هەڤرین خەلەف دامەزرێنەری حزبی پێشەرۆژی سوریا لە ١٢ی تشرینی یەکەمی ٢٠١٩دا لەو کاتەی دەوڵەتی تورک هێرشە داگیرکارییەکانی بۆسەر سەریکانی و گرێ سپی دەستپێکردبوو، لەلایەن چەتەکانی ئەحرار شەرقییەی سەر بە دەوڵەتی تورکەوە دەستگیر دەکرێت و لە دوای ئەشکەنجەیەکی زۆر شەهید دەکرێت. لەو بارەیەوە سەمیرە عەزیز لە ٦هەمین ساڵوەگەڕی هەڤرینی هاوکار و هاوڕێیدا باسی لە کار و خەباتی هاوڕێکەی کرد.

'ژنێکی پێشەنگ و کاریگەر'

لە دەستپێکی قسەکانیدا سەمیرە عەزیز باسی لەسەرەتای ئاشنابوونی بە شەهید هەڤرین خەلەف کرد و وتی: "لەساڵی ٢٠١١ەوە ئاشنایەتیمان دروستبوو. دوای ئەوەی لە ساڵی ٢٠١٥دا هەڤرین لە دەستەی وزەدا بەشدار دەبێت، منیش لەو کاتەدا لە شاندی پەروەردەدا بووم، بۆیە زۆرکات پێکەوە کۆدەبووینەوە، بەڕاستی هەموو کاتێک پێشەنگ و پسپۆربوو لە کارەکانیدا و کاریگەری دروستەکرد. لە دوای ساڵی ٢٠١٤ەوە لەگەڵ دامەزراندنی بەڕێوەبەری دیموکراتیکی خۆسەری هەرێمی جزیرە، چەندین ئەرک و بەرپرسیارێتی لە ئەستۆ گرت. لە ٢٧ی ئاداری ٢٠١٨دا بە دامەزراندنی پارتی پێشەڕۆژی سوریا لە ڕەقە بووە پێشەنگی پاشە ڕۆژ و چەندین پێکهاتەی جیاوازی لە پارتەکەیدا کۆکردەوە. وەک سکرتێری گشتی بووە دەنگی داد و یەکسانی."

'لە کاروباری دیپلۆماسیدا لێهاتوو بوو'

لە بەردەوامیدا سەمیرە عەزیز تیشکی خستەسەر لێهاتووی شەهید هەڤرین لە کاروباری دیپلۆماسیدا و بەم شێوەیە باسیکرد: "بەڕاستی لە بابەتی بەڕێوەبردنی کاروبارەکاندا ژنێکی پسپۆر و پێشەنگ بوو. کەسێتییەکی دیپلۆماسی هەبوو. پارتی پێشەرۆژی سوریا بە هەوڵەکانی ئەوەوە دامەزرا. نزیکەی ساڵ و نێوێک سکرتێری گشتی حیزبەکە بوو.

لە دژی تاریکیەکانی داعش کاری زۆریکرد و بووە هۆکاری ئەوەی چەندین ژن بەشداری خەباتی سیاسی ببێت. هەربۆیە دەوڵەتی تورک لە سەرەتای داگیرکارییەکانی سەرێکانی و گرێسپیدا لە ساڵی ٢٠١٩ لە ڕێگەی چەتەکانییەوە لە سەر ڕێگەی M4 دەستگیری کرد و لە دوای ئەشکەنجەیەکی زۆر شەهیدی کرد.

لە دوای شەهید کردنی لە چەندین جێگەی ئەوروپادا ناوی بەرز ڕاگیرا و وەک ژنە تێکۆشەرێکی فیمینیستی یادکرایەوە."

'گەلانی لە تێکۆشانی هابەشدا لێکترکۆدەکردەوە'

لە کۆتایی قسەکانیدا سەمیرە عەزیز باسی خەباتی دیپلۆماسیانە و بە بنەماوەرگرتنی دیالۆگ لە کارەکانی شەهید هەڤرین کرد و بەمشێوەیە کۆتایی بە قسەکانی هێنا: "هەڤرین کارەکانی تەنها لە گفتوگۆکردن لەگەڵ کورداندا سنوردار نەبوو، هاوکات هەمیشە بۆ ئاشتی و پێکەوەی لەگەڵ خێڵە عەرەبییەکاندا لە دیالۆگدا بوو، وە هەمیشە لەگەڵ گەنجان و ژناندا بوو. بۆیە لە ئێستادا چەندین گەنج و ژن لەسەر رێگەی هەڤرین بە ڕێکخستنی گەلانی سوریا لە تێکۆشانی هاوبەشدان."