به هه‌ورامی، داستانی «شێخی سه‌نعان» له‌ژێر چاپه و «مه‌م و زین»یش ئاماده‌ی چاپه
داستانەکانی «شێخی سەنعان» و «مەم و زین» کە کارێکی بەراوردی و لێکۆڵینەوەیی و ڕاڤەیین، به هه‌ورامی لەلایەن «نامق هەورامی»یەوە، ئامادە کراون.
داستانی بەناوبانگی «شێخی سەنعان»، کە بە چەندین زمانی زیندووی جیهان نووسراوه و بڵاوکراوەتەوە، قسەوباس و لێکۆڵینەوەی زۆری لەسەر کراوە، لە ئێستاشدا لەلایەن نووسەری دیاری هەورامان و کوردستان «نامق هەورامی»یەوە لە دووتوێی کارێکی بەراوردی و لێکۆڵینەوەییدا، بە هەورامی ئاماده كراوه و ئێستا له‌ژێر چاپ دایه.
لەو بارەیه‌وه نامق هەورامی، بە ئاژانسی هەواڵی فوراتی ڕاگەیاند: ئەم بەرهەمە نوێیە ئەنجامی شەونخونی زیاتر لە ساڵێک کارکردنە لەسەر ساخكردنه‌وه، بەراوردکردن و لێکۆڵینەوە لە داستانی «شێخی سەنعان» بە زمانی هەورامی. وتیشی کارێکی ماندووکەر بووە، بەڵام لەگەڵ ئەوەشدا دڵخۆش بووە به كاره‌كه.
هەورامی، زیاتر لەو باره‌یه‌وه قسه‌ی كرد و وتی؛ ئەم کارەم بەراوردێکە لەسەر مێژووی نووسینی داستانی شێخی سەنعان و دواتر بڵاوبوونەوەی، ئینجا نووسینەوەی لەناو کورددا. بەگوێرەی دەقە مێژووییه‌کان یەکەم جار «فەریدەدین عەتار نیشابوری (١١٤٦ز - ١٢٢١ز)» داستانەکەی بە فارسی نووسیوە، هەرچەندە شارەزایانی بوارەکە ڕایەکی دیکەیان هەیە و دەڵێن: بۆ یەکەم جار ئەم داستانە لە کتێبی «توحفە الملوک»ی «غەزالی (١٠٥٨ز - ١١١١ز )»، لەناو کوردیشدا «فەقێ تەیران (١٥٩٠ ز - ١٦٦٠ز)» ئەم داستانەی نووسیوەتەوە.
«لە هەورامانیشدا لە سەدەی ١٣ی هەتاوی نووسراوەتەوە. من لەم کتێبەمدا، تیشک دەخەمە سەر ئەم لایەنانە و لێکیان دەدەمەوە. هاوکات دەقی داستانەکە بە هەورامی لەگەڵ لاپەڕەی دەستنووسەکەش بڵاوکراونەتەوە، ئەمە جگە لە بڵاوکردنەوەی تێکستێکی دیكه‌ی داستانی ناوبراو بە کوردیی ناوەڕاست و نوسخەی تەواوی شێخی سەنعانەکەی عەتاری نیشابوری بە فارسی لەم کتێبەدا بڵاوکراونەتەوە.»
نامق هەورامی، دەڵێت: خۆشبەختانە هەموو کارەکانی کتێبەکەی تەواو بووە و بەم نزیکانە لە چاپخانە دەگەڕێتەوە و دەکەوێتە بەر دیدەی خوێنەران. هیوادارم توانیبێتم کارێکی باشم بۆ فەرهەنگی نەتەوەکەم کرد بێت. سوپاسی هەموو ئەو بەڕێزانەش دەکەم کە بە وشەیەکیش بێت هاوکاریان کردووم.
نامق هەورامی، ئاشکراشی كرد، کاری لە سەر دەستنووسێکی داستانی بەناوبانگی ئەوینداری «مەم و زین»یش کردووە. بەڵام ئەوەی جێی سه‌رسوڕمانه دەستنووسەکە جیاوازه له‌وه‌ی «ئەحمەدی خانی»ی گەورە هۆنەری گەلەکەمان کە بە کورمانجی هۆنراوەتەوە. بەڵکو ئەمەیان تەواو بە زمانی هەورامییە.
«دەستنووسەکەی مەم و زین بە زمانی هەورامییە و مێژووی دەستنووسەکە بۆ ١٧٢ ساڵێک بەر لە ئێستا دەگەڕێتەوە. ساخكردنه‌وه و لێکۆڵینەوەم بۆ کردووە، ئەویش ئامادەیە و خوازیارم تەمەن دەرفەت بدات ئەمساڵ بە چاپی بگەیه‌نم.»
لە کۆتاییدا، نامیق هەورامی دەڵێت: ئەگەر کتێبی داستانەکەی «شێخی سەنعان» بە هەورامی چاپ ببێت، ئەوا هێشتا ١٢ کتێبی دیکەی ئامادەی چاپن و داواکارە لایەنی پەیوەندیدار و هۆگرانی کتێب، وێژە و مێژووی کورد بۆ بەچاپ گەیاندیان هاوکار بن.
جێگای ئاماژەیە، نامق هەورامی تا ئێستا ١٢ کتێبی لە بوارەکانی شعر و وێژە، مێژوو و لێکۆڵینەوە چاپ و بڵاوکردووەتەوە.
هـ.هـ
