کۆبوونەوەکە لە باڵەخانەی ماڵی کلتووریی شاری میچورنیسکی بە خولەكێک ڕێزگرتن لە گیانی شەهیدان دەستیپێکرد. پاشان لەسەر ژیانی زیلان (زەینەب کناجی)، سەما یوجە و گوڵان (فیلیز یەرلیکا) بەڵگەفیلمێک نیشاندرا. بەشدارانی مەراسیمەکە سەبارەت بە مێژوو و ژیانی شەهیدانی ناو تەڤگەری ئازادی کوردستان قسەیان کرد.

چالاکیی شەهید زیلان چالاکییەکی مێژوویی بوو

پاشان بەرپرسی تەڤگەری ژنانی کوردی میچورنیسکی زێمفرا فێرۆ تیشکی خستە سەر تێکۆشانی شەهیدانی ئازادیی کوردستان و گوتی: "چالاکیی شەهید زیلان چالاکییەکی مێژوویی بوو، ڕاستیی ژنی کوردی لە مێژوودا سەلماند. زیلان وەکو سیبوڵێکی ژنی کورد ناسێنرا. زیلان، سەما و گوڵان بوونە بنچینەیەک بۆ ئازادیی کوردستان و ئازادیی ژنانی کورد و پارتیبوونی ژنان."

بانگەوازی بۆ تێکۆشانی ژنان

زێمفرا فێرۆ لە بەردەوامی قسەکانیدا دڵسۆزیی خۆی بۆ شەهیدان دووپات کردەوە وتی: "چالاکیەکەی هەڤاڵ زیلان وەڵامێک بوو لە دژی پیلانگێڕییەکانی دووژمن لەدژی ڕێبەر ئاپۆ. هەڤاڵ زیلان بۆ ئازادیی کوردستان و ژنی کورد چالاکیەکی فیدایی ئەنجامدا. وەکو ژنانی کورد پێویستە ئێمە خاوەندارێتی لە ڕەنجی شەهیدانمان بکەین و لەبیریان نەکەین. ئێمە لە سایەی ڕەنجی ئەوانەوە گەیشتووینەتە ئەم ڕۆژانە. ئێمە لەبەرامبەر هەموو شەهیدان سەرمان دادەنەوێنین و دەڵێین شەهید نامرن."

چالاکیەکە بە بەرزکردنەوەی دروشمی "شەهید نامرن" کۆتایی هات.