بە سەدان دانیشتووی شاری حەسەکەی کانتۆنی جەزیرە  بە بەشداری ئەندامانی دامەزراوەکان و کۆچبەرانی عەفرین و شەهبا بەشداربوون لە بەخاکسپاردنی تەرمی شەڕڤانی هێزەکانی ڕزگاری عەفرین (هەرەئە) دژوار عەفرین و ئەندامی پارتی هاوپەیمانی نیشتیمانی سووریا عەبدولرەحمان مورشید لە شاری عەفرینی داگیرکراو و ئەندامی هێزەکانی ئاسایشی ناوخۆی حەسەکە عەبدولعەزیز ئیبراهیم لە گۆڕستانی شەهید دژوار لە گوندی داودییەی حەسەکە.

لە مەڕاسیمی بە خاک سپاردنەکەدا ئەندامی مەجلیسی بنەماڵەی شەهیدانی شاری حەسەکە ڕەوان شێخۆ  قسەی کرد و سەرەخۆشی لە بنەماڵەی شەهیدان کرد. ڕەوان لە دژی پیلانگێڕییەکان دژی هەرێمەکە و گەلان بانگەوازی یەکگرتنی کرد.

ڕەوان شێخۆ بەمجۆرە بەردەوامی بە قسەکانیی دا: "دەبێت لە دەوری هێز و دامەزراوەکانی خۆمان کۆببینەوە، بۆ پاراستنی هەرێمەکە و بەجێگەیاندنی خەونەکانی شەهیدان، تێبکۆشین".

بە ناوی مەجلیسی سەربازی حەسەکەوە فەرماندە دێرسیم حەسەکە لە کەسێتی هەر سێ شەهیددا هەموو شەهیدانی شۆڕشی ڕۆژئاوایی بە بیرهێنایەوە. دێرسیم حەسەکە دووپاتی کردەوە کە قەسەدە و مەجلیسی سەربازی لە پاراستنی هەرێمەکە و گەل بەردەوامە و بەڵێنی دا کە لەسەر ڕێی شەهیدان بەرخۆدان درێژە پێ بدات.

لە دوای قسەکان ناسنامەی شەهیدان لە لایەن ئەندامی مەجلیسی بنەماڵەی شەهیدان گوڵچین ئەحمەد خوێنرایەوە و ڕادەستی بنەماڵەکانیان کرا.

تەرمی شەهیدان بە هەلهەلە و بەرزکردنەوەی دروشمی "شەهید نامرن" بە خاک سپێردران.