ڕێکخراوی یەکێتیی کۆمەڵایەتی عەفرین لە ڕەقە، پەیوەست بە سووتاندنی سرووشتی عەفرین لەلایەن دەوڵەتی داگیرکەری تورک و چەتەکانییەوە، ڕاگەیاندراوێکی خوێندەوە.

ڕاگەیاندراوەکە بە ئامادەبوونی کۆچبەرانی عەفرین لە ڕەقە لە چوارڕیانی نەعیم خوێنرایەوە.

ئەندامی ڕێکخراوەکە سەڵاح عەبدۆ ڕاگەیاندراوەکەی خوێندەوە و دووپاتی کردەوە دەوڵەتی داگیرکەری تورک لەکاتی داگیرکردنی عەفرینەوە تا ئێستە تاوانی ڕفاندن و بێسەروشوێنکردنی زۆرەملێ و دەستبەسەراگرتنی موڵک و وێرانکردنی شوێنە مێژوییەکان و سووتاندنی دار و درەخت ئەنجام دەدات.

جەختی کردەوە ئەم کارانە دژی یاسا نێونەتەوەییەکانی مافی مرۆڤە.

بێدەنگی ڕێکخراوە یاسایی و هەرێمی و نێونەتەوەییەکانی بەرامبەر تاوانەکانی دەوڵەتی داگیرکەری تورک شەرمەزار کرد، بانگەوازی لێ کردن کە فشار بکەن بۆ کۆتایی هێنان بە داگیرکاری تورک لەسەر خاکی سوریا و گەڕانەوەی سەلامەتی کۆچبەران بۆ زێدی خۆیان.