا. بەڵام نە گەشت وەستا و نە بوو بە رۆژەڤ لای حکومەت و خەڵکیش.. لە قۆناغێکی تریشدا خستنە ژێر (کاریگەری کلتوریی) لە رێگای میدیایەوە. سەرەتاکانی ئەمەش لە ئاستە هونەریەکەیدا بۆ ئەو گۆرانیبێژانە دەگەڕێتەوە، کە دەچوونە تورکیا لەوێ گۆرانیە کوردییەکانیان بە مۆسیقا بۆ دەکردن بە (تورکی - ئەرەبێسک) و وردە وردە کاریان کردە سەر چەشەی هونەری رەمەکی خەڵک و هاوارەکانی هونەرمەندانی رەسەنی وەک (ناسر رەزازی)ش نەیتوانی پێش بەم شەپۆلە بگرێت. تا کار گەیشت بە کۆپی کردنی پرۆگرامە تورکیەکان و سەراسیمەکردنی خەڵک بەو پرۆگرامانەی لە پوچێتی شتێکی تریان بەرهەمنەهێنا و ئێستا بوون بە لەشکرێک لە میدیای بینراو و سەدان پێگە و ماڵپەڕی ئینتەرنێتی و سۆشیالمیدیایی.. سەرەتاکەی ئەڤین ئاسۆ و ئارامۆ پرۆگرامەکەیان لە تورکیا دەکرد و ستۆدیۆکەیان هەر لەوێ بوو، گەرای ئەم ژەهرە ئێستا دەیان ستۆدیۆیە لە ناو خاکی وەتەندا.. لەم نێوەندەشدا بۆ پشتگیری پارتی و سەرخستنی بەسەر نەیارەکانیا، حکومەتی هەرێمی ناچار بە گرێبەستێکی پەنجا ساڵەیی لە بواری وزەدا کردوە، کە دەتوانرێت بگوترێت بنەمای ئابووری هەرێمی کوردستانی بە ئێجگاری تووشی ئیفلیجی کرد. لەم پارەیەش جگە لەوەی هێند بە رێکخراودی کاریان لەسەری کردوە، کە پارەکە بە مۆڵیی دەچێتەوە گیرفانی کۆمپانیا تورکیەکان، کە لە باشوردا کار دەکەن و ئەو نەوتەش، کە بەبەلاش ئاشتی هەورامی و نێچیرڤان بارزانی سەرۆکی ئەوکاتی حکومەت خستیانە دەستی ئاکپارتیەوە، توانی حکومەتەکەی ئاردۆگان لە زۆر قەیران رزگار بکات.. دوا قۆناغی ئەم پرۆسە مێژوویی ستراتیژیە وەک داودئۆغڵۆ باسی کردوە، گێڕانەوەی ناوچەکانی ژێر دەسەڵاتی عوسمانیە بۆ ژێر دەستی دەوڵەتی تورکیا، خۆ ویستانە بێت یان بەداگیرکردن! ریکلامە تەلەفیزیۆنییەکەی ساڵی ٢٠١٥ کە تەنانەت ئاردۆگان خۆشی رۆڵی تیا بینی، سەربازانی سوپای تورکیا لە بەردەم هەردوو قەڵای هەولێر وکەرکوکدا دەڵێن: (بەڵێ گەورەم!)، لە کاتێکدا کورد هیچ کات بەکەسی نەوتوە (گەورەم!)، ئەمەش وەک ئاماژەیەک بەوەی رۆژێک ئەم شارانە دەگەڕێنەوە سەر دەوڵەتی تورکیا! ئەم رۆژانەش شاهیدی پەلەمار و هاتنە ناوەوەی مەیدانیی سوپای تورکیاین بۆ ناو خاکی هەرێم.. هەرچەند هێشتا زۆر زووە بۆ قسەکردن لەسەر کۆتایی ئەم گەمەیە..

