ژمارەیەکی بەرچاو لە ژنانی رۆژهەڵاتی کوردستان، ئێران و ئەفغانستان پشتیوانی خۆیان بۆ هەڵمەتی 'ئازادی بۆ عەبدوڵا ئۆجالان، چارەسەری سیاسی بۆ پرسی کورد' دەربڕی و جەختیان لە گرنگیی ئازادی جەستەیی رێبەر ئاپۆ کردەوە.
لە ١٠ی تشرینی یەکەمی ٢٠٢٣ەوە هەڵمەتی 'ئازادی بۆ عەبدوڵا ئۆجالان، چارەسەری سیاسی بۆ پرسی کورد" دەستیپێکردووە، رۆژ لەدوای رۆژ پشتیوانییەکان لەم هەڵمەتە زیاتر دەبێت و ژمارەیەکی بەرچاو لە چالاکوانان لە سەر ئاستی وڵاتانی جیاجیای جیهان پشتگیری خۆیان بۆ هەڵمەتەکە دەردەبڕن. لەم نێوەدا بەشێکی بەرچاو لە ژنانیش بەشدارییان لە هەڵمەتەکەدا کردووە و تا دێت ژمارەیان رووی لە زیادبوونە.
لە ئێرانیش کە لە چەند ساڵی رابردوودا زیاتر بە ئەندێشە و رامانەکانی رێبەری گەلی کورد عەبدوڵا ئۆجالان ئاشنابوون، بەردەوام لە بۆنە و یادە جیاجیاکاندا ژنان پشتیوانی خۆیان بۆ ئازادی جەستەیی رێبەری گەلی کورد دەربڕیوە.
ئەمجارەش ٥٠ چالاکوان و هەڵسوڕاوی بواری مافەکانی ژنان کە لە پێکهاتە جیاجیاکانی ئێران و هەروەها ئەفغانستانن لە پەیامی ڤیدیۆییدا وێڕای سەرکۆنەکردنی گۆشەگیری رەها لە سەر رێبەری گەلی کورد عەبدوڵا ئۆجالان، لە هەمان کاتدا داوایان عەبدوڵا ئۆجالان ئازاد بکرێت.
ئەو ژنە چالاکوانانەی رۆژهەڵاتی کوردستان، ئێران و ئەفغانستان لە پەیامەکەیاندا هێرشە داگیرکەرییەکی دەوڵەتی تورکیشیان بۆ سەر پارچە جیاجیاکانی کوردستان شەرمەزار کرد.
لە دوای دەستپێکردنی سەرهەڵدانی ژن، ژیان، ئازادی کە هەڵقوڵاوی ئەندێشە و فەلسەفەی رێبەری گەلی کورد عەبدوڵا ئۆجالانە، یەکگرتوویی و کاری هاوبەشی نێوان ژنانی رۆژهەڵاتی کوردستان و پێکهاتەکانی دیکەی ئێران رووی لەهەڵکشان کردووە و لە دوو ساڵی رابردوودا چەندی کۆنفڕانس، خۆپیشاندان و هەڵمەتی هاوبەشیان ئەنجامداوە.
هـ.ب
