لە ناوچەی عامودا بۆ شەرمەزارکردنی هێرشەکانی دەوڵەتی داگیرکەری تورک بۆ سەر باکور و ڕۆژهەڵاتی سوریا بۆ ماوەی سێ ڕۆژ چالاکی خێمەدانان دەستی پێ کرد. ئەمڕۆ لە سێیەم ڕۆژدا، چالاکییەکە کۆتایی هات. دانیشتووانی شارۆچکەی تۆپۆی سەر بە عامودا و مەجلیسی ناوچەکە و شارەوانی و بەڕێوەبەرانی کۆمۆنەکان بە دروشمی "بەرخۆدان ژیانە" بەشداری چالاکییەکە بوون.

ئەندامی بەڕێوەبەری ناوچەی عامودا، مەدیا سەعدۆ گوتی: "ئەردۆگان لەڕێگەی نوێنەرە چەتەکانی وەک داعشەوە شکستی هێنا، ئێستە لەڕێگەی بەرخۆدانی گەلانمانەوە دەوڵەتی تورک شکست دەهێنێت، ئەم هێز و باوەڕەمان لە فیکری ڕێبەر عەبدوڵا ئۆجالانەوە وەرگرتووە".

لەسەر ناوی کۆمۆنەی شەهید شەریفی ناوچەی عامودا، ئەحمەد کۆبانێ، گوتی: "دەوڵەتی تورک دەیەوێت لەڕێگەی هێرشەکانەوە دەسکەوتەکانی هەرێمەکەمان لەناوببات، چونکە بەرگەی ئەم دەسکەوتانە ناکرێت و پێی هەرس ناکرێت".

ئەحمەد کۆبانێ سڵاوی لە بەرخۆدانی رێبەری گەلی کورد عەبدوڵا ئۆجالان کرد و گوتی: "ئێمە خاوەنی میراتی شەهیدانین، بە ڕۆحی بەرخۆدان سەردەکەوین، ئیتر بەسە قڕکردن، ئیتر بەسە داگیرکاری".

چالاکییەکە بە وتارێکی مەجلیسی بنەماڵەی شەهیدان لەلایەن زیوەر عەلی، کۆتایی هات.