وۆرک شۆپ و گرووپ و کۊششوو یەکسانی ڕەگەزی گلېرگەو هامپەیمانی وەڵێکۊتەوازی (Progressive Alliance) کە ٢٧ وڵاتۍ ئەوروپای و ۋەرکۊتوو دلېڕاسەی و ئەفریقای جە ۋێش مگێرۆ، جە دووەمین ڕۆنە ئیستەنبوڵنە بەردەواما. ژەنی جە پارت و ڕێکوزیا جیاوازەکاوە بەشدارۍ وۆرک شۆپەکەی بێنۍ.

هامسەرۆکەو گرڎینەو پارتوو یەکسانی و دیموکراسی گەلا (دەم پارتی) تولای حاتەم ئۆغۆللارییە قسێش کەردۍ، سەرنجش وست سەرو جەنگی و کێشمە کێشاکا جە جیهانەنە هامشێوەو جەنگوو ڕوسیا-ئۆکرانیا، ئیسرائیل-فەڵەستینی و فشارە بەردەوامەکا پەی سەرو سەرنیشت و ۋەرکۊتوو سوریای، ئەرەیاۋناش مەڵامەتەکەش سیستەموو سەردەستەین و واتش: "پەنەوازا پېسە جمیەرەکا ژەنا پاگیری سەرو ئاشتی بکەرمۍ، ئی قۆناغەیە بە ئەرەکۊشای ۋېیەرنمۍ".

حاتەم ئۆغۆللارییە ئاماژەش بە کۆمکوژی ژەنا کەرد جە تورکیانە، واتش: "پېسە دەم پارتی دژوو گرڎ جۆرە سەپنێوە ۋەرا ۋەر بە جەسڎەو ژەنا، ئەرەکۊشمۍ. گەرەکمانە دژوو گرڎ جیاکاریێوە ڕەگەزی گلېرگەیی و ئابووری و سیاسی و چاندی، بتاومۍ یەکسانی بەدی بارمۍ. ئەرەکۆشایما جە ئاستی نەتەوەیی و مېیاننەتەوەیینە بەردەوام مبۆ".

حەرپاسە جەختش کەردۆ گەرەکشانە سیستەمو هامسەرۆکایەتی جە جیهانەنە وەڵابکەراوە، تەئکیدش کەردۆ کە فشار و گېرتەی و ئەشکەنجەی دژوو ژەنا، بەتایبەت ژەناو کوردی زیاتەرۍ بیینۍ. سەرنجش وست سەرو ستەموو سەپنای سزاو سەڎان ساڵا جە دۆزوو کۆبانێ، واتش: "پەنەوازا تورکیا قەرارەکا دادگاو باڵاو مافەکا مرۆڤوو ئەوروپای جابەجێ بکەرۆ و گرڎوو زیڼانیا دۆزوو کۆبانێ ئازاڎۍ بکریا".

جە درێژەنە حاتەم ئۆغۆللارییە واتش: " جە سەڎەو ٢١ینە جەسڎەو ژەنۍ پېسە غەنیمەو جەنگی تەماشە مکریۆ. ئینەیچ عەزیەتما مکەرۆ. دژوو ئینەی بەبێ گۆشدای بە سنوورەکا ئەرەکۊشای پشکی هامبەشوو گرڎیمانە. چی ڕوانگۆ پەیماننامەو ئەستەنبوڵی گرنگ بۍ. وەڵتەر تورکیا ئی پەیماننامەیە پاڕێزنۍ، بەڵام ئیساتۍ چنەش کیشیانۆ. ئێمە پېسە ژڵێوەو ژەنا هەوڵوو گېڵنایۆ ئی پەیماننامەیە مڎەیمۍ. دڵنیانا ئێمە پېسە ژەنۍ ئەرەکۊشای مکەرمۍ و ئا ئەنجاما بەدەس مارمۍ. گرفتەکۍ فرێنۍ، بەڵام ئێمە بەجۆشێنمۍ. جۆشی بێکۆتاو ژەنا ئێمەش یاۋنا بە ئارۊی. ئێمە بەردەوامېنمۍ جە گەشتەکەیما پەی ڕازنایۆ ئاینڎەیما پا ڕەنگا کە گەرەکمانە. ڕاکېما کراوێنە".

دماتەر وۆرک شۆپەکە بە ۋەنایۆ نەخشەڕێوە دمایش پنە ئاما.