• (کوردی باش و کوردی خراپ)، دوو دەستەواژەی ساڵانی رابردووی سیاسەتی دەرەوەی ئەمریکایە بۆ مامەڵەکردن لەگەڵ کورد، لە رابردوودا ئەوان بە کوردی باشوریان دەگووت (گوود-کوردس)، چونکە دەکرا وەک کارتی فشار بە دەستی خۆیان بەکاریان بهێنن هەر کات ویستیان بێت بەرامبەر (عیراق) لە لایەک و (ئێران)یش لە لایەکی تر. بە کوردی باکوریشیان دەگووت (باد-کوردس)، چونکە ئەوان خەبات دەکەن لە دژی (تورکیا)، هاوپەیمانەکەیان لە (ناتۆ)! هەرچەندە لە ئێستادا ئەم تێرمانە سەبارەت بە کورد لە سیاسەتی دەرەوەی ئەمریکادا نابیسترێت و هەندێک پێگە و دۆخیش گۆڕاون، بەڵام ئەگەر سەرنجێکی بنەڕەتی لە دابەشکاریە زمانەوانیەکە بدەین هیچ نیە جگە لە نەبین و ئینکارکردنی دۆزی کورد وەک یەک نەتەوە و جۆرێکە لە شەرعیەتدان بە دۆستایەتی لەگەڵ لایەک و دوژمنایەتیش لەگەڵ لایەکی تر.. ناکامڵی ئاوەزی سیاسیانەی کوردیش ئەمەی پەسەندکردوە و سەلماندویەتی و لەحزەیەکیش نیە بەرپەرچی ئەم گوتارەی دابێتەوە. ئەمەش بەرەنجامی عەقڵی خێڵگەرایی نەبێت شتێکی تر نییە.. ئەمەی ئێستاش تورکیا لە بەرامبەر باشور پەیڕەوی دەکات بەکارهێنانەوەی هەمان میتۆدە بە هەمان مەبەست، وەک خۆیان دەڵێن: (هەولێرمان بۆ گرنگە و سلێمانیش لە ژێر کاریگەری پەکەکە دایە و ئێمەش دەستناپارێزین لە هەر شوێنێک کە بزانین دوژمنایەتیمانی لێوە دەکرێت)، لەم دۆخەشدا سەرۆکی حکومەتی هەرێم (مەسرور بارزانی) هێشتا هەر مەسرورە و مەحزون نابێت بەم خەبەرە، وەک ئەوەشە قسەی دڵی ئەویان کردبێت و نایەتە دەنگ، بگرە ئاواتەخوازی تەمبێ کردنیشن، مەگەر ساڵانێک نیە زۆر بە پلان سزای سیاسیانەی سلێمانی و خەڵکەکەی دەدەن؟. لە سلێمانیش (لاهور شێخ جەنگی) هاوسەرۆکی یەکێتی بە توتیتێک وەڵام دەداتەوە و دەڵێت: (سلێمانی لەژێرکاریگەری کوردبووندایە، بۆیە پێی دەڵێن هەڵمەت و قوربانی)، هەرئەمە و ئیتر مەسەلەکە دەبێت بەژێر تەپوتۆزی بەرزبوونەوەی رێژەی نەخۆشی کۆرۆنا و مردن و بێ مووچەیی و خراپی دۆخی گوزەران و بایکۆتی دەوام و هەزار وەردە هەواڵی ترەوە..
