گەلو پەنابەراو کەمپوو مەخمووری بەتندی گۆشەگیری و قەدەغەکەردەی تازەو چەمپەنەکەوتەیشا چەنی ڕابەرو گەلو کوردی عەبدوڵا ئۆجالانی شەرمەزار کەرد و داواو چەمپنەکەوتەی بەپەلەیشا کەرد.

هیزی ئەرەیاونیا کە ڕابەرو گەلو کوردی عەبدوڵا ئۆجالان، عومەر خەیری کۆنار، حامیلی یڵدرم و وەیسی ئاکتاش کە ماوەو ٣٨ مانگان حیچ زانیارێوەشا سەر نیا زیندانی ئیمرالینە، ماوەو ٣ مانگاوی دماتەریچ دیدارشا قەدەغە کریان.

گەلوو کەمپوو پەنابەراو گەشمەردە ڕوستەم جودی (مەخموور)ی ئەرەیاوناێوەنە ئی قەرارە نایاساییەشا شەرمەزار کەرد. ئەرەیاونایەکە لاو کۆمیتەو بنەیانەو  گەشمەرداو مەخمووریوە بە کۆبییەیوە ئەرەنیشتاو کەمپەکەی بە دەیەقێو ڕێزگێرتەی دەسش پنە کەرد.

دمایی بە نامێ ئامادەبییاوە، عەلی بلەهی، هامسەرۆکو دیوانو مەجلیسوو گەلی، ئەرەیاوناش کە بەتندی قەراروو قەدەغەکەردەی دیداروو ئیمرالییش شەرمەزار کەرد و واتش: " ئێمە بە قینیوە و ئی قەرارە نایاساییە شەرمەزار مکەرمێ، ٢٥ ساڵێن ڕابەر ئاپۆ بە گردو ڕا و شێوازێوی نائینسانانەی ئەشکەنجە مدریۆنێ. ئەشکەنجەدایەکەی سیستماتیکا."

ڕابەر ئاپۆ مدرامانێوی تاریخی دژوو ئی ئەشکەنجەدایە مکەرۆنێ. فرەو جارا گەرەکشا بییەن تیرۆرش بکەرا، فرە جارییچ ژەهراوییش بکەرا. ئینێ ڕۆشنێ و ئاشکرێنێ و بەداخۆ سی پی تی چی بوارۆ بێدەنگا. وەرپەرسەکێشا بەرمگنانێ و مواچانێ، گۆشەگیری نییا، مادام نییا، چی نمەتاومێ زانیاریی سەروو ڕابەر ئاپۆ و هامڕایاش وربگێرمێ؟ ئینە ڕاس نییا و پێویسا دەمودەس زانیاریی بارەو ڕابەر ئاپۆیوە بزانمێ.

سی پی تی سەرێ تورکیاییش دان، بەڵام ڕاپۆرتەکێش ئاشکرا نەکەردێنێ و ئینەیچ یاگێ قبووڵکەردەی نییەنە. ڕابەر ئاپۆ بەناڕەوا و نائینسانانە مامەڵەش چەنی مکریۆ. ئیساتێ بە نامێ 'سزاو دیسپلین'یوە، دیدارش چەنی قەدەغە مکریۆ و سی پی تی بە پلەو ئەوەڵی وەرپەرسا. هجوومەکاو سەروو ڕابەر ئاپۆی دژوو ئێمە مکریانێ ئادێ نمەتاوانێ ئێمە جە ڕابەر ئاپۆی ببڕانێرە."

ئەرەیاونایەکە بە دروشمو "بژیوۆ ڕابەر ئاپۆ"ی، "بێ سەرۆکی ژیوای نمەبۆ" و "بژیوۆ مدرامانوو ئیمرالی" دماییش ئاما.