• دوای کۆمەڵێک قەیرانی دوا بەدوای یەک، عیراق لە رێگەی پێدانی دەسەڵات بە کەسێکی ئەمنی و سەربازی، وردە وردە خەریکی خۆ رێکخستنەوەیە. بەهێزبوونەوەی دەوڵەتی ناوەندیی ئاماژەیەکی موژدەدەر نیە، بەتایبەت دوای ئەو هەموو کێشەیە لەگەڵ هەرێم، کە زۆرینەیان ئەو کێشانەن کە پارتی بە هاندانی تورکیا، خۆویستانە بێت یان لە ژێر فشاردا بێت، دروستی کردون و هیچ ئاسۆیەکی چارەسەریش بۆ ئەو کێشانە دیار نیە. ئەمەش نەک بەچەند جارێک سەردانی قوباد تاڵەبانی، جێگری سەرۆکی حکومەت بۆ بەغدا چارەسەر نابێت، بەڵکو دەبێت بیرمان بێت بناغەی ئەو کێشانە بۆ کاتێک دەگەڕێتەوە، کەخودی مام جەلال خۆی لە بەغدا لە لوتکەی دەسەڵاتدابوو، ئینجا چارەیش نەدەکران. نەخۆشکەوتنە یەکجارەییەکەشی هەر لە چرکەساتەکانی گرژیەکانی نێوان مالکی و بارزانیدا بوو.. لەم نێوەندەشدا دەنگێک لە مووچەخۆرانەوە بەرز دەبێتەوە بۆ داواکاری گەڕانەوە بۆ دەوڵەتی ناوەندیی. ئەمەش وەختێک لەباری یاساییەوە روو دەدات، کە قەوارەی یاسایی هەرێمی کوردستان نەمێنێت یان بگۆڕدرێت. ئەمەش هەر ئەو شتەیە، کە حکومەتی عیراق هەوڵی بۆ ئەدات و ئێران پێی خەنی دەبێت و تورکیاش ساڵانێکە کاری لەسەر دەکات تا رۆژ بگەیەنێتە ئەو رۆژەی قەوارەی سیاسی هەرێم لە ناو بچێت و ئەوکاتیش وەک ڕاوچیەکی شارەزا، نێچیرەکەی بەهەنگویین دەخنکێنێت، سەرەتا ئەزموونی حوکمڕانی باشوری کوردستان و دواتر پارتیش دەخنکێنێت، لە باشترین حاڵەتدا سەرۆکی هەرێم دەکەن بە سەرۆکی شارەوانی هەولێر.. گەر بە دیقەتەوە تەماشای ئەمڕۆژگارە بکرێت هەمان وێنەی (حەفتا و چوارە و رێککەوتننامەی جەزائیر)، شۆڕشی ئەیلول لە زۆر شتا لە حکومەتی ئەوکاتی عیراق بەهێزتر بوو، بەڵام چونکە خۆی خزاندبوە کۆشی شای ئێرانەوە خستیان و نەتەوەیەکیان نائومێد کرد، ئەمەی ئێستاش هەیە هەمان دۆخە و ئەوەی گۆڕاوە لە یاریەکەدا لە جیاتی خۆخزاندنە کۆشی شا، ئەمجارە خۆیان لە ئامێزی گورگە بۆرەکان پەستاوە و هاکا گورگ بەر لەوەی پەلاماری هیچ کوێ بدەن ملی ئەوان دەشکێنن. بەڵام هێشتاش دەرنگ نیە، پارتی بەهۆش خۆیدا بێتەوە و گوێ لە کەسانە نەگرێت کە پێیان دەڵێن ئێوە محەمەدی مەهدین و هەرچی ئێوە دەیکەن شتە راستەکەیە حەق وایە سەیرێکی مێژووی خۆیان بکەنەوە و سوود لە هەڵەکانی رابردوو وەربگرن!
• ساڵانێکە دۆخی ناتەبایی و دووکەرتکردنی کۆمەڵانی خەڵک، بەمەبەست و لە رێی میدیاوە زۆر بەپلان کاری لەسەر دەکرێت. ئەمەش جگە لەوەی شارچێتی تۆخکردۆتەوە و سیستمی خێڵەکی بوژاندۆتەوە، کارێکی کردوە هیچ کەس لەگەڵ ئەوی دی تەبا نەبێت. شەڕ لە هەموو پنتێکی کۆمەڵایەتیدا دروستکراوە، زۆر بە زەحمەت دەتوانی دوو مرۆڤ ببینیتەوە لەسەر سێ خاڵ بۆچوونی هاوبەشیان هەبێت. بۆچوونی هاوبەشیش کێشە نیە، بەڵکو هیچ کەس ئەوی تر قبوڵ ناکات و لێشاوی تەخوین و تەوهین تا ئەوپەڕی سنور رۆیشتوە.. بەتەنیا ئەوە نیە پارتیەکان و یەکێتیەکان خۆیان بە دوژمنی یەک بزانن، یان چەپەکان و سەلەفیەکان كێشەی هەموو دنیا لەسەری یەکتردا کۆبکەنەوە، لە ئێستادا کێشە کەوتۆتە نێوان هونەرمەند و رۆشنبیر و رۆژنامەنووس و تەنانەت مۆدێلەکانیشەوە، دۆخێک دروست بووە ڤێجیتارییەکان بە خوێنی سەری گۆشتخۆرەکان تینوون! هەموو ئەمانەش کارکردی ئەو ناڕێکیەیە لە میدیا و سۆشیال میدیا، کە بەسەدان لەشکری بێ ناونیشان و هەزاران بێکاری بێ مۆڕاڵ بابەتی بۆ بەرهەمدێنن و دەیکەن بە قوڕگی میللەتدا و لە دەرەنجامیشدا هەر ئەمە روو دەدات، کە رووی داوە.. خەڵک تا ڕادەیەکی زۆر ناسیاسی بۆتەوە و قێز لە هەموو شت دەکاتەوە، پرەتە و بۆڵە دەکات و ڕقی لە هەموو شت دەبێتەوە، لەبەرامبەر ستەمکاری حوکمڕانیشدا تا ڕادەیەکی زۆر بێهەڵوێست ماوەتەوە.. بەم جۆرە لێکدووری خەڵک وای کردوە کەس لە سلێمانی گوێی لە ترپەی دڵی هەولێر نەبێت، خەڵکی زاخۆ نەزانن كێشەی خەڵکی هەورامان چییە، لەهەموو ئەمانەش خراپتر کەس گوێ بەو سوتانی سەدان دۆنم گەنم و جۆ و بێستانی جوتیارانی کەرکوک و خانەقین نادەن، بۆ کەسیش گرنگ نیە لە ماوەت و شیلادزێ هەموو رۆژێک بۆمباباران بێت!! هەر ئەم دیاردەیە بەشێکی زۆری کاری دەوڵەتانی داگیرکەرە و لایەنە بەکرێگیراوەکانیش لە ناوخۆ لە پێناو یەک دوو فلس هەموو ئەم ئەجێندایە لە خەونەوە دەگۆڕن بۆ راستی.. دەرەنجامەکانی ئەم دۆخە سەروەختێک بە خراپی دەردەکەون، کە وڵات تووشی ئەزمەیەک دەبێتەوە یان رووبەرووی هێرش و داگیرکاری دەبێتەوە..

لە کۆتاییدا ئەوەی گرنگە بوترێت، وێڕای هەموو مەترسیەکان هێشتا ئاسۆکانی چارەسەریش زۆر دوورنین، ئەگەر ویستێکی نیشتمانیی حەقیقی بوونی هەبێت. کۆدەنگی لایەنە کوردیەکان لە هەرکات پێویستترە، دەکرێت لەم نێوەندەشدا کەسایەت و ئەکادیمیست و سیاستەڤانە بەئەزموونەکان و خەمخۆرەکان و رێکخراوەی کۆنگرەی نەتەوەیی کورد پێکەوە رۆڵێکی مێژوویی بگێڕن، بۆ ئەوەی دۆخی باشوور لەمەی ئێستا زیاتر تووشی لێکترازان نەبێت و مەترسی لەناوچوونی ئەزموونی حوکمڕانیەکەش کە وەک (پشتی سەنگەر) وایە بۆ هێزە کوردیە شۆڕشگێڕەکانی پارچەکانی تریش لەبەین نەبرێت.. یەکگرتوویی و لێکتێگەیشتن زەمانەتی مانەوە و گەشەکردنی سیاسەتی کوردیە لەناو پێشهاتە زۆرەکاندا، خۆ ئەگەر نا، ئەم دابڕان و زاڵبوونی بیر و خەتی خیانەتە جارێکی تر نوشوتێک دەکاتەوە ناو دیرۆکی گەلی کورد!

سەرچاوە: ناوەخت

ف.ق